Politike

Gazetari Martens: Naive të besohet se shtetet e Ballkanit Perëndimor mund të anëtarësohen në BE deri më 2030!

Martens në një bisedë me publicistin Veton Surroi në podcastin PIKË, u shpreh se një pritshmëri e tillë është naive dhe nuk mbështetet në realitetin politik dhe strukturor të vetë BE-së.

26 Maj 2025, 08:00 Nga N.F
Gazetari Martens: Naive të besohet se shtetet e Ballkanit Perëndimor
Gazetari Martens


TIRANË- Gazetari i njohur  i “Frankfurter Allgemeine Zeitung”, Michael Martens shprehu skepticizëm të thellë ndaj mundësisë që vendet e Ballkanit Perëndimor të anëtarësohen në Bashkimin Evropian deri në vitin 2030, siç është rasti i Shqipërisë apo Malit të Zi. Martens në një bisedë me publicistin Veton Surroi në podcastin PIKË, u shpreh se një pritshmëri e tillë është naive dhe nuk mbështetet në realitetin politik dhe strukturor të vetë BE-së.

“Sa më qartë ta themi tani se kjo nuk do të ndodhë, aq më shpejt mund të fillojmë të mendojmë për alternativa”, theksoi Martens.

Ai shtoi se lufta në Ukrainë ka treguar rëndësinë e marrjes seriozisht të deklaratave të politikanëve, duke përmendur paralajmërimet e presidentit rus Vladimir Putin që u injoruan fillimisht, ashtu siç ndodhi me fjalët e Adolf Hitlerit në “Mein Kampf”.

Martens theksoi se ngjashëm, edhe liderë demokratikë si presidenti francez Emmanuel Macron kanë qenë të qartë për kufizimet e BE-së në formën e saj aktuale.

“Macron për vite me radhë ka thënë se BE-ja me 27 vende tashmë mezi funksionon. E si do të funksionojë me 33 apo më shumë?”, ka thënë ai, duke vënë në dyshim realizueshmërinë e zgjerimit të mëtejshëm të bllokut.

Sipas tij, nëse BE-së i shtohen të gjitha vendet kandidate -gjashtë shtetet e Ballkanit Perëndimor, Ukraina, Moldavia dhe Turqia- ajo do të shndërrohej në një strukturë kaotike dhe të pamundur për t’u qeverisur.

“Do të ishte një klub që nuk do të doje t’i përkisje”, u shpreh Martens.

gazetari martens

Sondazh

Poll

MË SHUMË