Aktualitet

Arrestohen 10 protestuesit e Unazës së Re mes tyre ish-deputeti Balliu, opozita kërkon lirimin e tyre përpara Drejtorisë së Policisë (Video)

Basha ka dalë para makinave duke hapur u hapur rrugën banorëve dhe duke i nxjerrë ata për të protestuar. Në fjalën e tij, Basha nuk ka harruar edhe akuzat ndaj kryeministrit Edi Rama, të cilin e quan hajdut.
Përditësuar:

TIRANË–Banorët e Unazës së Re kanë protestuar edhe mbrëmjen e sotme kundër shembjes së banesave të tyre, që preken nga projekti Unaza e Madhe. Në krye të banorëve ishte edhe Kreu i Partisë Demokratike, Lulzim Basha, Endrit Braimllari dhe ish-deputeti Klevis Balliu.

Basha ka dalë para makinave duke hapur u hapur rrugën banorëve dhe duke i nxjerrë ata për të protestuar. Në fjalën e tij, Basha nuk ka harruar edhe akuzat ndaj kryeministrit Edi Rama, të cilin e quan hajdut.

Nuk shkohet në Europë me një kryeministër hajdut.  E keqja e madhe ka zaptuar Tiranën. Shqipëria si Europa është një urdhëresë e shenjtë për PD-në dhe këtë gjë do ta arrijmë vetëm kur të largohet Edi Rama.

Policët i shërbejnë një hajduti kronik si Rama. Shteti i korruptuar nuk nis hetime ndaj Ramës që do të gllabëronte 40 milionë euro me projektin e Unazës së Madhe,”- u shpreh Basha para banorëve.

Në pëfundim të protestës ka nisur edhe shoqërimi i banorëve të zonës, siç ndodh netët e fundit për shkak të ndryshimeve në Kodin Penal. Sot janë arrestuar 10 banorë të Unazës së Re, mes tyre edhe ish-deputeti Klevis Balliu. 5 të tjerë janë në hetim në gjendje të lirë.

Më pas banorët dhe përfaqësues të Opozitës kanë shkuar në Drejtorinë e Policisë së Tiranës ku kanë kërkuar lirimin e Balliut dhe të protestuesve.

 

 

Ditët e fundit janë shoqëruar disa protestues, banorë të ksaj zone pasi me ndryshimet e bëra në Kodin Penal, kushdo që bllokon rrugën duhet të arrestohet dhe në rast dënimi rrezikon deri në 3 vjet heqje lirie.

(f.m/dosja.al)

  • 23:38

    Shoqërimet e banorëve të Unazës së re, Basha: Ngjarje si kjo na mbajnë larg Europës

    Kreu i Partisë Demokratike Lulzim Basha ka reaguar pas arrestimeve të banorëve të Unazës së Re që edhe mbrëmjen e sotme protestuan kundër shembjes së banesave të tyre.

    Në një status në rrjetet sociale, Basha u shpreh se veprime si arrestimi i këtyre banorëve e mbajnë Shqipërinë larg Europës.

    Kjo është javë vendimtare për të ardhmen e Shqipërisë, kur do të vendoset nëse do të shkojmë përpara drejt Europës apo do të mbetemi ngecur në marshin indietro. Regjimi i Ramës vendosi ta tregojë sa i përkushtuar është ndaj vlerave Europiane të lirisë së shprehjes dhe sundimit të ligjit, duke arrestuar dhunshëm protestues paqësorë. Nëse lajmet nga Brukseli janë negative, askush mos ta vërë në dyshim, ngjarje si kjo e sotmja janë shkaku. Por ne nuk do ti lejojmë të na mbyllin gojën e të na mbajnë peng, beteja do të vazhdojë pareshtur drejt destinit tonë: Shqipërisë së zhvilluar, të lirë dhe Europiane!“- shkruan Basha.

  • 20:47

    Shoqërimi i Balliut dhe i protestuesve, Salianji: Ne mbështesim banorët, policia po vepron brutalisht

    Ish-deputeti i Partisë Demokratike Ervin Salianji ka komentuar shoqërimin e Klevis Balliut dhe të shtatë protestuesve të tjerë nga policia.

    Teksa ndodhet pranë Drejtorisë së Policisë, Salianji është shprehur për “News 24” se protesta është e ligjshme dhe se ëhstë policia ajo që po vepron kundër ligjit.

    Policia ka vepruar në mënyrë brutale, duke tentuar që të imponohet një regjim policor. Protesta do të vazhdojë dhe ne do të jemi në mbështetje të tyre.

    Ne dimë se janë shoqëruar 6 persona bashkë me Klevis Balliun. Ne do të mbështesim banorët në këtë protestë dhe sigurisht që duam lirimin sa më të shpejtë të protestuesve,“- tha Salianji.

  • 20:31

    Bardhi dhe Vokshi debat me policinë: Dua të iki në shtëpi! Ndërhyn dikush: Foli mirë policit, or çun (Video)

    Sekretari i Përgjithshëm i Partisë Demokratike Gazment bardhi dhe Albana Vokshi kanë debatuar me policinë teksa kanë tentuar të çajnë kordonin. Në një video të publikuar nga Shqiptarja.com, Bardhi shihet që u drejtohet policëve dhe u thotë t’i hapin rrugën.

    “O zotëri a je mirë? Dua të kaloj në anë tjetër, na ke bllokuar rrugën, jemi qytetarë të lirë. O zotëri, dua të iki në shtëpi!”- thotë Bardhi.

    Ndërkohë edhe Vokshi thotë pak a shumë të njëjtën gjë. “Duam të kalojmë na keni bllokuar rrugën,”- dëgjohet të thotë Vokshi.

    Ndërkohë në këtë debat ndërhyn dikush. “Foli mirë policit, or çun,”- dëgjohet të thiotë ai, por nuk shihet se kush është.

  • 20:20

    Protesta tek Unaza e Re, Lleshaj thirrje banorëve: Mbani fëmijët larg politikës së rrugës, PD-ja iu rikthye vesit të vjetër

    Ministri i Brendshëm Sandër Leshaj ka reaguar pas përfundimit të protestës që zhvillohet çdo natë tek Unaza e Re.

    Në një status në Twitter, Lleshaj ka publikuar një foto ku shihet se fëmijët janë vendosur përpara makinave në mënyrë që t’u bllokojnë atyre rrugën dhe të protestojnë.

    Foto e publikuar nga Lleshaj

    Në statusin e tij Lleshaj shkruan se PD-ja ka keqpërdorur fëmijët në këtë mënyrë dhe u bën thirrje prindërve që mos ta lejojnë këtë gjë. Minsitri i brendshëm thekson më tej se Policia e Shtetit nuk do të përballet kurrë me fëmijët e keqpërdorur politikisht.

    Por, në të njëjtën kohë, sipas Lleshajt, Policia nuk do të tolerojë asnjë pengmarrje të qytetit nga një grup parapolitik i dalë dëshpërimisht jashtë rrugës së arsyes dhe të ligjit.

    Reagimi i Lleshajt

    Pushimet e verës duket se nuk e ndihmuan Partinë Demokratike për të gjetur udhën e politikës.

    Sot, më 13 tetor, ajo u rikthye përsëri në vesin e vjetër të bllokimit të rrugëve, por kësaj radhe me një “risi” të mjerë. Drejtues të saj u fshehën pas fëmijëve dhe grave, të cilët u përdorën në mënyrë abuzive, si shprehje tronditëse e mungesës së përgjegjshmërisë dhe e kurajos.

    Drejtuesit e PD duhet të dinë mirë një gjë:
    Policia e Shtetit nuk do të përballet kurrë me fëmijët e keqpërdorur politikisht. Por, në të njëjtën kohë, ajo nuk do të tolerojë asnjë pengmarrje të qytetit nga një grup parapolitik i dalë dëshpërimisht jashtë rrugës së arsyes dhe të ligjit.

    Me këtë rast, ftoj të gjithë qytetarët që janë bërë pjesë e këtij manipulimi që të distancohen nga shkeljet e ligjit, që të mbajnë fëmijët larg politikës së rrugës dhe që të mos lejojnë keqpërdorimin e vetes për interesa politike!

    E drejta e tyre nuk mund të gjendet kurrë tek bllokimi i arterieve kryesore të kryeqytetit, por vetëm te rruga institucionale.

    Iluzioni se problemet mund të zgjidhen përmes vetëgjyqësisë, që promovon PD, është i kotë dhe i dëmshëm për të gjithë.

    E vetmja rrugë e arsyeshme për të zgjidhur problemet është qasja institucionale. Institucionet janë plotësisht të gatshme dhe të përgatitura për të trajtuar në rrugë ligjore problemet e qytetarëve.

  • 20:20

    Në krye të protestuesve, momenti kur Basha u del para makinave, shoferët ndalojnë menjëherë (Video)

    Videoja e mëposhtme tregon momentin kur kreu i Partisë Demokratike ka bllokuar rrugën në zonën e Astirit teksa u del përpara makinave.

    I veshur me xhup lëkure, Basha shihet teksa del në rrugë dhe takon disa nga njerëzit që ndodhen aty. Videoja është publikuar nga Shqiptarja.com.

    Menjëherë makinat kanë ndaluar qarkullimin e tyre dhe kreu i PD-së u ka prirrë protestuesve të Unazës së Re.

  • 19:51

    Përfaqësues të opozitës nisen tek Drejtoria e Policisë, kërkojnë lirimin e Klevis Balliut

    Ish-deputetë dhe përfaqësues të Opozitës janë nisur drejt Drejtorisë së Policisë pasi kërkojnë lirimin e ish-deputetit Klevis Balliu. Balliu u shoqërua mbrëmjen e sotme bashkë me katër protestues, në përfundim të protetës që po zhvillohej tek Unaza e Re.

    Balliu ishte së bashku me kryetarin e Partisë Demokratike Lulzim Basha dhe të dy qëndruan në zonën e Unazës së Re në mbështetje të banorëve të cilët protestojnë prej një viti.

  • 19:34

    Ishin fshehur mes protestuesve, ja si policët e veshur civilë arrestojnë banorët e Unazës së Re (Video)

    Policë të veshur civilë kanë bërë shoqërimin e banorëve të Unazës së Re, menjëherë sapo ka mbaruar protesta që qytetarët e kësaj zoën zhvillojnë çdo natë.

    Në një video të publikuar nga “Faxweb”, shihet se si persona pa uniform kanë kapur nga krahu një nga protestuesit dhe e fusin në makinën e policisë.

    Banorët mësohet të jenë shprehur se kjo gjë ndodh çdo natë, se persona civilë qëndrojnë të fshheur mes tyre dhe sapo mbaron protesta shoqërojnë banorët për në komisariat.

  • 19:34

    Protesta e Unazës së Re, shoqërohet në polici Klevis Balliu dhe katër protestues

    Ish-deputeti Klevis Balliu dhe katër protestues janë shoqëruar për në komisariat.

    Ngjarja ka ndodhur pasi ka mbaruar protesta që banorët e Unazës së Re zhvillojnë çdo natë kundër shembjes së banesave të tyre.

    Balliu ishte së bashku me kryetarin e Partisë Demokratike Lulzim Basha dhe të dy qëndruan në zonën e Unazës së Re në mbështetje të banorëve të cilët protestojnë prej një viti.

Shto Koment