Sport

Pas humbjes me Shqipërinë, Lewandowski bën thirrje për "ndryshime të mëdha"...

Sulmuesi polak nuk ka mundur të shpjegojë se çfarë po ndodh me ekipin kombëtar

12 Shtator 2023, 15:03 Nga DOSJA
Pas humbjes me Shqipërinë, Lewandowski bën thirrje për

POLONI - Sulmuesi Robert Lewandowski, kapiteni i skuadrës polake të futbollit, bëri thirrje për “ndryshime të mëdha” këtë të hënë, pas disfatës në Shqipëri dhe kur trajneri portugez Fernando Santos tha se nuk do të jepte dorëheqjen.

“Ndryshime të mëdha për të parë dritë në fund të tunelit”,- tha lojtari, pa specifikuar se çfarë ndryshimesh synonte, duke shtuar se nuk ka mundur të shpjegojë arsyet e rezultatit katastrofik të së dielës në Tiranë (humbjen 2-0).

Lewandowski, lojtari më i mirë i FIFA-s në vitet 2020 dhe 2021, u shfaq i pafuqishëm përballë skenarit aktual, veçanërisht pas paraqitjes së dobët ndaj shqiptarëve, në ndeshjen kualifikuese të grupit “E” për Kampionatin Evropian 2024.

“Ne kemi pasur probleme që nga fillimi i kualifikimeve”,- tha sulmuesi, pa mundur të shpjegojë se çfarë po ndodh me skuadrën, duke thënë se ata “dinin të luanin shumë më mirë” me të njëjtët lojtarë dhe se kanë potencial "për ta bërë këtë". 

Sulmuesi i Barcelonës shmangu të fliste për Fernando Santos, në një kohë kur zërat e kundërshtimeve ndaj trajnerit po rriten, duke kërkuar largimin e portugezit.

Rezultati i së dielës komplikon llogaritë e Polonisë, e cila ka pesë ndeshje të luajtura dhe gjashtë pikë në grupin “E”, pak përpara Ishujve Faroe (një pikë) dhe pas Shqipërisë (10), dhe Republikës Çeke dhe Moldavisë (të dyja me nga tetë).

Të dielën, pas ndeshjes në Tiranë, Fernando Santos deklaroi në një konferencë të vështirë për shtyp, se refuzon më shumë se një herë një skenar shkarkimi.

B.T (Dosja.al)

Sondazh

Poll

MË SHUMË