Bota

Lufta në Ukrainë/ Rusia shkatërron tre termocentrale, bombardime masive, 2 të vdekur

Moska kohët e fundit ka rritur sulmet ajrore kundër Ukrainës, duke synuar kryesisht rrjetin energjetik të vendit dhe duke thënë se ato janë në hakmarrje për sulmet e Kievit në rajonet kufitare ruse.

29 Mars 2024, 13:36 Nga S.N
Lufta në Ukrainë/ Rusia shkatërron tre termocentrale, bombardime
Foto Ilustrim

UKRAINË- Sulmet ajrore ruse shkaktuan dëme "të rënda" në tre termocentrale në Ukrainë gjatë natës të së enjtes deri të premten, duke vrarë dy persona dhe duke plagosur të tjerë në pjesë të ndryshme të vendit, thanë autoritetet ukrainase, duke akuzuar Moskën për sulme "barbare" në rrjetin e energjisë.

Moska kohët e fundit ka rritur sulmet ajrore kundër Ukrainës, duke synuar kryesisht rrjetin energjetik të vendit dhe duke thënë se ato janë në hakmarrje për sulmet e Kievit në rajonet kufitare ruse. Gjithsej dhjetë provinca të Ukrainës u vunë në shënjestër të sulmeve ruse .

Tre termocentrale u dëmtuan rëndë, njoftoi kompania më e madhe private e energjisë në Ukrainë DTEK. “Pushtuesit sulmuan tre termocentrale të DTEK. Pajisjet janë dëmtuar rëndë. Pas përfundimit të sulmit, inxhinierët filluan menjëherë riparimin e dëmit ”, tha kompania në një postim në Telegram.

Kryeministri ukrainas Denis Shmyhal tha se Rusia vazhdon sulmet e saj barbare kundër sistemit energjetik ukrainas . Në disa zona duhej të kishte ndërprerje të energjisë, shtoi ai, pa specifikuar shtrirjen e tyre.

“Ukraina ka nevojë për më shumë sisteme të mbrojtjes ajrore për të garantuar sigurinë e infrastrukturës së saj bazë dhe për të mbrojtur banorët e saj”, theksoi Shmihal.

Ky sulm masiv me dronë dhe raketa synoi termocentralet në provincat Dnipropetrovsk, Poltava dhe Cherkasy, tha ministri ukrainas i Energjisë , German Galuchenko.

Guvernatori i Dnipropetrovsk Serhii Lysak theksoi se mbrojtja ajrore sonte rrëzoi dhjetë drone mbi provincë, në rajonet e Pavlograd, Krivi Rykh, Dnipro, Kamiansky. Katër raketa u shkatërruan mbi Dnipro . Ai shtoi se shumë objekte energjetike u dëmtuan në provincë.

 Lisak vuri në dukje se një grua u vra dhe një burrë u plagos nga një sulm me dron në qytetin e Mirivska, afër Nikopolis, duke shtuar se qyteti ka qenë në shënjestër që nga mëngjesi.
Në Kamianski një kooperativë bujqësore u godit dhe pesë persona u plagosën - një fëmijë 5 vjeç dhe dy gra të moshës 19 dhe 47 vjeç, të cilët nuk kishin nevojë për trajtim spitalor dhe dy burra të moshës 36 dhe 47 vjeç, të cilët janë në gjendje të rëndë.

Në provincën Donetsk , një grua u vra nga një sulm ajror rus në Mykolayfka, i cili dëmtoi rëndë rreth tridhjetë shtëpi, një treg dhe një ndërtesë administrative, sipas policisë ukrainase.

Sulmet e përhapura ruse në ditët e fundit, e fundit prej të cilave ndodhi sot, kanë shkaktuar dëme të mëdha në infrastrukturën e prodhimit dhe transmetimit të energjisë elektrike të Ukrainës, duke e detyruar Kievin të pezullojë eksportet dhe të mbështetet në importet e energjisë elektrike.

lufta ukraine-rusi

Sondazh

Poll

MË SHUMË