Bota

Netflix e portretizon Kleopatrën si grua me ngjyrë, 'protesta' në Egjipt: Po deformoni historinë!

Cleopatra lindi në qytetin egjiptian të Aleksandrisë në vitin 69 para Krishtit dhe u bë mbretëresha e fundit e një dinastie greqishtfolëse të themeluar nga gjenerali maqedonas Ptolemeu i Aleksandrit të Madh.

20 Prill 2023, 10:15 Nga k.m.
Netflix e portretizon Kleopatrën si grua me ngjyrë,
Cleopatra

KAIRO- Një serial dokumentarësh, i prodhuar nga Netflix që përshkruan mbretëreshën Cleopatra VII si një afrikane me ngjyrë, ka ndezur polemika në Egjipt. Një arkeolog këmbënguli se Kleopatra ishte "me lëkurë të çelët, jo të zezë", ashtu siç pretendohet nga dokumentari. Por aktorja që luan rolin kryesor u tha kritikëve: Nëse nuk ju pëlqen kastigu, mos e shikoni shfaqjen.

Cleopatra lindi në qytetin egjiptian të Aleksandrisë në vitin 69 para Krishtit dhe u bë mbretëresha e fundit e një dinastie greqishtfolëse të themeluar nga gjenerali maqedonas Ptolemeu i Aleksandrit të Madh. Ajo pasoi të atin Ptolemeun XII në 51 para Krishtit dhe sundoi deri në vdekjen e saj në vitin 30 para Krishtit. Më pas, Egjipti ra nën dominimin romak.

Identiteti i nënës së Kleopatrës nuk dihet dhe historianët thonë se është e mundur që ajo, ose ndonjë paraardhës tjetër femër, të ketë qenë një egjiptiane indigjene ose nga ndonjë vend tjetër në Afrikë. Jada Pinkett Smith, aktorja amerikane e cila ishte producente e serialit tha: Ne nuk shohim ose dëgjojmë shpesh histori për mbretëreshat e zeza, dhe kjo ishte vërtet e rëndësishme për mua, si dhe për vajzën time.

Por kur traileri u publikua javën e kaluar, shumë egjiptianë dënuan përshkrimin e Kleopatrës. Zahi Hawass, një egjiptologe e shquar dhe ish-ministre e antikiteteve, i tha gazetës al-Masry al-Youm: Është krejtësisht e rreme. Kleopatra ishte greke, që do të thotë se ajo ishte lëkurë e çelët, jo e zezë. Netflix po përpiqet të provokojë konfuzion duke përhapur fakte të rreme se origjina e qytetërimit egjiptian është e zezë.

E po ashtu, u bëri thirrje egjiptianëve të mbajnë qëndrim kundër gjigantit të transmetimit, Netflix.

Të dielën, avokati Mahmoud al-Semary paraqiti një ankesë pranë prokurorit publik duke kërkuar që ai të marrë "masat e nevojshme ligjore" dhe të bllokojë aksesin në shërbimet e Netflix në Egjipt. Ai pretendoi se seriali përfshinte materiale dhe përmbajtje që vizuale shkelnin ligjet e Egjiptit dhe akuzoi Netflix-in se po përpiqej të promovonte mendimin afrocentrik.

Tre vjet më parë, planet për një film për Kleopatrën me aktoren izraelite Gal Gadot shkaktuan një debat të ashpër në mediat sociale, pasi disa njerëz që këmbëngulnin që roli të merrej nga një aktore arabe dhe afrikane. Gadot më pas mbrojti vendimin për përfshirjen në kast duke u shprehur se: Ne po kërkonim një aktore maqedonase që mund t'i përshtatej Kleopatrës. Ajo nuk u gjet./BBC

cleopatra

Sondazh

Poll

MË SHUMË