Politike

Kurti: Ushtria jonë është më e fortë se kurrë, e furnizuar me arsenal të avancuar ushtarak!

Ai njoftoi gjithashtu se FSK është më e pajisur se kurrë më parë me sisteme moderne armatimi, dhe se brenda dy vitesh pritet ndërtimi i fabrikës së parë shtetërore për prodhimin e municioneve.

27 Qershor 2025, 22:43 Nga N.F
Kurti: Ushtria jonë është më e fortë se kurrë, e
Kurti

KOSOVË- 350 ushtarë të rinj janë betuar sot duke iu bashkuar Forcës së Sigurisë së Kosovës (FSK), si pjesë e gjeneratës së dytë për vitin 2025. Në ceremoninë e betimit ka marrë pjesë edhe kryeministri i Kosovës, Albin Kurti.

Gjatë fjalës së tij Kurti vlerësoi se FSK-ja po rritet shpejt drejt një ushtrie moderne, të aftë dhe me përbërje multietnike. Ai shtoi se vendi ka një ushtri profesionale, të përgatitur në aspektin profesional dhe logjistik, e cila përfaqëson garanci për sovranitetin dhe integritetin territorial të vendit.

“Në kohë kur bota përballet me kërcënime të ndryshme, Kosova nuk është më e vetmuar. Krah nesh janë aleatët dhe partnerët strategjikë. Ushtria jonë është e pathyeshme, sovraniteti i paprekshëm, dhe integriteti territorial i pacenueshëm”, deklaroi Kurti.

Ai njoftoi gjithashtu se FSK është më e pajisur se kurrë më parë me sisteme moderne armatimi, dhe se brenda dy vitesh pritet ndërtimi i fabrikës së parë shtetërore për prodhimin e municioneve.

“Sot, ushtria jonë është më e fortë se kurrë. E furnizuar me arsenal të avancuar ushtarak, dhe e trajnuar në përputhje me doktrinat e NATO-s, FSK po ndërton kapacitete të plota si një ushtri e denjë për sfidat e kohës dhe një partnere e besueshme për vendet aleate”, shtoi ai.

Presidenti i Serbisë, Aleksandar Vuçiç disa ditë më parë deklaroi se Ushtria e Serbisë është më e fuqishme se kurrë dhe shtoi se vetëm një numër i vogël njerëzish e di çfarë është blerë gjatë viteve të fundit, pasi gjithçka është bërë në fshehtësi.

Sipas tij, Prishtina, Zagrebi dhe Tirana po krijojnë një aleancë ushtarake dhe se vazhdimisht po e ftojnë Sofjen që t’u bashkohet, gjë që e ka detyruar Serbinë të armatoset.

kurti kosova

Sondazh

Poll

MË SHUMË