Bota

Humb jetën një nga pengjet, Izraeli dhe Hamasi akuzojnë njëri-tjetrin për vdekjen e tij

Hamasi ka pretenduar se vdekja e Barukut ishte shkaktuar nga Forcat e Mbrojtjes izraelite.

9 Dhjetor 2023, 18:39 Nga A.TH
Humb jetën një nga pengjet, Izraeli dhe Hamasi akuzojnë
foto ilustruese

GAZË- Sahar Baruk, 25 vjeç, një nga 240 pengjet e marra gjatë sulmit të Hamasit në Izrael më 7 tetor, u vra nga Hamasi, sipas një deklarate të përbashkët nga komuniteti i tij, kibutzi Be'eri dhe Forumi i Pengjeve dhe Familjeve të Zhdukura.

“Ne do të kërkojmë kthimin e trupit të tij si pjesë e çdo marrëveshjeje për kthimin e pengjeve. Ne nuk do të ndalemi derisa të gjithë të jenë në shtëpi.” shkruhet në deklaratën e komunitetit të tij, shkruan The Guardian.

Hamasi publikoi një video më parë që përshkruante Barukun me flokët e rruar, duke thënë se ai ishte mbajtur peng për 40 ditë. Video më pas tregoi trupin e tij të dhunuar dhe të mbuluar me gjak. Hamasi ka pretenduar se vdekja e Barukut ishte shkaktuar nga Forcat e Mbrojtjes izraelite.

Më parë, IDF tha se dy ushtarë izraelitë ishin plagosur rëndë në një mision të dështuar të shpëtimit të pengjeve të premten, por Haaretz raporton se IDF ia vë fajin vetëm Hamasit për vdekjen e Barukut.

“Ne e konsiderojmë organizatën terroriste Hamasin përgjegjëse për sigurinë e të rrëmbyerve dhe parashikojmë se ajo do të vazhdojë të përpiqet të përdorë terror psikologjik kundër qytetarëve të Izraelit dhe botës përmes shpërndarjes së dokumenteve të tilla, për qëllimet e saj vrastare”, thuhet në një deklaratë të IDF-së.

Baruk ishte një student i inxhinierisë elektrike në Universitetin Ben-Gurion, tha familja e tij. Ai kishte qenë në shtëpinë e nënës së tij me vëllain e tij Idan kur ndodhi sulmi. Idani ishte goditur dhe vëllai i tij qëndroi dhe u kujdes për të për orë të tëra, derisa shtëpia filloi të digjej dhe ata duhej të iknin. Sahar i mbijetoi sulmit, pasi Idan u hodh nga shtëpia që digjej për të gjetur një inhalator për vëllain e tij, i cili ishte astmatik. Idan u qëllua dhe u vra dhe Sahar u mor peng.

sahar baruk

Sondazh

Poll

MË SHUMË