Politike

"Janë pezulluar dhe proceduar", PD: Të ndalet hakmarrja politike ndaj policëve që zbatuan ligjin dhe hetuan denoncimin për "trenin Bullgar" në Pekisht të Peqinit

Vangjeli ka deklaruar se pasi Policia e Elbasanit ka referuar në Prokurori, rastin ku dokumentoheshin materiale zgjedhore dhe para në një lokal në fshatin Pekisht të Peqinit, Policia e Shtetit ka nisur "hakmarrjen".

28 Qershor 2025, 12:15 Nga r.ll
"Janë pezulluar dhe proceduar", PD: Të ndalet hakmarrja
genta vangjeli

TIRANË- Zëdhënësja e Antikorrupsionit në Partinë Demokratike, Genta Vangjeli ka dalë sot në një deklaratë për mediat nga selia blu. 

Vangjeli ka deklaruar se pasi Policia e Elbasanit ka referuar në Prokurori, rastin ku dokumentoheshin materiale zgjedhore dhe para në një lokal në fshatin Pekisht të Peqinit, Policia e Shtetit ka nisur "hakmarrjen". Ajo shprehet se efektivët që denoncuan shkeljet zgjedhore, sipas deputetit të zgjedhur, Bledi Himçit, janë pezulluar ose ndaj tyre ka nisur procedim disiplinor. 

Partia Demokratike ka dënuar këtë rast dhe paralajmëron se të gjitha rastet e abuzimit me pushtetin do të dokumentohen dhe do të ndëshkohen sipas ligjit.

DEKLARATA E PLOTË E GENTA VANGJELIT:

Partia Demokratike dënon hakmarrjen politike ndaj efektivëve që zbatuan ligjin.

Nisur nga deponimet e strukturave të Partisë Demokratike në lidhje me vijimin e procedimit penal të iniciuar pas publikimit të një videoje nga drejtuesi i opozitës, z. Sali Berisha, ku dokumentoheshin materiale zgjedhore dhe para në një lokal në fshatin Pekisht të Peqinit, ju bëjmë me dije se:

Pasi Policia e Elbasanit referoi çështjen në Prokurori dhe kjo e fundit vijoi procedurat për ndjekjen penale të rastit, strukturat e Policisë së Shtetit janë vënë në funksion të një fushate hakmarrjeje politike.

Nën urdhrat politikë të Edi Ramës dhe me drejtimin e Ilir Prodës në Policinë e Shtetit, është ndërmarrë një seri masash disiplinore dhe ndëshkuese ndaj efektivëve që guxuan të veprojnë në përputhje me ligjin.

Konkretisht sipas informacionit të sjellë nga deputeti i zgjedhur, z.Blendi Himçi :

Është nisur procedim disiplinor nga Drejtoria e Standardeve ndaj shefit të krimit ekonomik në Drejtorinë e Elbasanit, Kliton Zhari;

Është pezulluar nga detyra nëndrejtori i Policisë së Qarkut Elbasan, Sadik Kateshi;

Procedim disiplinor dhe transferim për shefin e krimeve të Komisariatit të Peqinit, Denis Sinani.

Këto masa përbëjnë një akt të pastër hakmarrjeje politike ndaj efektivëve që refuzuan të heshtin përballë manipulimit të zgjedhjeve dhe që ushtruan detyrën e tyre me ndershmëri dhe profesionalizëm.

E nga ana tjetër emra si Krenar Guçe, promovohen me poste si shpërblim për shërbimin në funksion të farsës zgjedhore zhvilluar në 11 Maj.

Partia Demokratike dënon me forcë këtë sjellje arbitrare dhe paralajmëron se të gjitha rastet e abuzimit me pushtetin do të dokumentohen dhe do të ndëshkohen sipas ligjit.

genta vangjeli

Sondazh

Poll

MË SHUMË