Aktualitet

'LIGJET'/ “Jam krenar”, Opozita i kthehet zv.ministrit Lamallari: Një fëmijë 13 vjeç për pak u vra në shtëpinë e tij. Policët janë kthyer tutorë kanabisi

Deputetja e Partisë Demokratike, Dhurata Çupi pyeti zëvendës ministrin sesi mund të jetë krenarë kur në vend po ndodhin krime gati çdo ditë. 

4 Korrik 2023, 10:45 Nga A.B

'LIGJET'/ “Jam krenar”, Opozita i kthehet zv.ministrit
Komisioni

TIRANË- Deklarata e zëvendës ministrit të Ministrisë së Brendshme se është krenar për punën e institucionit që drejton, u shoqërua me replika të ashpra nga ana e opozitës. Gjatë komisionit të Ligjeve, deputetja e Partisë Demokratike, Dhurata Çupi pyeti sesi mund të jenë krenarë kur në vend po ndodhin krime gati çdo ditë. Në mbledhjen e sotme, Komisioni i ligjeve dhe i Sigurisë pati debate lidhur me mungesën e sigurisë dhe nivelin e lartë të kiminalitetit në vend. Por edhe kultivimin dhe shitjen e drogërave.  Deputetët e opozitës i kërkuan informacion, zv.ministrit të Brendshëm, Besfort Lamallari, për ngjarjet kriminale, që ndodhin çdo ditë, duke thënë se qytetarët nuk kanë siguri as në shtëpitë e tyre. Ndërsa ai tha se ishte krenar për punën e bërë nga Ministria e Brendshme dhe Policia e Shtetit për kriminalitetin në vend. 

PJESË NGA DEBATI: 

Lamallari: Përsa kohë unë jam në atë institucion, prej 6 vitesh, faktet janë fakte. Jam shumë krenar dhe e them me përgjegjësi. Janë dhe institucionet zbatuese, kemi dhe drejtori që përkujdesen për parandalimin dhe zbatimin e ligjit, siç është dhe ISHP. Jam krenar dhe e them me përgjegjësi. Nuk mohojmë se ka krime, por as nuk do ketë asnjëherë.

Çupi: Për ça është krenar? Vrasje e krime përditë. Është e papranueshme, mes mund të thotë ai ashtu. Nuk jemi në kafe këtu që të japë mendim. Ai është përfaqësues i ministrisë dhe ka detyrimin të japë shpjegime.

Dogjani: Një fëmijë 13-vjeçar të shkojë në shtëpi dhe të vritet? Ça krenarie? Të vritesh në shtëpi…apo si në rastin e 13-vjeçarit që vritet te dera e shtëpisë? Që vriten dy veta në Dukagjin? Që vritet tjetri në shtëpi atje? Ju të vini këtu dhe të thoni; situata nuk është mirë. Këtu duhet të dihet se çfarë kërkon qytetari shqiptar. Kërkojmë të jemi të sigurt në shtëpitë tona. Po pihet drogë në shkolla. A është detyra e tyre për ta parandaluar? Flas si qytetar. Më vjen keq që vini këtu dhe thoni; jam krenar që pihet drogë dhe që vritet.

Metaliaj: A funksionon sistemi i parandalimit të krimeve? Kudo parcela me kanabis. Kudo inspektorë të Policisë që fshihen duke qenë edhe tutor të atyre parcelave.

Komisioni i ligjeve shqyrtoi këtë të hënë marrëveshjen me Mbretërinë e Arabisë Saudite për luftën ndaj krimit dhe konventën për shtypjen e akteve të terrorizmit bërthamor, që u miratua me dakordësi nga të dyja palët. Lidhur me ratifikimin e konventës ndërkombëtare për shtypjen e akteve të terrorizmit bërthamor, Lamallari bëri me dije se “kjo konventë është nënshkruar nga Shqipëria në 23 nëntor 2005”.

“Të gjitha aktet që parashikohen në konventë, duhet të transpozohen në ligjin vendas. Në kuadër të procesit screening, ne rishikuam kuadrin ligjor që Shqipëria kishte nënshkruar në përmbushje të detyrimeve karshi Kombeve të Bashkuara. Prandaj, ne vendosëm të procedojmë me këtë nisëm të qeverisë shqiptare për ta sjell në komision e për të vijuar me ratifikimin e kësaj konvente,” -bëri me dije Lamallari.

Teksa në mbledhje u diskutua konventa për shtypjen e akteve të terrorizmit bërthamor, deputetja e PD-së, Dhurata Çupi kërkoi informacione nëse ka burime radioaktive në vendin tonë apo jo.

BISEDA NË MBLEDHJE: 

Çupi: A keni informacion mbi burimet radioaktive në Shqipëri? Çfarë ka të shtuar ky kontroll? Mirë që firmosim letrat, por çështja është që të kontrollojmë territorin. Mbetet në letra, apo kemi informacione për burime radioaktive?

Lamallari: Në territorin e Republikës së Shqipërisë për gjendjen materiale radioaktive, por jo bërthamore. Ato janë për qëllime dobiprurëse, për shkencën dhe mjekësinë. Rregullat dhe standardet janë të përcaktuara. Ne jemi palë tashmë. Janë dhe institucionet zbatuese, kemi dhe drejtori që përkujdesen për parandalimin dhe zbatimin e ligjit, siç është dhe ISHP. Jam krenar dhe e them me përgjegjësi. Nuk mohojmë se s’do ketë asnjëherë. Faktet janë fakte..

Në fund, marrëveshja kaloi në Komision me miratimin e të dy palëve...

komisioni i ligjeve 4 qershor 2023 besfort lamallari

Sondazh

Poll

MË SHUMË