Aktualitet

FOTOT- Ekspozita “We the peoples” në sheshin 'Skëndërbej', shfaqen fytyrat e 333 njerëzve

Ekspozita “We the Peoples” do të qëndrojë hapur çdo ditë, ku pas sheshit “Skënderbej” do të vendoset edhe në sheshin “Italia” pranë stadiumit Air Albania.

24 Tetor 2022, 14:02 Nga A.B
FOTOT- Ekspozita “We the peoples” në sheshin
Portretet

TIRANË- Java e Kombeve të Bashkuara në Shqipëri, ka hapur siparin në Tiranë, me një ekspozitë befasuese ku protagonistë janë vetë shqiptarët. Portretet me përmasa gjigante të 333 njerëzve të zakonshëm u vendosën në sheshin “Skënderbej” duke tërhequr kërshërinë e qytetarëve që mund të gjenin midis tyre fytyrat e të njohurve, miqve, të afërmve apo edhe të vetvetes.

Ekspozita “We the peoples”, vepër e artistit të ri David Cuka është vetëm një pjesëz e një koleksioni të madh me 999 portrete shqiptarësh me të cilat ai dokumenton imazhe, gjendje e veprime të jetës së përditshme të qytetarëve, të rinjve e pjesëtarëve nga bashkësi të çdo kategorie, të cilët popullojnë e përbëjnë shoqërinë tonë të shekullit XXI.

Secila foto, e ndërlidhur me të gjitha të tjerat është pjesë e një sistemi organik që vepron si një i vetëm duke dhënë jo vetëm nga ana figurative, mesazhin se fytyra e Kombeve të Bashkuara është ajo që përftohet kur bashkohen fytyrat e të gjithë qytetarëve që përbëjnë kombet e saj. Pranë ekspozitës, përfaqësues të agjencive të Organizatës së Kombeve të Bashkuara në Shqipëri kanë ndarë me të pranishmit mesazhe mbi rolin e këtij institucioni të madh mbarëbotëror, ku Shqipëria është anëtare prej vitit 1947, e së fundi përkohësisht edhe pjesë përbërëse e Këshillit të Sigurimit, organit më të lartë vendimmarrës të OKB.

Përgjatë javës së Kombeve të Bashkuara është menduar që të dëshmohet sa më mirë afërsia e kësaj organizate globale, me qytetarët prej të cilëve ajo rrjedh, e të cilëve ajo u shërben.

Aktivitetet do të jenë të shumta e do të zgjaten përgjatë gjithë javës e territorit, duke udhëtuar përveç Tiranës edhe në qytete të Shqipërisë si Durrësi, Përmeti e Puka.

Ekspozita “We the Peoples” do të qëndrojë hapur çdo ditë, ku pas sheshit “Skënderbej” do të vendoset edhe në sheshin “Italia” pranë stadiumit Air Albania. Nje pjese e ekspozites do të udhëtoje disa qytete të Shqipërisë ghatë javës së kombeve të bashkuara. (Puke dt 26, Përmet Dt 27 Tetor dhe Durrës Dt 28 Tetor)

https://albania.un.org/sites/default/files/2022-10/jkn_un_week_program_final.pdf

ekspozita we the people

Sondazh

Poll

MË SHUMË