AktualitetSociale

Rritja e tarifave dentare, MSH padit Urdhrin e Stomatologëve, në lëvizje edhe Autoriteti i Konkurrencës

Ministria e Shëndetësisë padit në Gjykatë Urdhrin e Stomatologëve. MSH: US, nuk ka tagër të rrisë tarifat. Në lëvizje edhe Autoriteti i Konkurrencës. Nis hetimet për vendimin që rrit me 100% tarifat dentare.
Featured image of article: Rritja e tarifave dentare, MSH padit Urdhrin e Stomatologëve, në lëvizje edhe Autoriteti i Konkurrencës

Pas vendimit të publikuar dje nga Urdhri i Stomatologëve për të rritur tarifat dentare me 100%, Ministria e Shëndetësisë ka paditur në Gjykatën e Tiranës Urdhrin e Stomatologëve.

Ministria kërkon rrëzimin e vendimit dhe sqaron se US nuk ka tagër të rrisë tarifat dentare. Ministria e Shëndetësisë thotë në deklaratë:

Pas kundërshtisë në votimin për vendosjen e tarifave për shërbimet dentare, Ministria e Shëndetësisë ka ndërmarrë një tjetër hap për të bllokuar vendimin e Urdhrit të Stomatologut për rritjen e tarifave: Dërgimin në gjykatë të këtij vendimi, me argumentin se Urdhri i Stomatologut ka tejkaluar kompetencat. Nuk do të ketë rritje tarifash sepse vendimi i Urdhrit të Stomatologëve është i paaplikueshëm”.

Më herët për këtë vendim reagoi edhe Autoriteti i Konkurrencës që paralajmëroi se do të merren masa për Urdhrin e Stomatologëve.

Për më shumë bëhu pjesë e grupit më viral në Facebook, Dosja.al

“Sipas listës së publikuar, Urdhri i Stomatologut ka vendosur çmime dysheme për një kategori të caktuar shërbimesh dentare për: Terapinë, Ortopedinë, Kirurgjinë dhe Ortodoncinë. Autoriteti i Konkurrencës, i cili ka si mision mbrojtjen e konkurrencës së lirë dhe efektive në treg, në bazë të nenit 69 të ligjit nr. 9121/2003 “Për mbrojtjen e Konkurrencës”, i ndryshuar vlerëson shkallën e kufizimit ose të pengimit të konkurrencës të çdo projekt-akti normativ që, në mënyrë të veçantë, ka të bëjë me: a) kufizimet sasiore për hyrjen në treg dhe tregtimin; b) vendosjen e të drejtave ekskluzive ose të të drejtave të veçanta, në zona të caktuara, për ndërmarrje ose për produkte të caktuara; c) imponimin e praktikave të njëjta në çmime dhe kushtet e shitjes. Për sa më sipër Autoriteti i Konkurrencës do të vlerësojë këtë akt normativ dhe do të shprehet me vendimmarrje nga ana e Komisionit të Konkurrencës nëse ky akt bie në kundërshtim ligjin nr. 9121/2003”, thuhet në deklaratën e Autoritetit të Konkurrencës.

Ditën e djeshme, Urdhri i Stomatologëve nxorri një vendim ku bëhej e ditur se të gjitha klinikat dentare që operojnë në Shqipëri do të aplikojnë një listë të re çmimesh për shërbimet që ofrojnë.

Tarifat janë dyfishuar, duke sjellë që për një mbushje dhëmbi të gradës së dytë, pacientët duhet të paguajnë 4000 lekkë, nga 2000 që ishte para 1 janarit. Rritja reflektohet në të gjitha shërbimet e tjera dentare, përfshirë edhe ekzaminimin me sy, që para 1 janarit ishte falas, ndërsa tashmë do të jetë 500 lekë.  Për mbushjet e gradës së tretë, çmimi ishte 3,000 lekë, ndërsa me referencën e re çmimi bëhet 5.000 lekë (2.000 lekë më shumë, shtrenjtim 67%). Çmimi për pastrimin e gurëzave dhe të cipave bëhet 3.000 lekë, nga 1.500 lekë, sa dyfishi. Heqja e dhëmbëve bëhet 1.000 lekë nga 500 që ishte. 

Vendimi i publikuar dje nga Urdhri i Stomatologëve
Vendimi i publikuar dje nga Urdhri i Stomatologëve

Shto Koment