Sport

Superiore/ Teuta, si shpesh herë, “macja e zezë” për Tiranën, Kastrioti 'pushton' Shkodrën, ‘dorëzohet’ Vllaznia...

“Djemtë e Detit” triumfojnë 2-0 ndaj bardhebluve, edhe pse mbetën me dhjetë lojtarë në fushë. Krutanët trajnerin Çela fitojnë 1-0 ndaj shkodranëve dhe marrin tri pike të çmuara në garën e tyre për mbijetesë.

25 Shkurt 2023, 20:06 Nga DOSJA

Superiore/ Teuta, si shpesh herë, “macja e zezë” për

TIRANE - Me dy ndeshjet e sotme mbyllet java e 23-të e Abissnet Superiores. Në “Air Albania” feston Teuta, që ia doli të triumfojë 0-2. Për më tepër, pati luksin të humbë një penallti dhe të luajë për më shumë se 20 minuta me një lojtar më pak.

“Djemtë e detit” morën avantazhin në minutën e 10-të me anë të Emiliano Vilës, ndërsa në minutën e 41-të Kallaku shpërdoroi nga pika e bardhë, duke humbur mundësinë e dyfishimit.

Ishte Visar Bekaj ai që priti goditjen e fantazistit, duke mbajtur në lojë Tiranën, që mori një tjetër bonus në minutën e 73-të, kur Gruda mori kartonin e dytë të verdhë dhe la Teutën me 10 futbollistë.

Megjithatë kur të gjithë prisnin golin e barazimit, ishte përsëri Emiliano Vila që shënoi edhe të dytin për Teutën, duke vulosur fitoren 2-0, mjaft të rëndësishme për durrsakët.

Këta të fundit kanë marrë 10 pikë në 4 ndeshjet e fundit dhe tani e shohin veten 9 pikë larg kreut. Me 13 javë ende në dispozicion, kur kanë grumbulluar 31 pikë, askush nuk mund t’ua heqë të drejtën të besojnë se mund të renditen më lart se vendi i gjashtë, ku janë pozicionuar aktualisht.

Zhgënjen edhe Vllaznia, që nuk arrin të përfitojë nga hapat fals të Tiranës e Partizanit. Edhe shkodranët janë mposhtur me rezultatin minimal 0-1 nga Kastrioti brenda në “Loro Boriçi”. Një gol i Redon Mihanës në minutën e 31-të vulosi fatin e sfidës në Shkodër.

Kastrioti rikthehet te fitorja pas plot një faze, kur mposhtte 1-0 sërish Vllazninë në Kamëz, më 16 dhjetor të vitit të kaluar. Nga ana tjetër, kuqeblutë shkodranë, në kuotën e 35 pikëve dhe n vendin e tretë, tregojnë se janë ende ajo skuadra e brishtë, që nuk di të krijojë vazhdimësi rezultatesh.

B.T (Dosja.al)