Politike

Rama thumbon Berishën nga Athina: Më 11 maj bufi do të thotë fitore, më 13 maj do denoncojë vjedhjen më të madhe të votave

Pasi ironizoi Sali Berishën, kryeministri prezantoi “Paketën e maleve”, si një skemë lehtësish fiskale për investitorët

30 Mars 2025, 18:03 Nga A.Ll
Rama thumbon Berishën nga Athina: Më 11 maj bufi do të thotë
Edi Rama

ATHINË - Kryeministri Edi Rama, nga Athina, ka përdorur ton ironik ndaj ish-kryeministrit Sali Berisha, duke parashikuar reagimet e tij pas zgjedhjeve të 11 majit. Rama tha se më 11 maj Berisha do të shpallë fitore, por më 13 maj, pas shpalljes së rezultateve, do të pretendojë një manipulim masiv të votave.

“Në 11 maj bufi do thotë fitore. Në datën 12 pasdite do shihni që nga këneta do fryjë ajo era dhe më 13 në mëngjes do denoncojë vjedhjen më të madhe në histori të votave. Ne e dimë këtë, por pas zgjedhjeve ajo që neve na intereson, është çfarë do bëjmë për të ndihmuar qytetarët”, u shpreh Rama.

Gjatë fjalës së tij, kreu i qeverisë prezantoi gjithashtu “Paketën e maleve”, një skemë e cila, sipas tij, do të mundësojë investime pa taksa dhe pa TVSH për 10 vjet radhazi për 500 aplikantët e parë.

“Çfarë ka vërtet rëndësi janë projektet që i shërbejnë zhvillimit ekonomik. Me 'Paketën e maleve', ne u japim mundësi 500 investitorëve të parë të punojnë pa asnjë barrë fiskale për 10 vjet. Kjo është një mundësi e jashtëzakonshme për zhvillimin e turizmit malor dhe për hapjen e vendeve të reja të punës”, tha Rama.

Kryeministri u shpreh se qeveria do të vijojë me projekte të reja për të nxitur investimet dhe zhvillimin ekonomik, pavarësisht debateve politike që shoqërojnë fushatat zgjedhore.

 

edi rama sali berisha athine diaspora zgjedhjet

Sondazh

Poll

MË SHUMË