Politike

"A do paraqiteshit në SPAK nëse merrni fletëthirrje për 21 Janarin"? Berisha: Mbështes çdo lloj hetimi të kësaj ngjarje

I pyetur nëse do të paraqitej në SPAK në merrte një fletëthirrje për tu pyetur në lidhje me 21 janarin, Berisha u shpreh se mbështet çdo lloj hetimi të kësaj ngjarje.

21 Janar 2025, 13:24 Nga B.Z
"A do paraqiteshit në SPAK nëse merrni fletëthirrje për
Sali Berisha

TIRANË - Kreu i PD, Sali Berisha gjatë një deklarate për mediat të dhënë mesditën e sotme u pyet edhe për ngjarjen e 21 janarit, ku mbetën të vrarë 4 protestues. I pyetur nëse do të paraqitej në SPAK në merrte një fletëthirrje për tu pyetur në lidhje me 21 janarin, Berisha u shpreh se mbështet çdo lloj hetimi të kësaj ngjarje.

Pyetje: Sot shënon data 21 janar, dhe 14 vite më parë ju shikuat nga dritarja e kryeministrisë të vriten 4 protestues. Sot pas 14 vitesh, për ju personalisht a ka një moment pendese, apo reflektimi dhe nëse do të ktheheshit pas në kohë, a do të vepronit ndryshe. Hetimet e SPAK për këtë çështje kanë hyrë në faza intensive, në rast se merrni një fletë thirrje nga SPAK, a do të paraqiteshit dhe pyeteshit për 21 janarin.

Berisha: Jam shprehur, shprehem dhe do të shprehem, mbështes çdo lloj hetimi të kësaj ngjarje, por gjithashtu deklaroj se nuk ka asgjë tjetër, vetëm për të shpëtuar përgjegjësitë e atij që organizoi protestën më të dhunshme për qëllime të pushtetit të tij, Edi Ramës.

Më 21 janar 2011, në një protestë të organizuar nga Partia Socialiste, asokohe në opozitë, u vranë nga Garda e Republikës 4 protestues. Kryeministri i kohës, Sali Berisha deklaroi se opozita kishte përgatitur një "grusht shteti" për të rrëzuar qeverinë, ndërsa opozita akuzoi qeverinë se vrau 4 qytetarë të pafajshëm.

Në hetimin që u bë për vrasjen e protestuesve, të pandehur u morën Ndrea Prendi dhe Agim Llupo, ndërsa gjykata vlerësoi me vendim se vrasjet kanë ndodhur nga pakujdesia. Të dy të pandehurit u dënuan, ish-komandanti i Gardës, Ndrea Prendi me 1 vit ndërsa gardisti Agim Llupo me 3 vite burg.

sali berisha 21 janari

Sondazh

Poll