Politike

Një ditë para protestës në Prishtinë në mbështetje të tyre/ Gjykata Speciale vendos zgjatjen e paraburgimit për Thaçin dhe tre të tjerë

Mbrojtja e Thaçit e përfaqësuar nga Sophie Menegon dhe Luka Mishetiç nuk ka parashtruar asnjë përgjigje ndaj kërkesës së Prokurorisë për vazhdimin e paraburgimit.

6 Gusht 2025, 17:22 Nga r.ll
Një ditë para protestës në Prishtinë në
hashim thaci

HAGË- Gjykata Speciale në Hagë ka vendosur që t'i zgjatet paraburgimi ish-presidentit Hashim Thaçi dhe tre të akuzuarve të tjerë: Bashkim Smakajt, Isni Kilajt dhe Fadil Fazliut. 

Katër vendimet e ndara janë marrë nga gjyqtarja e procedurës paraprake Marjorie Masselot më 5 gusht 2025. Gjyqtarja Masselot është shprehur se për Thaçin ende ekziston rreziku i pengimit të procedurave me mbylljen e çështjes së Prokurorisë në rastin për krime lufte.

“Rreziku i pengimit nuk është zhdukur me mbylljen e çështjes së ZPS-së në çështjen 06, pasi procedurat mbeten ende në zhvillim dhe dëshmitarët që kanë dëshmuar tashmë mund të përballen me hakmarrje ose të nxiten për të tërhequr dëshmitë; (ii) rreziku i pengimit vlerësohet jo vetëm në lidhje me çështjen 06, por edhe me çështjen aktuale; dhe (iii) procesi i vazhdueshëm i zbulimit e rrit më tej këtë rrezik, pasi i jep z. Thaçit qasje në informacion sensitiv që lidhet me dëshmitarët”, thuhet në vendim.

Masselot ka shtuar se për ish-presidentin ende vazhdon dyshimi për kryerjen e veprave penale të cilat i janë ngarkuar. Gjyqtarja ka konstatuar gjithashtu se ekziston rreziku që ai të arratiset si dhe të kryej krime të tjera.  Raportohet se mbrojtja e Thaçit e përfaqësuar nga Sophie Menegon dhe Luka Mishetiç nuk ka parashtruar asnjë përgjigje ndaj kërkesës së Prokurorisë për vazhdimin e paraburgimit.

Hashim Thaçi, i cili ndodhet në paraburgim që nga viti 2020, nën akuza për krime lufte, akuzohet tani edhe për pengim të drejtësisë në një rast të veçantë, së bashku me Kilajn, Smakajn dhe Fazliun. Gjykata Speciale ngriti aktakuzën e dytë kundër Thaçit në dhjetor të vitit 2024 për pengim të drejtësisë.  Prokuroria thotë se ata kanë bashkëpunuar për të ndikuar dëshmitarët në rastin kryesor përmes vizitave jo të privilegjuara gjatë vitit 2023.

Ndërkohë ditën e nesërme në Prishtinë pritet të mbahet protesta në mbështetje të të paraburgosurve. Protesta e cila është planifikuar të zhvillohet në orën 17:00 në sheshin “Skënderbeu”, është thirrur nga Organizata e Veteranëve të Luftës së Ushtrisë Çlirimtare të Kosovës.

hashim thaci gjykata speciale ne hage bashkim smakaj isni kilaj fadil fazliu

Sondazh

Poll

MË SHUMË