Politike

Miratohen ligjet e qeverisë dhe rrëzohen dekretet e Metës. Gjoni e Valteri sherr me njëri-tjetrin. Rama mbron Thaçin dhe Veselin: UÇK ka bërë luftë të drejtë

VIDEO
  • Rama me tone të forta, merr në mbrojtje Thaçin e Veselin: Luftuan për liri, aktakuza ishte si fletërrufe
  • Debate në mbledhjen e PS/ Socialistët kundër kandidaturës për kreun e KLSH
  • “Takohesh skutave do protagonizëm”, Murrizi e Gjoni debat në Kuvend
  • Kuvendi nisi punimet me një orë me vonëse, por debatet që ishin prashikuar u zhvilluan. Gjatë diskutimeve pati akuza mes ligjvënësve opozitar, ku Gjoni dhe Valteri u përplasën dhe fizikisht. Krerët e KLGJ e KLP dhe ERE, raportuan në Kuvend problematikat e vitit 2019, ndërsa ligjvënësit kanë miratuar ligjet e propozuara nga qeveria dhe rrëzuan dekretet e Metës. Rama në fjalën e tij ka reaguar për akuzat kundër Thaçit dhe Veselit dhe i ka marrë në mbrojtje.
    Featured image of article: Miratohen ligjet e qeverisë dhe rrëzohen dekretet e Metës. Gjoni e Valteri sherr me njëri-tjetrin. Rama mbron Thaçin dhe Veselin: UÇK ka bërë luftë të drejtë Pamje nga kuvendi

    TIRANË- Nisi me 1 orë vonesë seanca plenare në Kuvend, për shkak se u mbajt peng nga mbledhja e grupit të Partisë Socialiste, që gjithashtu u zhvillua në të njëjtën sallë ku mbahet edhe seanca plenare. Por dhe pse nisja ishte e vonë, sërish debatet e parashikuara u zhvilluan.Me nisjen e seancës nuk ka munguar as akuza e deputetit Halit Valteri i cili tha në Kuvend se parlamenti u dhunua për shkak të mbledhjes së një partie.

    Në Kuvend kanë raportuar edhe dy krerët e KLGJ-së dhe KLP-së. Naureda Llagami tha se është bërë shumë punë e mirë gjatë vitit 2019, ndërsa Gent Ibrahimi bëri me dije se kur Vettingu të ketë përfunduar, atëherë do të jenë hedhur themelet e drejtësisë së re.

    Në fund të fjalës së Naureda Llagamit, kryetari i Kuvendit, Gramoz Ruçi bëri thirrje që institucionet e reja të drejtësisë, një orë e më parë të mundësojnë plotësimin e vakancave në Gjykatën e Lartë, pasi siç tha ai, ky është një ngërç që po penalizon Shqipërinë edhe në sytë e ndërkombëtarëve.

    Për më shumë bëhu pjesë e grupit më viral në Facebook, Dosja.al

    Me përfundimin e relatimit të tyre, në foltore u ngrit ministrja Etilda Gjonaj, e cila po fliste për Reformën në Drejtësi, kur në këtë moment plasi sherri mes deputetëve Ralf Gjoni dhe Halit Valteri. Pas një sharjeje banale mes tyre, Valteri u ngrit që ta qëllonte Gjonin, dhe në këtë moment kanë ndërhyrë opozitarët e rinj, dhe e nxorrën jashtë Kuvendit Valterin. Edhe me rikthimin në Kuvend, sapo mori fjalën në foltore, Valteri ironizoi me Gjonin, kur tha se në parlament ka shumë “idiotë”.

    Pas qetësimitm të situatës mes opozitarëve, fjalën e ka marrë Rama, i cili ka marrë në mbrojtje Hashim Thaçin dhe Kadri Vasilin që akuzon nga Prokuroria Speciale për krime lufte. Në fund deputetët kanë miratuar dhe ligjet që ishin në rendin e ditës, por kanë rrëzuar dy dekretet e Presidenit Ilir Meta.

    (G.SH. F.G. A.B. Dosja.al)

    • 16:45

      Kuvendi ‘rrëzon’ Metën për koncensionin e Porto Romanos dhe shërbimin e pagave, miratohet ligjet e propozuara nga qeveria

      Kuvendi i Shqipërisë ka mbyllur sot seancën e radhës penale, ku pas diskutimeve të shumta janë votuar dhe projektligjet dhe Aktet Normative që ishin në rend të ditës. Sot maxhoranca ka rrëzuar dy dekretet e Metës për ligjin e shërbimeve të pagesave dhe shtesën e kontratës së koncensionit në Porto-Romano. Nga ana tjetër deputetët kanë miratuar dy ligje të rëndësishme që është ai i policisë së burgjeve dhe për shërbimin e provës, por është marrë dhe vendimi për përfundimin e gjendjes së fatkeqësisë natyrore.

      VOTIMET E PLOTA

      Akti Normativ nr. 21, “Për disa ndryshime në aktin normativ nr. 9, datë 25.03.2020 të Këshillit të Ministrave “Për marrjen e masave të veçanta në fushën e veprimtarisë gjyqësore, gjatë kohëzgjatjes së gjendjes së epidemisë së shkaktuar nga COVID-19” miratuar me ligjin nr. 30/2020”, u miratua me 92 vota pro, 11 kundër, 9 abstenim. Akti normativ nr. 22, datë 27.05.2020 “Për shfuqizimin e aktit normativ nr. 13 datë 02.04.2020 të Këshillit të Ministrave “Për marrjen e masave të veçanta në fushën e veprimtarisë së shërbimit përmbarimor gjyqësor, ndërmjetësimit dhe administrimit të procedurave të falimentimit gjatë kohëzgjatjes së gjendjes së epidemisë së shkaktuar nga COVID-19” miratuar me ligjin nr. 34/2020”, u miratuar me 94 vota pro, 13 kundër dhe 5 abstenim.

      Me 98 vota pro, 10 kundër dhe 3 abstenim, u miratua Akti Normativ nr. 23, datë 03.06.2020 “Për një shtesë në ligjin nr. 8668, datë 23.10.2000, “Për pajisjen e shtetasve shqiptarë me pasaportë për jashtë shtetit”, të ndryshuar”. Ligji për “Për organizimin dhe funksionimin e shërbimit të provës”, u miratua me 91 vota pro, 13 kundër dhe 4 abstenim. Me 92 vota pro, 12 kundër dhe 3 abstenim u miratua projektligji “Për disa shtesa dhe ndryshime në ligjin nr. 8331, datë 21.4.1998, “Për ekzekutimin e vendimeve penale”, të ndryshuar”.

      Ligji “Për Policinë e Burgjeve” u miratua me 91 vota, po ashtu me 92 vota u miratua dhe ligji për “Për të drejtat dhe trajtimin e të dënuarve me burgim dhe të paraburgosurve”. Ndërkohë maxhoranca ka rrëzua në bllok projektligjin “Për përjashtimin nga emërimi, zgjedhja në organe drejtuese dhe të punësimit në funksione publike, shtetërore dhe politike të ish – funksionarëve, nëpunësve qe kanë ushtruar detyra drejtuese në periudhën 28.11.1944 – 08.12.1990”.

      DEKRETET QË U RRËZUAN

      U rrëzua me 89 vota kundër dekret i Presidentit të Republikës “Për kthimin e ligjit nr. 55/2020 “Për shërbimet e pagesave”, po ashtu me 85 vota kundër u rrëzua dhe dekreti “Për kthimin e ligjit nr. 58/2020 “Për miratimin e shtesës së kontratës së koncensionit të formës “BOT” (ndërtim, shfrytëzim dhe transferim) të një porti të llojit MBM në Porto-Romano Durrës”.

    • 16:03

      “Na preku të gjithëve”/ Rudina Hajdari merr fjalën, Rama largohet menjëherë nga Kuvendi: Mbajti fjalim një orë, më keq se Fidel Kastro. Ruçi e qorton: Bëre ndërhyrjen më të gabuar…

      Deputetja e Rudina Hajdari, pas fjalës së Ramës për aktakuzën kundër Hashim Thaçit dhe Kadri Veselit dhe e quajti kryeministrin si Fidel Kastro. Hajdari u shpreh se në Shqipëri duhet të flitet për krimet e komunizmit dhe të dënohen të gjitha ata që i kanë kryer. Por për këtë deklaratë të deputetes ka ndërhyrë Ruçi, duke i thënë se ka thënë gjënë e gabuar në vendin e gabuar dhe në kohën e gabuar. 

      Gramoz Ruçi dhe Rudina Hajdari

      Hajdari: Ishte fjalimi i duhur dhe na preku të gjithëve. Mbajti një fjalim për rreth një orë, më keq se Fidel Kastro. Nuk përmendet në sallë, hipokrizia. Nuk mund të flitet për Kosovën pa folur për viktimat e komunizmit.

      Kanë vdekur fëmijë e nëna. Pa pasur asnjë të dënuar në burgje. Më vjen keq që nuk i kemi gjetur ata xhelatë dhe flasim për Kosovën. Ne i kemi bërë gjëmën këtij vendi, sepse ne i kemibërë vendit tonë atë që i ka bërë Serbia-Kosovës. Mos të na vijë turp!

      RuçiBëre ndërhyrjen më të gabuar, në kohën më të gabuar. Unë jam dëshmitar i kryeministrave dhe asnjë krahasim nuk është me vend mes Kosovës dhe Shqipërisë. 

    • 14:04

      FOTOT/ Me laps në dorë mbush kuti, Tom Doshi imiton Edi Ramën, deputeti kalon kohën në parlament duke ngjyrosur 

      Deputeti i Partisë Social-Demokrate, Tom Doshi e ka gjetur mënyrën sesi të merret me kohën e lirë në Kuvend. Dosja.al vëzhgoi deputetin dhe në kohën kur opozitari Myslym Murrizi me pathos po mbronte platformën e propozuar prej tij në Kuvend, për të ndryshuar Kodin Zgjedhor, Tom Doshi me një laps në dorë, po ngjyroste një nga shkresat e Kuvendit. Ky pasion nuk është i panjohur për publikun shqiptar, pasi më herët edhe kryeministri Edi Rama ka bërë njësoj në mbledhjet e qeverisë.

      Tom Doshi ne Kuvend
    • 13:42

      I mbështetur mbi parvazin e ballkonit, djali i Fatmir Xhindit me cigare në dorë? Sherret dhe debatet në Kuvend, e bëjnë për duhan, objekti ‘misterioz’ në dorë

      Deputeti socialist, Anduel Xhindi është kapur “mat” me cigare në dorë, teksa ndiqte fjalimet në sallën e Kuvendit të Shqipërisë.

      Djali i deputetit të ndjerë të Partisë Socialiste, Fatmir Xhindit, mban në dorë një objekt që ngjason tejmase me një cigare elektrike, edhe pse në sallë është i ndaluar duhani.

      Anduel Xhindi

      I ulur lart në “ballkonin” e sallës për shkak të masave të marra për parandalimin e infektimit nga koronavirusi, Xhindi ndjek tejet i fokusuar debatin. Kamerat e fokusuan për vetëm një sekondë, ndaj vështirë të thuash nëse Xhindi po e konsumonte cigaren apo thjesht po e mbante në duar duke e përdorur si “anti-stres” teksa dëgjonte debatet që shkëmbenin kolegët e tij pak metra më poshtë. 

    • 13:32

      Gjonaj jep lajmin: Do të rritim pagat e policëve të Burgjeve, barazim me ato të Policisë së Shtetit!

      Ministrja e Drejtësisë, Etilda Gjonaj ka dhënë lajmin sot në Kuvend se shumë shpejt, pagat e punonjësve të Policisë në Burgje do të barazohen me pagat e kolegëve të tyre në Policinë e Shtetit. “Ne do të barazojmë rrogat e punonjësve të policisë në burgje me ato të Policisë së Shtetit.”,tha Gjonaj.

    • 13:20

      Majko: Këshilli Politik mori dje një vendim të jashtëzakonshëm, por duhet të zgjidhim paisjen me pasaporta

      Ministri për Diasporën, Pandeli Majko në seancën e sotme plenare vlerësoi mazhorancën dhe opozitën që arriti dje dakordësinë në Këshillin Politik për votën e emigrantëve.  Gjatë fjalës së tij në seancë, Majko u shpreh se ” Zgjedhorja” është një reformë esenciale.

      “Dje Këshilli Politik mori një vendim shumë të rëndësishëm, të cilin dua ta përshëndes, për rakordimin nga mazhoranca dhe opozita për të drejtën e votës për shtetasit tanë jashtë vendit. Është reformë esenciale. Jam shpresëplot se në Komisionin e Reformës Zgjedhore do të merren vendimmarrje pozitive, që ne t’iu japim atë të drejtë kushtetuese, që iu ka munguar prej kohësh këtyre shtetasve. E drejta e votës dhe rakordimi i djeshëm mes palëve është një lajm i jashtëzakonshëm. Por, kjo nuk duhet kthyer pastaj në sherrnajë. Unë dola për të folur për lajmin e mirë dhe jo për problemet, pasi probleme do të ketë”, u shpreh deputeti. 

      Më tej, ministri u shpreh se duhet të zgjidhet procesi i përzgjedhjes me pasaportë i emigrantëve që jetojnë jashtë vendit.

      Është një moment i rëndësishëm, shtyrja e afatit të pasaportave për personat mbi 75-vjeç është akt i rëndësishëm që prek edhe shqiptarët jashtë vendit. Kemi gati gjysmën e popullisë jashtë vendit. Kemi rastin e Kanadasë, shqiptarët shkojnë në Nju Jork për të bërë pasaportat, duhet të udhëtojnë dy herë nga cdo cep i Kanadasë në Nju Jork. Rasti i dytë është Kreta, ka 35 mijë shqiptarë që jetojnë atje, duhet të shkojnë dy herë me avion në Athinë, të japin gjurmët e gishtave dhe të presin lajmërimin për të shkuar. Ne kemi dhënë një ndihmë të madhe për personat mbi 75-vjeç, u urojmë jetë të gjatë edhe 100, por shqetësim duket të kemi shpërndarjen e këtyre dokumenteve për shqiptarët në të gjithë botën, është një problem shumë i madh.”, u shpreh ministri. 

    • 12:50

      ‘Më lër e mua të flas se 2 minuta kam unë’/ Deputeti Piciri kalon kohën duke ‘hedhur’ batuta me Ballën: Ë Taulant?

      Deputeti Erion Piciri ka mbajtur gjithashtu një fjalë të shkurtër në Kuvend, të cilën e ka nisur duke u ankuar për kohën që i është caktuar. Më pas, fjalën e tij Piciri ka shkëmbyer batuta me kreun e grupit parlamentar Taulant Balla, të cilit i kujtoi edhe vitet e universitetit në Rumani.

      Më lër dhe mua, se ato 2 minuta kam unë. Ka ardhur koha për drejtësi ë Taulant? Se ti ke studiuar edhe në Rumani. Nëse votoni propozimin tim do e kthenim këtë Parlament në një qëndër edukimi. Shqipëria do të jetë vendi i njerëzve të ndershëm dhe jo baronëve të drogës. Duhet të dëgjojmë se x ministër, kryeministër, president arrestohet. Një ndryshim i madh po i afrohet Shqipëri. Politika duhet të jetë vendi i sakrificës, pushteti fitohet dhe mbahet me nder. Politikani duhet të jetë emër me nder,”-tha ai.
    • 12:43

      REPLIKAT/ “Takohesh skutave do protagonizëm”, Murrizi e Gjoni debat në Kuvend: Ralf, mendon se të del vajzë… deputeti: Jemi në një llogore Myslym i nderuar…!

      Tensione dhe debate edhe mes opozitës së re. Deputetët janë të ndarë në disa grupe, ku një mbështet Myslym Murrizin dhe ndryshimet e Kodit Zgjedhor e pjesa tjetër nuk kanë pranuar të shprehen. Pas përplasjes mes dy deputetëve Ralf Gjoni dhe Halit Valteri, (Lexo këtu), ku u desh ndërhyrja e Myslym Murrizit, fjalën e mori ky i fundit, ku u ndal tek drejtësia e re, dhe tha se do të ishte mirë që nëse KLGj e KLP janë dakord, atëherë le të ndryshohet sërish Kushtetuta. E teksa po përfundonte fjalën, ai thumboi deputetin Ralf Gjoni, për të cilin tha se kërkon të bëhet protagonist, duke përdorur kauzën e të tjerëve.

      DEBATI NË KUVEND: 

      Myslym Murrizi: Faleminderit z.kryetar ndoqa aq sa munda raportet. Ajo që vura re ishte se secili prej tyre kishte hasur vështirësi në mirëmenaxhimin e institucioneve kolegjiale që ata drejtojnë. Doja ti drejtoja disa pyetje kryetarit të KLP. Sa anëtarë të KLP rezultojnë me të kaluar të errët nga autoriteti i dosjeve, a ka KLP dhe KLGJ gjyqtarë dhe prokurorë bashkëpunëtorë të regjimit. Po mbushet një vit nga inagurimi i Pallatit të Drejtësisë dhe ende sot, KLGJ, KLP e ILD po enden skutave me qira dhe s’po ju jepet në dorë ky pallat. Në dijeninë time, mesa shoh ju si organ keni në dorë çelësat e kashtës në dorë. Aty ka individë që luajnë për interesat e ulëta të kryetarëve të tyre që i kanë këtu. Të gjitha këto, e shumë e shumë probleme të tjera, mund t’i adresoni duke sjellë letër në Kuvend për të ndryshuar ligjin. Koha ka treguar se jo çdo gjë ishte e mirëmenduar për këtë ligj. Ralf nëse të mungon protagonizmi, merr shkresën në protokoll firmose. Po mendon se po doli djalë e merr, e po doli vajzë t’a mbajë Murrizi me shokë. S’kam ardhur këtu si trastambajtës i askujt. Në 2005, 2009 palaçot më kanë vjedhur mandatin. S’ta bën foltorja faktor tek qytetarët as takimet skutave.

      Ralf Gjoni: Dua fjalën për replikë. Myslym i nderuar, e dimë të dy që unë e ti jemi në një llogore. të lutem një sekond, s’dua që fjalët e mia të keqinterpretohen. Jam pro ndryshimeve kushtetuese, e kam firmosur edhe një vit më parë. Të kam dhënë edhe autorizimin në telefon të më përmendje emrin. Për të sqaruar se ndoshta edhe se kuptova. Unë jam totalisht pro përsakohë që kjo çon në hapjen e listave, por ama, Myslym i nderuar nuk mbështes vënien e një pragu 5% në një sistem rajonal. Nuk shkon, s’ka sens juridik. Të shohim ku do të shkojmë me Kushtetutën. Po u fut dora në Kushtetutë, futet edhe në anekse të tjera. Unë këtu e kam hallin. Jemi për hapjen e sistemit dhe të listave.

    • 12:25

      Sherri me Ralf Gjonin, Halit Valterit s’i del inati, kunja nga foltorja: Bëjuni testin e inteligjencës këtyre idiotëve! S’dinë ç’flasin…

      Deputeti Halit Valteri nuk e ka kaluar thjeshtë sherrin me kolegun e tij, Ralf Gjonit që ndodhi në sallën e Kuvendit. (Shiko këtu) Pasi përfundoi fjalën e tij në foltore, Haliti kishte edhe një kërkesë për ministren e Shëndetësisë, Ogerta Manastirliu.  Me ironi ai kërkoi që të gjithë deputetëve t’u matej inteligjenca në hyrje të sallës, ashtu siç edhe u testohej temperatura.

      Kam një kërkesë për ministren e Shëndetësisë, Ogerta Manastirliu.  Vendosët matjen e temperaturës në sallë, por bëni edhe testin e inteligjencës se ka idiotë në këtë Kuvend që nuk dinë çfarë flasin,”-tha ai. 

    • 12:22

      ZANAFILLA/ E ofendoi me fjalë të rënda, si nisi sherri mes Ralf Gjonit dhe Halit Valterit, deputeti nuk duroi dot ndërprerjen e fjalës: Se kuptoj acarimin tuaj!

      Përplasje në Kuvend mes deputetit Ralf Gjoni dhe Halit Valteri. Por si nisi sherri mes tyre? Teksa Gjoni po fliste nga foltorja, në një moment ka ndërhyrë nga vendi Valteri dhe deputeti tjetër Halil Jakimi. Gjoni nuk e ka duruar dot ndërhyrjen dhe si pasojë i ka përmendur herët që ata kanë folur në Kuvend, dhe më pas i ka kërkuar që të përfundojnë fjalën e tij.

      Gjoni: Kam të drejtën time. Halil (Jakimi) ti je nga të paktën që ke folur. Të lutem, nuk e kuptoj acarimin tuaj. Halit (Valteri) të lutem! Nuk bëhem pjesë e asnjë loje. Nuk kam hyrë në parlament prej teje. Me lejoni ta përfundoj. Nuk kam dëshirë të bëhem pjesë e asnjë pazari politik. Në emër të procedurave iu kërkoj t’i jepni drejtim. Unë mendoj që sot duhet të bërtasim mjaft me lojra. Nuk mund të ketë ndryshim të sistemit të drejtësisë nëse nuk ka reformim të sistemit politik, i cili fillon me sistemin zgjedhor.

    • 12:04

      PLAS në Kuvend, Halit Valteri përplaset me Ralf Gjonin, i skuqur del nga seanca (FOTO)

      Plas sherri brenda sallës së seancës plenare. Debate të forta janë dëgjuar nga deputetët mes dy opozitarëve të rinj, Ralf Gjoni dhe Halit Valteri. Dëshmitarë të debatit, i thanë Dosja.al, se Valteri ka fyer me sharje të rënda Ralf Gjonin, e më pas të dy janë kacafytur ulur në vend. Kaq ka mjaftuar për të ndezur debatin, teksa ka ndëhyrë menjëherë Myslym Murrizi, i cili ka nxjerrë jashtë sallës Halit Valterin.

    • 12:13

      Gjonaj në Kuvend: Ata që s'duan reformën po përpiqen ta sabotojnë, Venecia i dha të drejtë parlamentit

      Ministrja e Drejtësisë, Etilda Gjonaj ka folur në Kuvend në lidhje me Reformën në Drejtësi. Gjonaj, tha se sulmet nuk e ngadalësojnë dot procesin dhe solli në vëmendje edhe Opinionin e Venecias në lidhje me emërimet në Gjykatën Kushtetuese. Gjonaj tha se Venecia i dha të drejtë Kuvendit.

      “Ka pasur rezultate pozitive nga reforma në drejtësi, të gjitha institucionet ushtrojnë funksionet e tyre por rrezikohet nga ata që tentojnë vazhdimisht ta minojnë. Që të jetë funksionale kjo drejtësi ka ende kohë. Plotësimi i Gjykatës së Lartë dhe Kushtetuese nuk ka ecur në kohë, por kjo s’do të thotë se dështoi reforma. Ky nuk është problem i vettingut por problem i trashëguar dhe mangësi e integritetit të atyre gjykatësve të shkarkuar. Përpos sulmeve nuk është koha të ngadalësojmë procesin. Opinioni i Venecias në asnjë rast nuk i preku parimet e vendosura nga kjo reformë, i dha të drejtë Kuvendit për emërimet në GJK. Kjo nuk është një ndeshje me të fituar dhe të humbur se nëse nuk ngrihet në kohë Kushtetuesja humbasim të gjithë.”,-tha Gjonaj.

    • 12:03

      Vakancat në Kushtetuese dhe Gjykatën e Lartë, Ulsi Manja i ashpër me kryetaren e KLGJ: S’ju ndalon asgjë! Kush pengon punën…

      Kreu i Komisionit të Ligjeve, Ulsi Manja ka kritikuar në fjalën e tij në Kuvend, kryetarën e KLGJ-së, Naureda Llagami. Manja ka kërkuar me vendosmëri plotësimin e vendeve vakante në Gjykatën Kushtetuese dhe në atë të Lartë. Në fund të fjalës së tij, Manja paralajmëroi se cilido që pengonte plotësimin e vakancave do të jepte “llogari”.

      Evidentuat shqetësime, dhe me të drejtë. Është raportimi i parë që bëjnë me Kuvend si institucione. KLP dhe KLGJ kanë vetëm 1 vit jetë. A ka problematika? Sigurisht që ka, por duhen thënë edhe fjalë të mira. T’i hapim rrugë dhe të inkurajojmë, të emërohen edhe drejtuesit e prokurorive që t’i jepet fund komandimeve. KLGJ do të duhet t’i kishte shpallur 15 vakancat. Nuk ka asnjë pengesë ligjore. Ne kërkojmë që të zbatohet rigorozisht ligji. Shpallja e vendeve vakante për GJL duhet të bëhet mënjeherë. Kështu që e nderuar zonja kryetare e KLGJ, ne do të të kemi në Komisionin e Ligjeve. Ne e kemi prioritet plotësimin e vendeve vakante. Kushdo që pengon këtë detyrë në KLGJ sigurisht që të jetë pjesë e analizës në Kuvend,”-tha Manja.

    • 11:48

      REPLIKAT/ "Se lexoj dot, kush e ka shkruar", plas GALLATA në Kuvend, kryetarja e KLGJ-së nuk gjen dot deputetin "anonim", ndërhyn Ruçi: Ralf ti je? (Përgjigjet Shtjefni)

      Një incident nuk ka munguar sot gjatë raportimit të kryetares së Këshillit të Lartë Gjyqësor, Naureda Llagami. Pasi lexoi raportin për vitin 2019, Llagami iu përgjigj edhe pyetjes së një deputeti, i cili kërkonte informacion për ryshfetin në drejtësi. Llagami hezitoi për dy-tri sekonda të përgjigjej, pasi nuk kuptonte shkrimin e dorës së deputetit dhe emrin e tij. Këtu i erdhi në ndihmë Ruçi, dhe pas ndërhyrjes së tij u zbulua se shkrimi “alla-doktor”, ishte i deputetit të opozitës së re, Zef Shtjefni.

      REPLIKAT NË KUVEND:

      Naureda Llagami: Po lexoj pyetjen që më është bërë nga një deputet. Por nuk e dalloj dot kush e ka shkruar. “Gjyqet në Shqipëri po mbyllen sërish me para, çfarë keni vendosur ju të bëni dhe cili është roli juaj”?

      Gramoz Ruçi: Cili deputet e ka bërë këtë pyetje? Ralf Gjoni?

      Naureda Llagami: Jo, nuk e di, nuk e lexoj dot këtu.

      Gramoz Ruçi: Flisni, kush e ka bërë pyetjen, ti? Aaaa. e ka bërë deputeti Zef Shtjefni.

      Naureda Llagami: Dakord në rregull. Atëherë KLGj po bashkëpunon ngushësisht për këtë çështje edhe me ILD-në, (Inspektoriati i Lartë i Drejtësisë), dhe kemi marrë masat për çdo rast të evidentuar.

    • 11:42

      KLGJ gjatë 2019-ës, kryetarja Llagami raporton para Kuvendit: Kemi miratuar kuotat për magjistratët e rinj, aplikimet janë tejet të ulëta

      Kryetarja e Këshillit të Lartë Gjyqësor, Naureda Llagami ka raportuar sot para deputetëve punën e bërë për një vit nga ky institucion. Llagami tha se gjatë këtij viti, KLGJ është përballur me një sërë vështirësish. Siç tha ajo, KLGj ka hapur rrugë për emërimin e magjistratëve të rinj, hapjen e kuotave për magjistratët, e po ashtu edhe emërimin e nënkryetarëve të gjykatave për të mos bllokuar punën e gjyqësorit. Llagami u shpreh se gjykatat janë të paplotësuara dhe se dëshira për të aplikuar është tejet e ulët.

      PJESË NGA FJALA E LLAGAMIT:  

      Ky raportim përveçse detyrim ligjor është obligim moral është edhe përgjegjësi. Këshillit i janë atribuar kompetenca më të gjera. Vlerësimi i gjyqtarëve garanton një sistem të paanshëm. Përbërja me anëtarë gjyqtarë e jo gjyqtarë është një garanci më shumë për pavarësinë  e sistemit gjyqësor. Dua të sjell në vëmendje se Këshillit në këtë vit të parë, me ndihmën e ndërkombëtarëve ka miratuar 15 herë më shumë vendime, 12 akte të mirëfillta ligjore. KLG ka ngritur 4 komisione sipas ligjit. Për çështje të veçanta që duan shpejtësi, Këshilli ka ngritur 6 komisione të përkohshme Ad-Hoc të adresuara për një sërë problematikash. KLGj është me vetëdije se nuk mund të përmbushte të gjitha pritshmëritë. Më 19 korrik 2019 miratuam planin e parë strategjik ku raportuam 5 prioritetet tona për këtë vit. Plani strategjik i nënshtrohet një procesi më të plotë. Këshilli mbështet organet e ngritura. Gjatë 2019-ës janë dorëzuar pranë KPK-së 19 raporte të aftësive profesionale. Nga nisja deri tani janë dorëzuar 40 raporte të tilla. Procesi ka patur një ndikim tek gjykata e vendit. Këshilli ka aplikuar një qasje proaktive duke emëruar 25 magjistratë, miratimin e kuotave për shkollën e magjistraturës. Janë emëruar 120o gjyqtarë për çështjet në total në të gjithë Shqipërinë. Kemi transferuar 12 gjyqtarë, kemi zgjedhur nënkryetarët e gjykatave për të mos bllokuar punën. KLGj brenda një viti ka kryer një volum të madh pune, duke filtruar dhjetëra kandidatë. Në GJKKO kemi vetëm 5 gjyqtarë të përhershëm. Me qëllim plotësimin e vendeve vakante Këshilli ka hapur thirrje për 5 vende vakante në secilën gjykatë. Me mbylljen e afatit kemi parë shumë pak aplikime. Këshilli i ka kërkuar MD dhe Kuvendit ndryshimet e duhura ligjore dhe pagën shtesë për ata gjyqtarë që pranojnë të transferohen. 

    • 11:42

      Raporti vjetor i KLP, Ibrahimi: Kur Vettingu të ketë përfunduar do të kemi hedhur gurët e themelit të drejtësisë së re!

      Kreu i Këshillit të Lartë të Prokurorisë, Gent Ibrahimi ka prezantuar në Kuvend raportin vjetor të këtij organi. Ibrahimi u shpreh se KLP vendos për karrierën profesionale të prokurorëve dhe vendimet nuk mund të jenë kurrësesi arbitrare. Ibrahimi shtoi më tej, se gjithashtu po aplikohet një vetting permanent për kandidatët që futen në shkollën e Magjistraturës dhe ato që e përfundojnë. Ai gjithashtu garantoi se edhe kur Vetting-u të përfundojë, do të ketë mekanizma që do të parandalojnë bjerrjen e standarteve, të cilët janë pavarësia, integriteti dhe profesionalizmi i prokurorëve.

      Fjala e Ibrahimit

      Kushtetuta e ka mandatuar Këshillin e Lartë të Prokurorisë, që të veprojë në prapapvijë të sistemit të prokurorisë, me qëllimin për të krijuar kushtet për suksesin e këtij sistemi në goditjen penale të krimit. Suksesi në luftën penale kundër krimit është i mundur vetëm nëse prokurorët e republikës janë profesionalë të pavarur dhe me integritet. Pikërisht këto tre fjalë sintetizojnë më së miri arsyen e ekzistencës së KLP. Reforma e 2016-ës e themeloi KLP si një institucion të pavarur në nivel kushtetues me përgjegjësi ekskluzive në fushën e statusit të prokuroëve. Përgjegjësitë e Këshillit shtrihen mbi të gjithë ciklin e jetës profesionale të prokurorëve, duke filluar që nga pranimi në shkollën e magjistraturës, duke vijuar me emërimin e prokurorëve të rinj, caktimin në pozicione konkrete, transferimin, ngritjen në detyrë dhe disiplinimin e prokurorëve. Ky është cikli i plotë i jetës profesionale të një prokurori, që korrespondon edhe me setin e kompetencave të KLP. Në mënyrë të thjeshtuar mund të thoni që KLP është zyra e kuadrit e sistemit të Prokurorisë. Kemi një dallim me KLGJ i cili është administrator edhe i gjykatave. Sa i takon prokurorisë, administrimi i zyrave i është besuar prokurorit të përgjithshëm, ndërsa administrimi i karrierave i është besuar KLP. Këto vendim që kanë të bëjnë me jetën profesionale të prokurorëve janë faktor kyc në përcaktimin e pavarësisë së tyre dhe profesionalizmin të tyre dhe kurrësesi nuk mund të jenë arbitrare. Është gjithashtu në misionin e KLP që vendimet e sipërpërmendura për karrierën e prokurorëve, të jenë vendime që nuk janë kurrsesi arbitrare, por të bazohen në vlerësimin e meritave profesionale të prokurorëve dhe në rezultat e verifikimit të figurës dhe integritetit të tyre. Për sa kohë vendimet tona bazohen në këto vendime, ne dhe shoqëria do të kenë nivelin e duhur të profesionalizimit dhe integritetit.
      Ky set kompetencash në të kaluarën ushtrohej nga një njeri i vetëm pa një prcedurë të detajuar dhe pa transparencë. Ky set kompetencash i është veshur këshillit pasi është një organ i zgjedhur në mënyrë profesionale, meritokratike dhe të depolitizuar dhe ka një përbërje me 6 prokurorë nga njëra anë dhe 5 jo prokurorë nga ana tjetër. Një përbërje që mundëson balancimin e interesave të prokurorëve me të shoqërisë. Këshilli vepron në kushtet e një transprence të plotë. Axhendat bëhen publike përpara ditës së mbledhjes. Gjithcka që thuhet në mbledhje hidhet online. Kjo është një formulë që mundëson realizimin e disa qëllimeve. Nga njëra anë vetë prokurëorët përfshihen në mënyrë të efektshme, në vetqeverisjen e sistemin ku shërbejnë gjatë gjithë jetës së tyre profesionale. Nga ana tjetër kuvendi përmes përfaqësuesve të tij në KLP, bashkëqeveris sistemin e prokurorisë krah prokurorëve për interes të shoqërisë. Një nga meritat është edhe depolitizimi i anëtarëve si unë, falë një procesi të depolitizuar dhe kjo bën që njerëz si unë të mos mbajë vulën e politikës, pavarësisht se vendimi final merret nga ju.
      Gjatë 2019-ës veprimtaria jonë është shenjuar nga themelmii i SPAK dhe zgjedhja e prokurorit të përgjithshëm. Ne jemi krenar për arritjet, por duam të theksojmë se veprimtaria e KLP ka qenë më e thellë. Do të vecojë faktin se gjatë vitit që shkoi kemi themeluar një sistem të vettingut permanent të prokurorëve. Është ky një togfjalësh që kam merak ta popullarizoj. Në kuadër të kësaj procedure ne korrespondojmë me 45 institucione dhe zyra të ndryshme, përfshi ILDKP, tatimet, doganat, shërbimet e inteligjencës e shumë te tjera, për të verifikuar pasurinë e prokurorëve në faza të ndryshme. Krahas vettingut të jashtëzakonshëm e të përkoshëm që po zbatohet aktualisht nga institucionet e vettingut, që po zbatohet akutualisht në përgjigje të degradimit të standarteve të integriteteit dhe profesionalizmit në drejtësi. Ne japim një garanci se edhe kur ky vetting të përfundojë, sistemi do të ketë mekanizma për të parandaluar bjerrjen e standarteve në të ardhmen. Sistemi i vettingut permanent zbatohet mbi kandidatët për prokurorë që hyjnë në shkollën e magjistraturës dhe përfundojnë shkollën e magjistraturës. Ky sistemi i vettingut permanent, së bashku me sistemin disiplinor do të hedhë gurët e themelit për integritetin në sistemin e prokurorisë. Shpjegimi pse sistemi disiplinor nuk është aktivizuar, lidhet me ndërhyrjet e Gjykatës Kushtetuese dhe shfuqizim e dispozitave në statusin e magjistratëve, si dhe deri në fund të 2019 nuk kishim ende në funksion Inspektorin e Lartë të Drejtësisë, që ka për detyrë të hetojë shkeljet disiplinore dhe më pas ne i gjykojmë. Gjatë vitit që shkoi KLP ka ndihmuar në vlerësimin e njërit prej komponentëve të vettingut, që është vlerësimi i aftësive profesionale, të cilin e kemi trashëguar nga prokurori i përgjithshëm. Gjatë 2019 kemi mirutuar 44 raporte vlerësimi për prokurorët. Po kështu gjatë këtij viti kemi hartuar rregullat për individualizimin e rezultateve profesionale të prokurorëve dhe përdorimin e tyre si bazë ekskluzive mbi të gjitha vendimet e këshillit për karrierën e prokurorëve. Në vitin 2019 kemi adresuar siatuata emergjente të krijuara nga procesi i vettingut , ku titullarët e zyrave të prokurorisë janë lareguar nga detyra, kemi përdorur një instrument që na jep ligji që është caktimi i përkohshëm. Brenda 2020 do të kryejmë të gjitha procedurat e ngritjes në detyrë për drejtuesit e prokurorive dhe më tej në nivele më të larta të sistemit. Kemi pasur rast të përdorim edhe kompetencat tona në lidhje me mbrojtjen e pavarësisë së prokurorëve, të cilat ne i kemi ushtruar në formën e deklaratave publike në mbrojtje të prokurorëve të republikës kur ata sipas gjykimit tonë, janë bërë subjekt i sulmeve politike dhe jo politike .

    • 11:33

      Asnjë pyetje për kreun e KLP-së! Ralf Gjoni ngre dorën nga vendi, Ruçi i mohon pyetjet: Bëji me shkrim, s'mund të improvizoj! Ndërhyn Murrizi: Do të kërkoja llogari!

      TIRANË– Deputetë në Kuvend kanë kërkuar që t’i drejtojnë pyetje kreut të KLP-së, Gent Ibrahimit, por nuk janë lejuar nga kryeparlamentari Gramoz Ruçi. I pari që ka reaguar ka qënë debuteti Ralf Gjoni, i cili ka theksuar të drejtën e tij për pyetje.

      Ndërsa Ruçi i ka kujtuar mbledhjen e shkuar, duke shpjeguar edhe arsyet se përse kërkon pyetje me shkrim për të drejtuar seancën, e cila sipas tij zhvillohej në kushte të jashtëzakonshme. Pikërisht në këtë pikë ka ndërhyrë edhe deputeti Muyslim Murrizi, i cili i ka kujtuar se gjendja e jashtëzakonshme ka mbaruar dhe kërkonte që Kuvendi të rikthehej në normalitet. Shqetësimit të Murrizit, Ruçi ka premtuar që do t’u japë përgjigje në mbledhjen e ardhshme.

      PJESË NGA DEBATI:

      Ruçi: Çfarë ka që ngrini duart? Pyetjet bëjini me shkrim. Nuk është kërkuar debat.

      Ralf Gjoni: Neni thotë që titullari paraqet raporti, nuk thotë që pyetjet duhen parashtruar me shkrim, apo me ëhatsapp. Deputetët e nderuar kanë të drejtë të bëjnë pyetje dhe të marrin përgjigjie. 

      Ruçi: Po të ishim në kushte normale po. Kemi një vendim të marrë nga Konferenca e Kryetarëve. Ndaj javën e shkuar që unë s’isha, seanca zgjati nga 3 në 6 orë. Prandaj pyetjet duhen me shkrim se kryetari nuk mund të improvizojë. 

      Myslym Murrizi: Po, por gjendja e jashtëzakonshme ka mbaruar, prandaj do të doja që Kuvendi të kthehej në normalitet, dhe deputetët të marrin kohën që iu duhet për të diskutuar në lidhje me titullarët e institucioneve. Po të kishte kohë, do të kërkoja llogari edhe për KLP-në. Mblidhni konferencën e kryetarëve të vendoset normaliteti. Këtu e kishim paqenë, gjysma e sallës nuk fliste. 

      Gramoz Ruçi: Ka përfunduar gjendja e jashtëzakonshme, por jo efektet. Do e diskutojmë shqetësimin tuaj në mbledhjen e ardhshme të KLGJ.

    • 11:25

      DEBATET/ Opozita kritika “lumë” ndaj socialistëve: Papa u vendos ultimatum për Kosovën, Valteri u rikujton orarin: Na hiqni fjalën për 1 minutë më shumë! Mos të ndodhë më! Ruçi e mbështet: Edhe unë ashtu u thashë!

      Halit Valteri, Gramoz Ruçi dhe Kristaq Papa

      Seanca e sotme plenare në Kuvendin e Shqipërisë ka nisur me kritika ndaj socialistëve. Fillimisht fjalën e ka marrë deputeti Kostaq Papa, i cili është shprehur i indinjuar lidhur me zhvillimet e fundit në Kosovë, ku presidenti Hashim Thaçi dhe ish-kryeparlamentari Kadri Veseli, akuzohen për vrasje nga Gjykata Speciale.

      Në fjalën e tij, ai kërkoi reagim nga qeveria shqiptare dhe takim me homologët nga Kosova duke lënë edhe një afat për takimin.

      “Kërkojmë mbledhje deri në 1 korrik që të zhvillohet në qytetin historik në Prizren për t’u dalë në krah,”-u shpreh ai.

      Por ndërhyrja e tij u kritikua nga kryeparlamentari Gramoz Ruçi: Zoti deputet, e di mirë se ç’do të thotë procedura?

      Por nuk u ndaluan këtu… Pas Papës, deputeti Halit Valteri ka shprehur indinjatën e tij lidhur me shtyjen me një orë fillimin e seancës plenarë pasi PS zhvilloi një takimin në seli për emrin e kreut të KLSH-së.

      “Është e paprecedentë, por ky është parlamenti dhe jo selia e PS. Nëse nuk kanë kohë që të mblidheni, takohuni dy orë para. Për një minutë në foltore ia hiqni fjalën çdo kujt. Të vonoheni se po diskutoni pazarin e radhës me Ilir Metën, nuk e di… Në emër të grupit mos të përsëriten më këto situata,”– tha Valteri.

      Ndryshe nga rasti i Papës, Ruçi ka rënë dakord me deputetin duke u shpreh se edhe vetë ai u kishte bërë të njëjtën kritikë kolegëve të tij.

      “Edhe unë thashë të njëjtën gjë. Nuk do të përsëritet,”-theksoi Ruçi.

    • 11:20

      “U dhunua parlamenti se PS-ja kishte mbledhje”/ Halit Valteri: Bënë pazarin me Metën. Ndërhyn Ruçi: Nuk do të ndodhë më

      Nis seanca e Kuvendit. Në fillim të kësaj seance deputeti Halit Valteri deklaroi se seanca e sotme u dhunua, pasi për shkak të mbledhjes së PS-së nisi me një orë vonesë. Kryetari i Kuvendit, Gramoz Ruçi i shpreh se Haliti ka të drejtë dhe se kjo gjë nuk do të ndodhë më.

      Biseda: 

      Halit Valteri– Këta burra nuk kanë kohë që të mblidhen më parë, por sot për për pazarin me Metën, për t’i dhënë KLSH-në. U dhunua një orë ky parlament se ka mbledhje PS-ja.

      Gramoz Ruçi– Lidhur me vërejtjen tuaj, është e drejtë ajo që thatë.  Nuk do të ndodhë më, Nuk do të përsëritet më.

    • 11:01

      16 çështjet me rëndësi, rendi i ditës në seancën e 25 qershorit 2020

      1. Miratimi i procesverbalit të seancës plenare të datës 18.06.2020.

      2. Njoftimi i çështjeve të depozituara në Kuvend për shqyrtim.

      3. Raporti vjetor i Këshillit të Lartë të Prokurorisë për vitin 2019.

      4. Raporti vjetor i Këshillit të Lartë Gjyqësor mbi gjendjen e sistemit gjyqësor dhe veprimtarinë për vitin 2019.

      5. Raporti vjetor i Entit Rregullator të Energjisë për vitin 2019.

      6. Akti Normativ nr. 21, datë 27.05.2020 “Për disa ndryshime në aktin normativ nr. 9, datë 25.03.2020 të Këshillit të Ministrave “Për marrjen e masave të veçanta në fushën e veprimtarisë gjyqësore, gjatë kohëzgjatjes së gjendjes së epidemisë së shkaktuar nga COVID-19” miratuar me ligjin nr. 30/2020”.

      7.Akti normativ nr. 22, datë 27.05.2020 “Për shfuqizimin e aktit normativ nr. 13 datë 02.04.2020 të Këshillit të Ministrave “Për marrjen e masave të veçanta në fushën e veprimtarisë së shërbimit përmbarimor gjyqësor, ndërmjetësimit dhe administrimit të procedurave të falimentimit gjatë kohëzgjatjes

      8. Akti Normativ nr. 23, datë 03.06.2020 “Për një shtesë në ligjin nr. 8668, datë 23.10.2000, “Për pajisjen e shtetasve shqiptarë me pasaportë për jashtë shtetit”, të ndryshuar””.

      9. Projektligji “Për organizimin dhe funksionimin e shërbimit të provës”.

      10. Projektligji “Për disa shtesa dhe ndryshime në ligjin nr. 8331, datë 21.4.1998, “Për ekzekutimin e vendimeve penale”, të ndryshuar””.

      11. Projektligji “Për Policinë e Burgjeve”.

      12. Projektligji “Për të drejtat dhe trajtimin e të dënuarve me burgim dhe të paraburgosurve”.

      13. Projektligji “Për përjashtimin nga emërimi, zgjedhja në organe drejtuese dhe të punësimit në funksione publike, shtetërore dhe politike të ish – funksionarëve, nëpunësve qe kanë ushtruar detyra drejtuese në periudhën 28.11.1944 – 08.12.1990”.

      14. Dekret i Presidentit të Republikës nr. 11.493, datë 01.06.2020 “Për kthimin e ligjit nr. 55/2020 “Për shërbimet e pagesave”.

      15. Dekret i Presidentit të Republikës nr. 11.486, datë 22.05.2020 “Për kthimin e ligjit nr. 58/2020 “Për miratimin e shtesës së kontratës së koncensionit të formës “BOT” (ndërtim, shfrytëzim dhe transferim) të një porti të llojit MBM në Porto-Romano Durrës, miratuar me ligjin nr. 104/2015 ndërmjet ministrisë së Infrastrukturës dhe Energjisë dhe shoqërisë koncensionare “Porti MBM (Multy Buoy Mooring)” të ndryshuar””.

      16. Projektvendim “Për ngritjen e nënkomisionit për monitorimin e zbatimit të buxhetit të shtetit dhe kontrollin e tij, në përbërje të komisionit të përhershëm parlamentar për Ekonominë dhe Financat”.

    Shto Koment