Aktualitet

Goditet grupi ndërkombëtar i trafikut të drogës, 4 të penduar ‘zbërthejnë’ emrat, SPAK lëshon 38 urdhër-arreste, mes tyre ish-prokurori Maksim Sota dhe 2 ish-shoqëruesit e Saimir Tahirit, ‘kokat’ ishin dy familjet mafioze në Kavajë dhe Vlorë

  • Çuçi: Proces vetë-pastrimi, kush se meriton të jetë në radhët e shtetit, të përgjigjet para ligjit
  • U hodh nga kati i dytë për t’i shpëtuar policisë, pamjet e shoqërimit në komisariat të Festim Lelajt
  • PAMJET e operacionit ‘Shpirti’/ ‘Mos u shqetësoni, për…’, Policia i shkon në banesë për kontroll
  • VOA: Goditen 4 grupe të fuqishme narkotrafiku, në pranga një prokuror e zyrtarë policie
  • Kush është prokurori Maksim Sota që e prangosi “Shpirti”
  • Yuri Kim: Koha e pandëshkueshmërisë po mbaron!
  • “Makina, rrushi, shezllone”/ Zbardhet KODET, si emërtonin drogën dhe paratë
  • SPAK në bashkëpunim me Eurojust, DIA, Anti-mafia italiane dhe Policia Shqiptare kanë finalizuar operacionin "Shpirti". SPAK ka lëshuar 38 urdhër-arreste, 10 prej tyre të ekzekutuara më herët në operacionin 'Kulmi'. Arestohet ish-prokurori Maksim Sota dhe Ilirjan Balla, ish-shefi i Trafiqeve. Në pranga edhe ish-oficeri Festim Lelaj. Pjesë e grupit edhe dy ish-shoqëruesit e Saimir Tahirit kur ishte Ministër, Paul Deda dhe Hekuran Marku. 
    Featured image of article: Goditet grupi ndërkombëtar i trafikut të drogës, 4 të penduar ‘zbërthejnë’ emrat, SPAK lëshon 38 urdhër-arreste, mes tyre ish-prokurori Maksim Sota dhe 2 ish-shoqëruesit e Saimir Tahirit, ‘kokat’ ishin dy familjet mafioze në Kavajë dhe Vlorë Operacioni Shpirti
    Përditësuar:

    TIRANË- Ka qenë dëshmia e 4 të penduarve të drejtësisë që kanë pranuar të bashkëpunojnë me prokurorinë duke rrëfyer për trafikun e drogës nga Shqipëria drejt Italisë. 4 të penduarit kanë dhënë informacione tejet të vyera për operacionin e koduar “Shpirti” që ka zgjatur më shumë se 3 vite. SPAK, në bashkëpunim me Antimafian italiane, Eurojust dhe DIA, kanë arritur të dokumentojnë aktivitetin kriminal të 4 grupeve që trafikonin drogë nga Shqipëria drejt Italisë dhe Spanjës. janë 38 urdhër-arreste të prera nga SPAK, 10 prej tyre të prera më herët në operacionin “Kulmi”. Arrestimet janë bërë në Shqipëri, Itali, Mali i Zi dhe Spanjë.

    Kush janë të arrestuarit? Prangat kanë arritur të shtrihen më sipër se zakonisht. Prokuroria njoftoi në përfundim të operacionit bashkë me partnerët ndërkombëtarë se janë arrestuar disa ish-zyrtarë.

    Zyrtarët e arrestuar deri më tani

    Maksim Sota, ish-prokuror në Vlorë i larguar nga Vettingu

    Saimir Kurti, drejtor i Zyrës së Punës në Kavajë

    Ilirjan Balla, ish-shefi i sektorit kundër trafiqeve në Policinë e Shtetit

    Festim Lelaj, ish-oficer policie në Fier, i proceduar më parë  për trafik narkotikësh

    Në arrati: Hekuran Marku dhe Paul Agustin Deda, ish-shoqërues të Saimir Tahirit në vitin 2016, kur ishte ministër i Brendshëm.

    Ndërsa në total,  28 personat për të cilët është prerë fletë-arresti janë:

    Aleks Memaj
    Jovan Memaj
    Aleksandër Neço
    Shkëlzen Kamberi
    Benard Tahiraj
    Mereglen Çaçi
    Erind Hysomenaj
    Klajdi Ademi
    Toni Kushi
    Erion Hoxhara
    Çezar Gjomemo
    Sajmir Kurti
    Malton Lleshi
    Shkëlzen Daci
    Eltion Bregasi
    Paul (Agustin) Deda
    Hekuran Marku
    Hamid Seferi
    Leonidha Sejdiaj
    Ilir Gaba
    Geri Zylyftari
    Erlind Zylyfttari
    Artan Zylyftari
    Festim Lela

    Për më shumë bëhu pjesë e grupit më viral në Facebook, Dosja.al

    Arrest Shtëpie

    Luan Zylyftari
    Artur Krasniqi
    Ilirjan Balla
    Maksim Sota.

    Por pse akuzohen ata?

    Zyrtarët akuzohen se në disa raste kanë qenë edhe pronarë të drogës dhe se kanë garantuar në rrugë tokësore dhe detare që trafiku i drogës drejt Puglias të kryhej me sukses.

    Çfarë është sekuestruar? Gjatë operacionit, autoritetet kanë sekuestruar rreth 6 (gjashtë) tonelata lëndë narkotike të tipit marijuanë, kokainë e hashash, me një vlerë në treg prej 55 milionë euro. Disa pasuri të paluajtshme janë sekuestruar në Tepelenë, Vlorë, Kavajë, Lazarat dhe Tiranë, qytete ku u shtri operacioni.

    Maksim Sota dhe Agustin Deda mohojnë përfshirjen në trafikun e drogës:

    Vetë prokurori Maksim Sota ka mohuar përfshirjen e tij në trafikun e drogës. Pak orë pas raportimeve të lajmeve në media, Sota ka thyer heshtjen dhe ka folur për gaztaren e Top Channel, Anila Hoxha. Prokurori ka deklaruar se nëse gjendet qoftë dhe një provë të vetme që ai ka pasur lidhje me këta persona të arrestuar, do pranojë të shkojë në burg dhe jo të qëndrojë në ‘arrest shtëpie’. Sota ka shtuar gjithashtu se këto lajme i kanë shkaktuar shumë dhimbje në familje.

    Edhe Agustin Deda, një nga ish-truprojat e ish-ministrit Saimir Tahiri, emri i të cilit doli në operacionin e zhvilluar sot me kodin ‘Shpirti”, ka mohuar të ketë lidhje me drogën. Disa orë pasi u pre fletë-arresti në emrin e tij, në një intervistë me gazetaren Klodiana Lala për Balkanweb, Deda që njihet dhe me emrin Paul është shprehur se si ndodhet jashtë shtetit ku po punon në ndërtim për të siguruar para për familjen e tij, pasi siç shprehet, është edhe baba i një djali.

    Akuzat që ka trafikuar hashash në bashkëpunim me Eltjon Bregun, Deda i mohon totalisht dhe shton se personi në fjalë është një mashtrues që ka përfituar nga emrat e shumë personave. Deda tregon më tej se ka punuar për tre vite rresht me Tahirin dhe se është shkatërruar komplet kur ish-ministri është akuzuar gjithashtu. Ai shton se pas këtyre akuzave ka vendosur të tërhiqet e të shkojë jashtë vendit, për të punuar. Gjithsesi, i akuzuari shprehet se do të vijë në Shqipëri për të sqaruar pozicionin e tij.

    (f.g;k.m;a.b/dosja.al)

    • 22:41

      “Makina, rrushi, shezllone”/ Zbardhet KODET, si emërtonin drogën dhe paratë anëtarët e grupeve që shkatërroi “Shpirti”, borxhlinjve ua merrnin paratë dhe me forcë e përmes kërcënimeve

      Foto ilustruese

      Makina, rrushi, motori, punëtor, shishe birre, shishe uji, bluza ose gjysmë bluza, shezllone, persona, skeleri, birra, shezllone, skeleri e shumë terma të tjera janë përdorur për të emërtuar lëndën narkotike nga anëtarët e grupeve kriminale që u shkatërruar sot në kuadër të operacionit ‘Shpirti”. OraNews shkruan se në dosjen prej 565 faqe të prokurorisë Italiane, gjenden edhe bisedat e koduara për transfertat e parave dhe dërgesat e drogës .

      Për paratë përdorej termi “dokumente”, ose edhe në mënyrë të qartë për herët s’kishte nevojë për dekodifikim si “duhet të sjellin paratë”, “më thuaj sa para janë”. Për sa i përket sasisë së dërgesave dhe ato ishin lehtësisht të zbulueshme: “pesëdhjetë gramë”, “100 gramë”, “dhjetë skela”, “sa punëtorë do? Dy, tre?”, “dhjetë shishe ujë”, “20 shezllone”, “10 mijë”, “20 birra”. 

      Organizata e parë përfaqësohej nga një qytetar i vetëm shqiptar, rreth të cilit sillen shtetas nga Bari, që përbëjnë një grup stabël, e shumë persona të tjerë që bëjnë biseda për drogën. Dosja përmban dhe fakte se të hetuarit kanë përdorur edhe kërcënimet e forcë fizike për të detyruar persona që u kishin para, që tua kthenin ato. Në përgjimet telefonike nënvizohet edhe kapaciteti i organizatave që të arratisë anëtarët e saj nga arresti shtëpiak, duke u gjetur dokumente false e mbështetje logjistike nëpërmjet një rrjeti kapilar ndërmjet Italisë dhe Shqipërisë.

    • 22:14

      “Jam Agustin Deda”/ Telefonata e ish-truprojës së Tahirit ‘shtang’ gazetaren, Klodiana Lala: Polici e paaftë, e vuri në pranga gjithë ditën. Ard Veliu hiq kapellen

      Klodiana Lala

      Gazetarja Klodiana Lala ka treguar se është habitur pasditen e sotme kur telefonit të saj i ka rënë ish-truproja i ish-ministrit Saimir Tahiri, Paul Agustin Deda, të cilit i doli emri sot në operacionin “Shpirti”. Në një status në Facebook, Lala shkruan se e kishte pyetur Dedën për ditëlindjen, emrin e nënës e të babait pasi policia e kishte deklaruar të arrestuar. Gazetarja shton më tej se policia jonë ose është e paaftë, ose fsheh ndonjë gjë më të madhe, por nuk harron të kërkojë që kreu i Policisë së Shtetit, Ardi Veliu, të heqë kapelën. Edhe Hekuran Marku, ish-kolegu i Dedës, është gjithashtu në arrati, informon Klodiana Lala.

      “Paul Agustin Deda ish-shoqerues i Saimir Tahirit me telefonoi nga arratia. U habita me thene te drejten. E pyeta per ditelindjen, emrin e babait, te nenes, rrugen ku banonte, etj. U binda qe ishte ai. Kundershtoi akuzat; e drejte e tij. Cdo i dyshuar i mohon. Detyre e SPAK tja provoje. Policia e Shtetit e coi ne pranga tere diten. Tani, keta o jane te paafte ose po perpiqen te fshehin ndonje gje te madhe shume. E dyta here qe policia kapet ne flagrance duke genjyer. Njehere per ngjarjen e tmerrshme te Elbasanit, e diten e sotme. Ard Veliu hiq kapelen! ps.as Hekuran Marku nje tjeter ish-pjesetar i grupit te shoqerimit te ish-ministrit te Brendshem eshte ne arrati…”- shkruan Lala.

    • 21:01

      Iu pre fletë-arresti në operacionin “Shpirti”, flet një nga ish-truprojat e Tahirit: Po punoj në ndërtim, s’kam lidhje me drogën, por do vij të sqaroj gjihçka…jam shkatërruar kur u akuzua ish-ministri

      Agustin Deda

      Agustin Deda, një nga ish-truprojat e ish-ministrit Saimir Tahiri, emri i të cilit doli në operacionin e zhvilluar sot me kodin ‘Shpirti”, ka mohuar të ketë lidhje me drogën. Disa orë pasi u pre fletë-arresti në emrin e tij, në një intervistë me gazetaren Klodiana Lala për Balkanweb, Deda që njihet dhe me emrin Paul është shprehur se si ndodhet jashtë shtetit ku po punon në ndërtim për të siguruar para për familjen e tij, pasi siç shprehet, është edhe baba i një djali.

      Akuzat që ka trafikuar hashash në bashkëpunim me Eltjon Bregun, Deda i mohon totalisht dhe shton se personi në fjalë është një mashtrues që ka përfituar nga emrat e shumë personave. Deda tregon më tej se ka punuar për tre vite rresht me Tahirin dhe se është shkatërruar komplet kur ish-ministri është akuzuar gjithashtu. Ai shton se pas këtyre akuzave ka vendosur të tërhiqet e të shkojë jashtë vendit, për të punuar. Gjithsesi, i akuzuari shprehet se do të vijë në Shqipëri për të sqaruar pozicionin e tij.

      INTERVISTA:
      Klodiana Lala: Sa vite keni punuar me Saimir Tahirin?
      Agustin Deda Kam qenë pjesë e grupit të shoqërimit të Saimir Tahirit për 3 vite e gjysmë, bashkë me Hekuran Markun, të cilin e kam mik.

      Klodiana Lala: A e njihni shtetasin Eltjon Bregu, për të cilin SPAK thotë se ju keni bashkëpunuar për trafikimin e mbi 1 mijë kg hashash?
      Agustin Deda Eltjon Bregun e njoh si mashtruesin më të madh në Shqipëri, i cili ka përfituar jo vetëm në emrin tim, por edhe të shumë personave të tjerë. Kemi punuar me të në Kombinat. Unë nuk kam e shok dhe nuk kam pasur lidhje direkte me të, por di që më herët ka qenë në burg.

      Klodiana Lala: Po me shtetasit Ferhat Ajdini dhe Seferi a keni pasur njohje dhe kontakte, pasi ato janë dy skafistët që kanë dëshmuar kundër jush?
      Agustin Deda Nuk i njoh dhe as nuk e kam idenë kush janë ata. Ju takon atyre të sqarojnë pozicionin tim dhe të vërtetën. Nuk kam bërë asgjë dhe nuk jam përfshirë në aktivitet kriminal. U tërhoqa nga puna, për shkak të sulmeve që nisën ndaj meje. Unë jam demoralizuar edhe kur u akuzua Tahiri, u shkatërrova. Jam duke punuar në ndërtim jashtë vendit për të siguruar të ardhura për familjen time, pasi jam baba i një djali.

      Klodiana Lala: Si i cilësoni akuzat?
      Agustin Deda Janë akuza të pabaza. Jam i pastër dhe nuk kam bashkëpunuar kurrë me askënd për të trafikuar drogë. Na bënë neve më të fortë se Edi Rama dhe këto janë sulmet për të rënduar pozitën e Saimir Tahirit. Duke përmendur emrat tonë, po shmangin vëmendjen nga zyrtarë policie apo persona të tjerë të përfshirë në veprimtari kriminale.

      Klodiana Lala: A do t’i dorëzoheni drejtësisë?
      Agustin Deda Do të dorëzohem të sqaroj pozicionin tim, sepse nuk kam asgjë për të fshehur dhe nuk kam frikë nga askush. Dua të jetoj i lirë në Shqipëri, ku kam kontribuar.

    • 20:01

      Operacioni ‘Shpirti’, Zagani: Nuk suprizohem për dy truprojat kur Tahirin e bëri ministër Shullazi, kolegët ia mban në poste krimi i organizuar. Festim Lelin e kam pasur në letër si trafikant

      Dritan Zagani

      Ish-shefi i antidrogës në Fier, Dritan Zagani ka komentuar operacionin “Shpirti që vuri në pranga 38 persona për trafik të lëndëve narkotike, mes tyre dhe funksionarë publikë. Në një lidhje me Skype në FaxNews, Zagani tha se nuk është habitur nga asnjë emër që ka lexuar sot, pasi i ka ditur edhe më herët. Për dy ish-truprojat e ish-ministrit të Brendshëm Saimir Tahiri, Zagani tha se nuk kishte si të surprizohej, kur vetë Tahirin, sipas tij, e ka bërë ministër Emiljano Shullazi. Zagani i shtoi edhe më tej akuzat, kur tha se edhe kolegët e Tahirit sot, por i mban në poste krimi i organizuar, pasi e përjashtuar ministrin sepse u doli ‘dru i shtrembër’. Për  ish-oficerin e policisë së Vlorës, Festim Leli, Zagani tha se emrin e tij e ka pasur të shënuar në letër si trafikant, por pavarësisht kësaj, ai i zuri vendin, sapo Tahiri erdhi në pushtet.

      “Nuk u çudita shumë nga lista e emrave që pashë sot. Shumë operacioneve u është shitur informacioni dhe nuk janë realizuar. Të gjithë e dinë se sa ndikim ka Saimir Tahiri. Implikimi i Tahirit në fushën e trafikur të drogës ka gjashtë vite, nuk është se nuk e dimë. Një nga emrat unë e kisha në listën time të informacionit që kur isha në detyrë. Me prokurorin Sota në fakt kemi punuar dhe nuk është se kam pasur ndonjë dyshim, por nuk preferoj të shprehem përpara institucioneve. Nuk më surprizon asnjë emër. Nuk kemi pse surprizohemi që u kapën dy truproja e Saimir Tahirit, kur atë e bëri ministër Emiljano Shullazi. Çfarë mund të presim tjetër kur të bën ministër krimi i organizuar. Dhe po mban sot kolegët e Tahirit, pasi ky doli dru i shtrembër. Ky operacion është realizuar nga ndërkombëtar dhe shteti ynë e ka bërë detyrën mirë sepse nuk është e lehtë që të shkosh e të kapësh një prokuror apo koelgun që ke tek zyra ngjitur. Ka prapë presione dhe vështirësi, por Antimafia italiane të detyron. Nëse lihet në kuadër të reklamës, u bë kjo dhe o burra të lëmë pesë të tjera, nuk shkon. Ndërsa grupin e Saimir Tahirit e kemi ditur të gjithë, të gjithë e denim se kush e shoqëronte, nuk kemi pse të shtiremi. Lelin e kam pas kontigjent në letër, si trafikant. me ardhjen e Tahirit në pushtet, vajti mori vendin tim. Mos ishte gjë koinçidencë kjo? Jo, u duhej kushërinjve, trafikantëve kjo gjë,”- tha Zagani ndër të tjera.

    • 18:13

      Publikohen FOTOT! Këta janë Agustin Deda dhe Hekuran Marku që prangosi “Shpirti”, Anila Hoxha: Trafikuan më shumë se 1 ton hashash, do ua dorëzonin katër italianëve

      Personat që po shikoni në foto janë Agustin Deda dhe Hekuran Marku, dy ish-shoqërues të ish-ministrit të Brendshëm, Saimir Tahiri, të cilët sot u vunë në pranga në kuadër të operacionit “Shpirti”. Fotot janë publikuar nga Top-Channel. Gazetarja Anila Hoxha raporton se Agustin Deda dhe Hekuran Marku në bashkëpunim me katër shtetas italianë dhe një shqiptar të quajtur Eltjon Bregu trafikuan në rrugë detare nga Shqipëria drejt Italisë ngarkesën me 1016 kilogramë kanabis, e cila u është sekuestruar shtetasve Fiqiret Seferi dhe Ferhat Ajdini. Këta dy të fundit janë arrestuar në Bari. Në këtë dosje, sipas Hoxhës, dy ish-truprojat e Tahirit dyshohet se kultivuan drogë me Bregun dhe tentuan ta trafikonin për tua dorëzuar katër italianëve.

    • 16:38

      E prangosi operacioni “Shpirti”, thyen heshtjen prokurori Maksim Sota: Trillime, më shkaktuan dhimbje në familje. Më gjeni një provë të vetme dhe do shkoj në burg

      Maksim Sota

      Prokurori Maksim Sota i cili u vu në pranga në kuadër të operacionit “Shpirti, por është lënë në masën e sigurisë “arrest shtëpie”, ka mohuar përfshirjen e tij në trafikun e drogës. Pak orë pas raportimeve të lajmeve në media, Sota ka thyer heshtjen dhe ka folur për gaztaren e Top Channel, Anila Hoxha. Prokurori ka deklaruar se nëse gjendet qoftë dhe një provë të vetme që ai ka pasur lidhje me këta persona të arrestuar, do pranojë të shkojë në burg dhe jo të qëndrojë në ‘arrest shtëpie’. Sota ka shtuar gjithashtu se këto lajme i kanë shkaktuar shumë dhimbje në familje.

      “Më bën nder, në qoftë se mundesh me sqaron pak edhe këta kolegët e t’u që dalin në intervista dhe të fiksojnë një gjë, e thënë nga unë, në qoftë se ka një provë të vetme që kam ndihmuar këta persona, do pranoj të shkoj në burg me ta dhe jo në arrest shtëpie. Në qoftë se ka një çështje të vetme që unë kam patur lidhje me këta persona, do kërkoj të shkoj në burg me ata. Të gjithë të tjerat janë fjalë dhe trillime për të cilat më dhemb vetëm gjendja që më shkaktuan në familje,”- mësohet të ketë thënë Sota.

    • 15:47

      Bashkëpunuan me drejtësinë, zbardhen emrat e dy ‘tradhtarëve’ që çuan shokët pas hekurave, vlonjati Aurel Lazaj s’e kishte për herë të parë (Historia me 2.5 ton hashash që u kap në Ancona)

      Aurel Lazaj, foto nga seanca gjyqësore, në vitin 2017

      Aurel Lazaj dhe Jurdi Bedinaj janë dy ‘tradhtarët’ që bashkëpunuan me policinë për të bërë të mundur arrestimin e 38 personave në kuadër të operacionit “Shpirti” që u zhvillua ditën e sotme. Mësohet se Lazaj është futur në vitin 2019 në grup dhe që nga ajo kohë ai rapotontr për policinë çdo lëvizje të tyre.

      Por, bashkëpunimin me drejtësinë, vlonjati, nuk e kishte për herë të parë. Në vitin 2017, Lazaj u kap me 2.5 tonë hashash në Ancona të Italisë. Pas arrestimit ai bashkëpunoi me drejtësinë dhe tregoi në sallën e gjyqit se që prej viti 2011, vepronte për llogari të ish-oficerit të policisë Festim Lelaj, duke trafikuar drogë.

      Në atë kohë ai u dënua me vetëm dy vite burg, ndërsa dy shokët e tij, Euron Hoti dhe Malton Lleshaj morën nga 15 vjet heqje lirie. Tashmë Lazaj dhe Bedinaj po merren në pyetje për të zbardhur më shumë detaje.

    • 14:20

      OPERACIONI ‘Shpirti’/ Gjendet 1 armë dhe 60 mijë euro. Policia publikon pamjet e të arrestuarve, një prej tyre nuk mban dot të qeshurën

      Te arrestuarit

      Pamjet e operacionit ‘Shpirti’ janë bërë publike nga Policia e Shtetit. Pjesë e operacionit kanë rënë në pranga disa persona. Policia ka shfaqur identitetet e tyre. Shihet se jo të gjithë janë seriozë dhe të mërzitur nga kapja për krimet që dyshohet se kanë kryer. Një prej tyre shfaqet i buzëqeshur krah policëve.

    • 13:46

      FOTOT-Fatos Nano, i 'ftuar' nderi! Resorti Alto Mare i sekuestruar nga SPAK në operacionin "Shpirti", në emër të Saimir Kurtit, dyshohet se është ngritur me para droge

      Një nga pasuritë e sekuestruara gjatë operacionit “Shpirti” është edhe restoranti Alto Mare në zonën e Golemit. Pasuria është në emër të nipit të Saimir Kurtit, drejtorit të Zyrës së Punës në Kavajë, i arrestuar tashmë si pjesë e grupit të trafikut të drogës. Por Prokuroria e Posaçme dyshon se kjo pasuri është ngritur me para që burojnë nga aktiviteti kriminal i Kurtit dhe ndaj saj është vënë sekuestro. 

      Por ku është ngritur Alto Mare?

      Shumë pranë detit në Golem, mes qetësisë së pishave dhe rërës së nxehtë, Alto Mare është një nga restorantet më të frekuentuara në zonë. Një nga të ftuarit specialë duket se ka qenë edhe ish-kryeministri dhe lideri historik i Partisë Socialiste, Fatos Nano.

    • 12:35

      Operacioni anti-drogë! Trafiku drejtohej nga dy familje mafioze me bazë në Kavajë dhe Vlorë

      Foto Ilustruese

      SPAK ka lëshuar 38 urdhër arreste për persona që janë përfshirë në trafikimin e lëndëve narkotike. Gjatë konferencës së përbashkët, në të cilën morën pjesë, kreu i SPAK Arben Kraja, së bashku me homolgun e tij italian, homologun e tij italian De Raho, si dhe me përfaqësues nga Eurojust, u bë e ditur se trafiku i drogës drejtohej nga dy familje mafioze, me bazë në Kavajë dhe në Vlorë. Operacioni i koduar ‘Shpirti’ shkatërroi organizatën ndërkombëtare të trafikut të ndërkombëtar të drogës, korrupsionit me detyrën dhe pastrimit të parave, ku ishin të përfshirë 38 persona, 10 prej të cilëve u arrestuan më parë.

    • 12:30

      Vrasës, trafikant dhe të dënuar, çfarë shkruante Sali Berisha në vitin 2017 për dy ish-shoqëruesit e Saimir Tahirit që u arrestuan sot nga SPAK

      Sot janë të arrestuar si pjesë e grupit të trafikut të drogës në operacionin “Shpirti”, ku janë lëshuar 28 urdhër arreste, ndërsa disa vite më parë, ishin persona të denoncuar nga ish-kryeministri Sali Berisha. Bëhet fjalë për Hekuran Markun dhe Agustin Dedën, dy ish-shoqërues të Saimir Tahirit, gjatë kohës kur ky i fundit ka qenë ministër i Brendshëm. Në vitin 2017, një mesazh i është dërguar Berishës, ku thuhet se shoqëruesi i parë i ministrit ka ndërruar emrin nga Agustin Fran Deda në Paul Deda, ndërsa Hekuran Marku, sipas denoncuesit kishte probleme me drejtësinë italiane.

      POSTIMI I PLOTË I BERISHËS NË 2017:

      Qeveria organizate e mirefillte kriminale!
      Njihuni me shoqeruesit vrases, plackites, anetare te bandave, persona ne kerkim te palo ministrit Saje Qorri!
      Oficeri i SHKB dixhital informon:
      -Shoqeruesi i pare i Saje qorrit ka nderruar emrin nga Agustin Fran Deda ne Paul Deda
      -ai ka plagosur ne nje Pub ne Tirane nje oficer te Gardes
      – ai ka qene person ne kerkim
      – Ka bere trafik kokaine ne Spanje
      -Shoqeruesi tjeter Hekuran Marku ka probleme me drejtesin italiane
      – Bujar Trimi shofer, i arrestuar ne Munih per grabitje banke me banden e Yzberishit; eshte krahu i djathte
      – Agim Sinani, shofer vrases, anetar i bandes se Selites i denuar per vrasje
      – Bledar Bodlli, punon ne SHKB, ka qene i denuar, pa shkolle.
      I bej thirrje prokurorise se shtetit te hetoje me perparesi lidhjet kriminale te Saje qorrit, shoqeruesve dhe njerezve te tij! sb
      “28/01/2017, 11:56:47: Shoqeruesi i pare i Sajmir Tahirit e ka pasur emrin Agustin Fran Deda tani e ka kthyer ne Paul Deda,e ka kthyer emrin per arsye se ne 2003-2004 ka plagosur ne nje Pab ne Tiranë ,nje oficer te gardes dhe ka qene person ne kerkim per tentativ vrasje dhe armbajtje pa leje ,i shpallur ne kerkim nga drejtoria e policise Tiranes,ne vendin e ngjarjes ka lene nje kepuce nga vrapi,Ky ka qene i lidhur me nje shtetase spanjolle në momentin e ngjarjes dhe ka punuar ne Spanje,Barcelonë dhe Londer me kokahine dhe prostitucion.
      28/01/2017, 11:57:18: Shoqeruesi tjeter i Sajmir Tahirit,Ekuran Marku i cili ka jetuar rreth 15 vjet ne Venecia Itali,ka bere nje lokal tek rruga barrikada prane shkolles Sami frasheri ,ka probleme me drejtesin Italiane ne lidhje me bankat per marrjen e nje kredie mbi 100 nije euro me emër tjeter ne Itali.
      28/01/2017, 11:58:00: Bujar Trimi miku i familjes se Sajmir Tahirit eshte shofer prane parkut te ministris rendit,eshte kapur nga policia gjermane per grabitje banke me grupin e Yzberishtit ne Mynih,i kane bere atentat tek pallati me shigjeta para disa viteve dhe edhte krahu i djathtes i karteles se grupit te Selites qe eshte me burgim te perjetshem per disa vrasje.
      28/01/2017, 11:58:41: Agim Sinani ka qene shofer prane parkut ministrise rendit,e hoqen pasi i doli vertetimi i penalitetit i denuar pasi ka qene ne burg per vrasje dhe pjestar i bandes se Selites.dhe Tahiri,e coj me pune tek taks forca ne Kesh tek miku i ngusht i tahirit tek Vahit Sina nga Tepelena drejtor ne Kesh,
      28/01/2017, 11:59:14: Bledar bodlli nga Yzberishti dhe ky mik i Tahirit ka qene i denuar dhe eshte lidhje e Tahirit dhe e krenar Cenollarit ish kryetari i minibashkis Kombinat ,pa shkolle dhe i emeruar nga Tahiri me Shkb tek Arben Skendaj drejtori i shkb ish sigurims.”

    • 12:43

      Zbulohen emrat, dy shoqëruesit e Tahirit të arrestuar në operacionin ‘Shpirti’

      Foto ilustruese

      Hekuran Marku dhe Agustin Deda janë dy shoqëruesit e Saimir Tahirit të cilët janë arestuar në kuadër të operacionit ‘Shpirti’. Emrat e dy shoqëruesve janë bërë publik nga ish-kryeministri Sali Berisha në vitin 2017. Në njoftimin e asaj kohe, Berisha shkruante se shoqëruesi i parë i ministrit ka ndërruar emrin nga Agustin Fran Deda në Paul Deda. Ndërsa shoqëruesi tjetër Hekuran Marku, po sipas ish-kryeministrit, ka probleme me drejtuesin italiane.

      “Agim Sinani, shofer vrasës, anëtar i bandës se Selitës, i dënuar për vrasje. Bledar Bodlli, punon ne SHKB, ka qenë i dënuar, pa shkollë. I bej thirrje Prokurorisë së Shtetit të hetojë me përparësi lidhjet kriminale të Saje qorrit, shoqëruesve dhe njerëzve të tij”, shkruante Berisha.

      Ditën e sotme, dy shoqëruesit e Tahirit, janë arrestuar nga SPAK. Në njoftimin e bërë publik për median, emrat e tyre nuk u bënë të ditur, mirëpo u raportua se ishin arrestuar dy shoqërues të Ministrit të Brendshëm në vitin 2016. Duke përkuar me vitin, në atë periudhë, ministër i Brendshëm ka qënë Saimir Tahiri. Ndaj, dy të arrestuarit për pjesmarrje në trafikun e drogës, rrjedhimisht i bie të jenë ish-shoqëruesit e tij.

      “Në veçanti, masat e sigurisë personale janë ekzekutuar, (përveç 10 shtetasve që janë arrestuar më parë në kuadër të operacionit Kulmi) edhe per një administrator publik (drejtor), nje prokuror, tre zyrtar të larte te policisë e dy punonjes te tjere policie, këta dy të fundit në kohën e kryerjes së veprave penale – në vitin 2016 – me detyrën e pjestarëve të grupit te shoqerimit të ish – Ministrit të Brendshëm. Zyrtarët publik, në disa raste pronarë të drogës, kanë garantuar, jo vetëm nga ana tokësore, por edhe detare në Shqipëri, që dërgimi i lëndës narkotike i destinuar në brigjet e Puglia-s të kryhej me siguri të plotë.”,-thuhet në njoftim, duke lënë të kuptohet se të arrestuarit janë policë.

    • 11:32

      MEGAOPERACIONI ‘Shpirti’/ Në mesin e të arrestuarve për drogë, dy shoqëruesit e Saimir Tahirit në vitin 2016 (EMRAT)

      Godina e SPAK

      Në megaoperacionin antidrogë ‘Shpirti’ i realizuar në bashkëpunim Shqipëri-Itali janë vënë në pranga prokurorë, drejtues policisë si dhe zyrtarë të lartë publik. Nga 38 urdhër-arrestet, 28 të arrestuar nga SPAK në Shqipëri, 10 të arrestuar më herët. Në njoftimin e bërë publik nga SPAK, thuhet se dy prej të arrestuarve janë dy ish-policë të cilët kanë qënë pjesë e shoqëruesve të Ministrit të Brendshëm në vitin 2016. Hekuran Marku dhe Agustin Deda janë dy shoqëruesit e Tahirit të cilët janë arestuar në kuadër të operacionit ‘Shpirti’. Kjo është thënë në vitin 2017 në denoncimin e ish-kryeministrit Sali Berisha. Duke përkuar me vitin, në atë periudhë, ministër i Brendshëm ka qënë Saimir Tahiri. Ndaj, dy të arrestuarit për pjesmarrje në trafikun e drogës, rrjedhimisht i bie të jenë ish-shoqëruesit e tij.

      “Në veçanti, masat e sigurisë personale janë ekzekutuar, (përveç 10 shtetasve që janë arrestuar më parë në kuadër të operacionit Kulmi) edhe per një administrator publik (drejtor), nje prokuror, tre zyrtar të larte te policisë e dy punonjes te tjere policie, këta dy të fundit në kohën e kryerjes së veprave penale – në vitin 2016 – me detyrën e pjestarëve të grupit te shoqerimit të ish – Ministrit të Brendshëm. Zyrtarët publik, në disa raste pronarë të drogës, kanë garantuar, jo vetëm nga ana tokësore, por edhe detare në Shqipëri, që dërgimi i lëndës narkotike i destinuar në brigjet e Puglia-s të kryhej me siguri të plotë.”,-thuhet në njoftim, duke lënë të kuptohet se të arrestuarit janë policë.

      NJOFTIMI : Autoritetet Shqiptare dhe Drejtoria e Antimafia-s së Barit, me ndihmën e Zyrës Ndërlidhëse të Forcave të Përbashkëta të Tiranës dhe të Policisë Shqiptare, Agjensite e tjera ligjzbatuese, në kuadër të një Skuadre të Përbashkët Hetimore, po zbatojnë në Shqipëri dhe në Itali, me vendim të Prokurorisë së Posaçme Kundër Korrupsionin dhe Krimit të Organizuar në Tiranë, e të DDA-së të Barit, – me koordimin e Eurojust-it (Hage) – i drejtuar nga antari kombëtar i palës italiane, një vendim mase sigurie të dhënë nga Gjyqtari i Gjykatës së Posaçme të Shkallës së Parë per Korrupsionin dhe Krimin e Organizuar, me të cilën ka urdhëruar arrestimin e 38 personave të konsideruar përgjegjës për korrupsion, shperdorim detyre, pastrim parash e trafik ndërkombëtar të sasive të konsiderueshme të lëndeve narkotike. Po zbatohen gjithashtu vendimet e sekuestrimit për pasuri të luajteshme, te paluajteshme dhe aktivitete tregtare, ne vlere disa milion euro. Ekzekutimi i operacionit ndërkombëtar është bërë i mundur, sidomos, falë Skuadrës së Përbashkët Hetimore, mjet i kooperimit gjyqësor i krijuar mes D.D.A-së së Barit, Prokurorisë së Posaçme Kundër Korrupsionin e Krimit të Organizuar në Tiranë dhe Eurojust-it (Organizëm që mbështet kooperimin gjyqësor dhe luftën kundër formave të rënda të kriminalitetit transnacional), i cili i ka dhënë mundësinë personelit të DIA-s së Barit dhe Autoriteteve Shqiptare, Prokurorisë së Posaçme dhe Policisë së Shtetit të zgjerojnë hetimet, duke u mbështetur në rolin thelbesor të koordimit të siguruar nga Drejtoria Kombëtare e Anti-mafias e Anti-terrorizmit. Masat e sigurisë janë dhënë nga Gjyqtari i Gjykatës së Posaçme të Shkallës së Parë per Korrupsionin dhe Krimin e Organizuar, në kuader te Operacionit SHPIRTI, në lidhje me hetimet e bëra nga muaji Maj 2019 deri në Janar 2021, që kanë bërë të mundur të mblidhen të dhëna te rendesishme ndaj 38 shtetasve shqiptar, pjestar të katër grupeve të fuqishme kriminale të organizuara, vepruese nga viti 2014 deri ne vitin 2017, në Shqipëri dhe në kontakt me organizatat kriminale bareze, në gjëndje të dërgonin në Evropë – duke zbarkuar në Puglia – sasi të konsiderueshme lënde narkotike. Autoritetet Shqiptare dhe DIA, gjatë hetimeve të mëparëshme bërë në Shqipëri në kuadër të operacioneve SHEFI dhe KULMI në mars të vitit 2018 e në qërshor të vitit 2020, kanë rindërtuar, edhe me ndihmën e deklaratave të katër bashkëpuntorëve të drejtësisë, të dhëna për shkelje të ligjit dhe veprime korruptive te kryera nga zyrtar publik shqiptar, pastrim parash, po ashtu të gjithë “zinxhirin e prodhimit” të lëndës narkotike, që nga kultivimi, prodhimi, mbledhja, magazinimi dhe trafikimi në drejtim të brigjeve pugliese me mjete lundruese të fuqishme. Një e re absolute e këtij hetimi është kontributi i çmuar i bashkëpuntorëve të drejtësisë, të gjithë shtetas shqiptar, deklaratat e të cileve, në lidhje me krimet e kryera në Shqipëri dhe në Itali, janë mbledhur në Bari nga prokurorët e D.D.A-së lokale e të SPAK-ut të Tiranës e pasi janë verifikuar përkatësisht, janë përdorur – në kuadër të Skuadrës së Përbashkët Hetimore – në procedimin penal shqiptar. Masat e sigurisë të dhëna nga Gjyqtari i Gjykatës së Posaçme të Shkallës së Parë per Korrupsionin dhe Krimin e Organizuar, te zbatuara ne Shqiperi, Itali, Mali i Zi dhe Spanjë, plotesojnë kuadrin hetimor – të pasurive e masave te sigurimit personal – të bëra në Shqipëri nga Prokuroria e Posaçme Kundër Korrupsionit dhe Krimit të Organizuar edhe ne lidhje me fenomenet e korrupsionit e shperdorimit te detyrës që i përkasin zyrtarëve publik – kryesisht pjestar të forcave të policisë shqiptare – të cilët kanë garantuar që “zinxhiri i prodhimit” të lëndës narkotike të mos ndëpritej kurrë. Në veçanti, masat e sigurisë personale janë ekzekutuar, (përveç 10 shtetasve që janë arrestuar më parë në kuadër të operacionit Kulmi) edhe per një administrator publik (drejtor), nje prokuror, tre zyrtar të larte te policisë e dy punonjes te tjere policie, këta dy të fundit në kohën e kryerjes së veprave penale – në vitin 2016 – me detyrën e pjestarëve të grupit te shoqerimit të ish – Ministrit të Brendshëm. Zyrtarët publik, në disa raste pronarë të drogës, kanë garantuar, jo vetëm nga ana tokësore, por edhe detare në Shqipëri, që dërgimi i lëndës narkotike i destinuar në brigjet e Puglia-s të kryhej me siguri të plotë. Masat parandaluese të pasurive dhe konkretisht sekuestro preventive që i përkasin sekuestrimit të pasurive të luajtëshme dhe të paluajtëshme, si apartamente, troje, restorante, njesi tregtare, (12 pasuri te paluajteshme), 4 (kater) shoqeri tregtare bashke me asetet e tyre dhe disa automjete, te cilat arrijne ne vleren e disa miliona euro. Operacionet Shefi e Kulmi, gjithmonë të kryera në Itali e në Shqipëri në kuadër të Skuadrës së përbashkët hetimore, të përfundura – në dy momente – nga DIA e Barit me ekzekutimin e përgjithshëm të 80 masave të sigurisë dhe sekuestrimet e pasurive për një vlerë prej 4 milion eurosh, kishin bërë të mundur, ndër të tjera, në vitin 2016 të arrestoheshin “në det” në Polignano dy skafistet me prejardhje nga Shqipëria me shumë se një ton lëndë narkotike; të ndalohej në Bari Carrassi një korier italian me furgon me më shumë se një mijë kilogram lëndë narkotike e trafikuar më parë në Torre e Mare nga Shqipëria; të identifikoheshin në autostradë në Grottaminarda e në Vasto dy korieret italian ndërkohë që po transportonin lëndë narkotike e destinuar në Salerno e në Tortoreto (Te); të arrestoheshin dy korieret shqiptar me lëndë narkotike në Sicili (Rg) pasi kishte zbritur nga një autobuz me prejardhje nga Bari; të identifikohej një tjetër depo në Mola të Barit brenda te cilës janë gjetur dhe sekuestruar lende narkotike e llojit cannabis sativa bashkë me një pako me kokainë; të kapeshin ne flagrance “në det” në Molfetta (Ba) dy skafistë nga Shqipëria me më shumë se një ton lende narkotike; të identifikohej dhe sekuestrohej në Savelletri (Br) një depozitë brënda të cilës ishin të ruajtura rreth 700 kg lëndë narkotike e të njëjtit tip (përveç fishekëve për Kallashnikov, njesi kontrolli elettronike për automjete, dokumenta, kapuça e gozhda prej hekuri me tre maja); të gjendej në Palagiano (Ta) një korier që po transportonte lënde narkotike e destinuar në tregun Lucan; të sekuestroheshin disa karta identiteti italiane të fallsifikuara në Shqipëri, në emer të qytetarëve puglies, të cilët nuk ishin në dijeni, të perdorura nga Shqiptarët për të shkuar në Evropën e Veriut.

      Në tërësi, në kuadër të hetimeve të sipërpërmendura, janë sekuestruar rreth 6 (gjashtë) tonelata lëndë narkotike të tipit marijunë, kokainë e hashish, duke i hequr organizatave kriminale të ardhura të vlerësuara në mbi 55 milion euro, për një sasi totale prej rreth 14 milion dozash njëshe që dalin nga shpërndarja me pakicë

      Personat e akuzuar në operacioni Shefi janë dënuar, në shkallë të parë e të dytë, për vepra penale të ndryshme, e dënime deri në 20 vjet burg ndërsa, në lidhje me operacionin Kulmi, me datën 29 qërshor 2021, Gj.S.P pranë Gjykatës së Barit ka dhënë një vendim të parë denimi ndaj 16 të pandehurve të dënuar, për vepra penale të ndryshme, me dënime deri në 13 vjet burg.

      Masat e sigurisë të zbatuara në ditën e sotme – në burg (25) persona e në arreste shtëpie (3) persona – janë kryer në Shqipëri në qytetet e Vlorës, Kavajës, Durrësit e Tiranës, Skrapar. Në Itali, Mali i Zi, e në Spanjë.

    • 11:18

      PARALAJMËRIMI i hetuesit italian! E thotë para Arben Krajës, “kod i kuq” për kriminelët: Do punojmë prapë bashkë, lajm jo i mirë për krimin e organizuar

      Roberto Rossi, hetues i anti-mafias të Barit ka bërë një paralajmërim për të gjithë anëtarët e grupeve kriminale në vend dhe në Itali. Në një konferencë për shtyp së bashku me kreun e SPAK, Arben Kraja, Rossi tha se do të vijonin të bashkëpunonin së bashku. “Sot është ditë e bukur sepse bashkë me një skaudër të jasjyë zakonshme morëm një rezultat të mirë. Problemi i krimit shqiptar, është edhe italian. Është problem komun. Nëse ia dalim që të kuptojmë se çdo shtet mund grupet kriminale, në bashkëpunim me vende të tjera, mund të kemi rezultate. Nëse punojmë që të punojmë me gjithë Europën, kështu si bashkëpunojmë me Italinë, do të japim një kontribut për të gjithë botën dhe Europën. Nuk duhet të flasim me për hetuesi shqiptare apo italiane sikur të ishin gjëra të ndryshme. Është vetëm një që godet krimin e organizuar. Ripërsëris; sot është ditë e madhe dhe faleminderit kolegëve shqiptarë. Do të punojmë së bashku edhe për shumë kohë, kjo na bën të lumtur, më pak të lumtur janë ata të krimit të organizuar,”-tha Rossi.

    • 11:19

      Megaoperacioni! Prokurori Mara: Janë nxjerrë 80 masa sigurie, sekuestruam pasuri me vlerë 3 milionë euro

      Vladimir Mara

      Një prej prokurorëve të çështjes, Vladimir Mara, ka dhënë detaje të forta në lidhje me megaoperacionin ‘Shpirti’. Sipas tij hetimi është kryer në kuadër të një skuadër të përbashkët hetimore, edhe me kolegët italianë. Janë evidentuar episode të shumta të trafikimit të lëndëve narkotike, nga Shqipëria drejt Italisë dhe më pas shtrirjen në disa qytete të Italisë dhe disa vende të Evropës. Kanabis, heroinë, kokainë apo edhe lëndë të tjera narkotike. Mara tha se deri më tani janë nxjerrë 80 masa sigurie, janë sekuestruar pasuri me vlerën e 3 milionë eurove.

      ‘Ka qënë një hetim i vështirë por me shumë rezultate. Të gjithë kanë dhënë suportin e tyre. Në mënyrë të përmbledhur, gjatë hetimit, janë evidentuar episode të shumta të trafikimit të lëndëve narkotike nga Shqipëria drejt Italisë dhe vendeve të tjera të Europës. Janë të llojit: heroinë, kokainë, marijuanë. Gjatë procedimit penal janë sekuestruar mbi 6 tonë lëndë narkotike në Itali dhe Shqipëri, dhe janë nxjerrë masë sigurimi për 80 persona. Në ditën e sotme kemi përmbyllur ekzekutimin e 28 masave të sigurisë. Operacioni ka shkuar me sukses. Unë dua të ndalem në dy momente shumë të rëndësishme, e para ka qënë besimi i kruijuar nga autoritetet italiane për të ndarë të dhënat. E dyta, kanë qënë 4 bashkëpunëtore të drejtësisë që na ndihmuan duke na dhënë të dhëna të rëndësishme. Të 4 bashkëpunëtorët nuk kanë qënë thjeshtë pjestarë të grupeve, po kanë pasur një rol të rëndësishëm në këto grupe kriminale. Janë dokumentuar i gjithë rrjeti që nga kultivimi, magazinimi dhe mbërritja në Itali. Në kohë reale është ndjekur dhe një hetim pasuror dhe janë sekuestruar të gjitha pasuritë që janë vënë si rezultat i aktiviteteve kriminale. E ndajmë në dy momente pasi në këtë hetim janë dhe zyrtarë të lartë të përfshirë në krimin e organizuar. Janë sekuestruar 11 pasuri të paluajtshme, 4 kompani, dhe disa pasuri të tjera që kapin vlerën e 3 milionë euro. Pasuritë janë të vëna si rezultat i krimeve. Kemi evidentuar 4 grupe kriminale.’

    • 11:11

      Përfaqësuesi i Eurojust: Krimi shqiptar, i verifikuar në nivelet më të larta në kriminalitetin botëror

      Filippo Spiezia

      Filippo Spiezia, përfaqësues i Eurojust ishte i pranishëm në konferencën online në finalizimin e operacionit “Shpirti”. Në fjalën e tij, Spiezia tha se kriminaliteti shqiptar është shumë i lartë në nivel botëror.

      ”Faleminderit zoti prokuror, faleminderit për ftesën. Prokurorit të Barit, kolegëve të SPAK dhe Prokurosë së Barit, Anti-Mafias, drejtorit të DIA-s, Policisë shqiptare dhe italiane të përfshirë në këtë operacion të shkëlqyer. Komplimentet e mia në këtë veprim të rëndësishëm. Niveli shumë të lartë, krimi i organizuar transnacional. Të sigurojmë ligjshmërinë dhe zhvillimin ekonomik. Pa luftuar riciklimin e parasë s’mund të ketë zhvillim ekonomik. Në një punë që është akoma më e gjatë, sepse kriminaliteti shqiptar dhe italian mafioz tashmë janë të verifikuara në nivelet më të larta të kriminalitetit botëror. është shumë e rëndësishme që ky udhëtim të vazhdojë.”,-tha ai.

    • 10:53

      Iu lëshua urdhër arresti nga SPAK! Kush është Ilirjan Balla, mori çmim si i ‘dalluar’ nga Saimir Tahiri për punën në polici

      Në kuadër të megaoperacionit ‘Shpirti’ është lëshuar dhe urdhër arresti për Ilirjan Balla, shefi i sektorit të trafiqeve në Drejtorinë e Përgjithshme të Policisë së Shtetit. Balla është një nga zyrtarët e ndaluar në kuadrin e një operacioni ndërkombëtar kundër drogës. Ndaj tij është dhënë masa e arrestit të shtëpisë, në kuadër të operacionit ‘shpirti” që është zhvilluar në Shqipëri, Itali, Mal të Zi dhe Spanjë, ku u godit rrjeti i trafikut të drogës nga Shqipëria në Itali. Balla akuzohet nga SPAK për shpërdorim detyre, ndërsa ndaj tij është vendosur masa e sigurisë arrest shtëpie.

      Po kush është Ilirjan Balla? Ai është emrat që u promovua në strukturat e larta të Policisë së Shtetit, në muajt e parë të periudhës, kur Ministria e Brendshme drejtohej nga Saimir Tahiri. Në tetor të 2013, Balla u emërua drejtor qarku në Kukës, ndërsa 12 drejtuesit e qarqeve, u larguan nga ministri i Brendshëm i asaj kohe, me një vendim politik. Balla ka mbajtur detyrat e zv.drejtor të Policisë Vlorë, për tu transferuar më pas me të njëjtën detyrë në Dibër.

    • 10:47

      U arrestua në kuadër të operacionit anti-drogë/ Kush është zyrtari i lartë, plagosi tre persona pas sherrit për parkimin në 2016

      Saimir Kurti

      Një ndër 38 të arrestuarit ditën e sotme në operacionin anti-drogë Shqipëri – Itali është edhe Saimir Kurti, drejtori i Zyrës së Punës në Kavajë. Ky i fundit rezulton i përfshirë në një plagosje me armë në vitin 2016, ngjarje që ndodhi pas një sherri për një vend parkimi. Kurti plagosi me armë zjarri babë e bir, Eqrem dhe Erkid Kazazin, i cili ishte kryetar i Forumit Rinor të PD në atë kohë dhe një kalimtar të rastit.

    • 10:43

      Operacioni ‘Shpirti’/ Policia shkon për ta arrestuar, ish-nënkomisari i Fierit hidhet nga kati i dytë i banesës, lëndohet në këmbë

      Ish-nënkomisari i policisë së Fierit, Festim Lelaj, i cili është arrestuar nga SPAK ditën e sotme në kuadër të operacionit ‘Shpirti’ ka tentuar që të arratisët. Në momentin që SPAK ka shkuar që t’a arrestojë në banesën e tij, ai është hedhur nga kati i dytë i banesës dhe ka pësuar frakturë në këmbë. Lelaj është dërguar për në spitalin e Vlorës, dhe më pas është nisur drejt Traumës për mjekim më të specializuar.

    • 10:16

      Megaoperacioni ‘Shpirti’, Ambasada italiane: Janë duke u ekzekutuar urdhra ndalimi të 38 personave

      Ambasada italiane

      Ambasada Italiane në Shqipëri ka reaguar pas operacionit të policisë shqiptare dhe anti-mafias italiane, ku u arrestuan 38 persona, të akuzuar për trafik droge, korrupsion, abuzim me detyrën dhe pastrim parash. Me anë të një postimi në Facebook, ambasada ka dhënë disa detaje në lidhje me këtë operacion, ku mbetën të arrestuar, prokurorë, shefa policie, drejtorë dhe persona të tjerë të përfshirë në vepra të ndryshme penale.

      POSTIMI:Drejtoria Hetimore Antimafia, së bashku me autoritetet shqiptare, me ndihmën e Zyrës Italiane të Ndërlidhjes Interforcë në Tiranë dhe të policisë shqiptare, janë duke ekzekutuar urdhra ndalimi të 38 personave përgjegjës për veprat penale të korrupsionit, abuzimit me detyrën, pastrimit të produkteve të veprave penale dhe trafikimit ndërkombëtar të lëndëve narkotike.

    • 9:43

      Nata jo e qetë! RENEA mësyn natën në Lazarat, arreston një person në kuadër të “Shpirti” (EMRI)

      Foto ilustruese

      Forcat speciale të RENEA kanë ushtruar kontrolle gjatë natës në fshatin Lazarat të Gjirokastrës, në kuadër të operacionit “Shpirti”. Mësohet se në pranga ka rënë Ilir Gaba, por deri më tani nuk është bërë me dije asnjë detaj se cili është roli i tij në grupin e strukturuar kriminal. 

    • 9:38

      Operacioni ‘Shpirti’ e fundosi! Kush është Festim Lelaj, emri i doli në hetimet antimafia, ish-nënkomisari i policisë Fier u kap me 2.5 tonë kanabis në 2017-ën

      Operacioni ‘Shpirti’ i nxori emrin në dritë! Ish-nënkomisari i Policisë së Fierit dyshohet se është përfshirë në rrjetin e trafikimit të lëndëve narkotike. Lelaj, është proceduar dhe arrestuar në 2017-ën për trafik narkotikësh në episodin e 2.5 tonë kanabis. Lelaj, një efektiv policie nga Vlora por në atë kohë me detyrë nënkomisar në drejtorinë e Fierit, u arrestua në dhjetor të vitit 2017 si personi që ka organizuar trafikimin e 2.5 tonë drogë nga Shqipëria në drejtim të Italisë. Sasia e madhe e drogës u kap në janar 2017 brenda një kamioni në Ancona. Aktualisht ai ndodhet në arrest shtëpie.

    • 9:22

      Operacioni anti-drogë në 4 shtete! Arrestohet prokurori i Vlorës, në pranga edhe shefi i sektorit kundër trafiqeve, ish-oficeri dhe drejtori i zyrës së punës në Kavajë

      Pamje nga operacioni

      Në kuadër të operacionit anti-drogë Shqipëri-Itali është vënë në pranga prokurori i Vlorës, Maksim Zota. Mirëpo në Shqipëri janë arrestuar dhe: Ilirjan Balla, ish-nën drejtor i Vlorës, aktualisht shefi i sektorit kundër trafiqeve. I arrestuar Saimir Kurti drejtor i zyrës së punës në Kavajës, si dhe Festim Lelaj, ish-oficer policie.

    • 9:07

      Operacioni antidrogë Shqipëri-Itali! ‘Shpirti’ arreston ish-prokurorin Maksim Sota, të larguar nga vetingu

      Maksim Sota

      Operacioni antidrogë ‘Shpirti’ i zhvilluar në 4 shtete, përfshirë dhe Shqipërinë, ka vënë në pranga disa persona me detyra të larta në vend. Një prej tyre i arrestuar në Shqipëri, si pjesë e rrjetit të trafikut të drogës dhe korrupsionit, është dhe prokurori Maksim Sota. Ky i fundit ka drejtuar për disa vite prokurorinë e Vlorës, ndërsa ka qenë dhe kandidat për të qenë pjesë e SPAK-ut. Sota, nuk ka mundur që të kalojë në fazën e parë të vettingut. Në kuadër të operacionit antidrogë Shqipëri-Itali janë vënë në pranga prokurorë, drejtues policisë si dhe zyrtarë të lartë publik. Nga 38 urdhër-arrestet, 28 të arrestuar nga SPAK në Shqipëri, 10 të arrestuar më herët.

    • 9:02

      “Peshq të mëdhenj” në pranga? DETAJE nga megaoperacioni, mes të arrestuarve zyrtarë të lartë dhe 1 prokuror. S’mungojnë as policë

      Foto ilustruese

      “Peshq të mëdhenj” kanë rënë në rrjetën e megaoperacionit anti-drogë, i koduar “Shpirti”. Burime për Dosja.al bëjnë me dije se mes të arrestuarve ka prokurorë, drejtues policie si dhe zyrtarë të lartë publik. Prokurori i fundit që është arrestuar është Edmond Karriqi, i cili mbante postin e kryeprokurorit të Kukësit, por nuk dihet nëse ka lidhje me operacionin. Të gjithë të prangosurit, emrat e të cilëve nuk janë bërë ende me dije, janë pjesë e një grupi kriminal të dyshuar për korrupsion, shpërdorim detyre, pastrim parash e trafik ndërkombëtar të sasive të konsiderueshme të lëndëve narkotike.

    • 8:36

      Megaoperacioni ‘Shpirti’! Goditen ‘bazat’ në Shqipëri, grupet kriminale gjendeshin në Tepelenë, Vlorë, Kavajë, Lazarat dhe Tiranë

      Operacioni

      Megaoperacioni ‘Shpirti’, i zhvilluar në Itali, Shqipëri, Spanjë dhe Mal të Zi, ka goditur grupet kriminale që merreshin me trafikun e drogës dhe korrupsion. Nga 38 urdhërarrestet, 28 janë të arrestuar nga SPAK në Shqipëri e 10 janë të arrestuar më herët. Bazat e grupit kriminal të goditur në Shqipëri, janë në qytetet si: Tepelenë, Vlorë, Kavajë, Lazarat dhe Tiranë.

    • 8:35

      “Shefi, kulmi dhe shpirti”/ PAMJET nga MEGAOPERACIONI anti-drogë, tonelata drogë dhe dhjetra operacione, ndjekje edhe në det me gomone

      Dalin pamjet e aksionit anti-drogë në Itali dhe në Shqipëri. Siç duket nga pamjet, rojet bregdetare kanë ndjekur për disa orë në det një gomone me lëndë narkotike, gjithashtu ka pasur transport edhe nga rrugët tokësore. Një kamion i mbushur plot me lëndë narkotike gjithashtu është ndaluar nga Policia, ndërsa arrestime janë bërë në disa shtete të ndryshme. Strukturat anti-Mafia po finalizojnë 38 udhër-arreste në Shqipëri, Itali , Mali i Zi dhe Spanja.

    • 8:09

      Ndihmuan 4 bashkëpunëtorë të drejtësisë! Operacioni ndërkombëtar “Shpirti”, sekuestrohen miliona euro pasuri, në hetim dhe zyrtarë

      Operacioni ‘Shpirti’

      Operacioni ndërkombëtar ”Shpirti” i shtrirë në disa shtete përfshirë Shqipërinë ka sekuestruar miliona euro pasuri duke lëshuar 38 urdhërarreste. Miliona euro pasuri janë në proces konfiskimi teksa grupi i shënjestruar akuzohet për trafik droge, korrupsion, shpërdorim detyre e pastrim parash. Në ndihmë të hetuesve kanë qenë edhe deklaratat e 4 bashkëpunëtorëve të drejtësisë. Sot priten detaje të reja nga operacioni gjatë një konference për shtyp ku i pranishëm do të jetë edhe drejtuesi i SPAK,Arben Kraja bashkë me drejtorin e Përgjithshëm të Policisë së Shtetit, Ardi Veliu.

    Shto Koment