Politike

Alibeaj në ditët e fundit si kreu i gr.të PD, Gështenja mundohet ta ndihmojë, darkë me kolegë

Dosja.al ka mësuar detaje lidhur me takimin, ku burime nga selia blu bëjnë me dije se në fakt të gjitha ftesat ishin për të gjithë deputetët që nuk janë mbështetës së kreut të Partisë Demokratike, Sali Berishës.

31 Gusht 2022, 20:04 Nga k.m.
Alibeaj në ditët e fundit si kreu i gr.të PD, Gështenja
Enkelejd Alibeaj, Lefter Gështenja dhe Sali Berisha

TIRANË- Deputetët e Partisë Demokratike janë mbledhur sot për një darkë. Darka jozyrtare është organizuar nga Lefter Gështenja, i cili i ka ftuar kolegët e tij në ambientin e një hoteli në zonën e "21 dhjetorit" në Tiranë. Dosja.al ka mësuar detaje lidhur me takimin, ku burime nga selia blu bëjnë me dije se në fakt të gjitha ftesat ishin për të gjithë deputetët që nuk janë mbështetës së kreut të Partisë Demokratike, Sali Berishës.

Të njëjtat burime bëjnë me dije se takimi ka qëllim për të shpëtuar Enkelejd Alibeajn nga shkarkimi si kreu i grupit parlamentar. Post në të cilin, pas zgjedhjeve në selinë blu, është votuar deputeti Luçiano Boçi. Por në mbledhjen e sotme, edhe pse kanë marrë pjesë deputetë që mund të konsiderohen si 'asnjëanës', si përshembull Tomor Alizoti, sërish nuk ka epërsi në numra.

Në darkën e sotme janë mbledhur: Andia Ulliri, Gazment Bardhi, Seladin Jakupllari, Ferdinand Xhaferraj, Saimir Koreshi, Dhurata Çupi, Dash Sula, Zheni Gjergji, Ilda Dhori, Helidon Bushati, Lefter Gështenja. Por janë rreth 20, ndërkohë që gjysma e grupit është 26 deputetë, gjë që tregon se Alibeaj do të duhet që të bëjë aleatë të tjerë për të mbajtur postin e numrit dy të PD-së. Ndërkohë që nesër, për çështjen e grupit parlamentar do të mblidhet e Kryesia e Partisë Demokratike, por ende nuk është caktuar ora.

Më 15 janar 2021, ish-kreu i PD, Lulzim Basha vendosi që Enkelejd Alibeaj të  merrte postin e kryetarit të grupit parlamentar, të cilin e mbante Alfred Rrushaj. Ndërsa disa ditë më parë, Gështenja në një intervistë për “Euroneës” u shpreh se Alibeaj nuk është rrëzuar ashtu siç e parashikon statuti i partisë. Ndër të tjera, Gështenja shtoi se i takon Grupit Parlementar të vendosë nëse do e heqë Alibejan dhe të hapë një garë për ta zëvendësuar atë.

“Për sa kohë nuk është rrëzuar ashtu siç parashikohet në statut apo edhe në kegjislacionin bazë, nuk kemi një hap për zëvëndësimin e këtij pozicioni, unë them se e gëzon mbështetjen. Në momentin që Grupi Parlamentar prej 52 deputetësh do të mblidhet, do të vendosë largimin e zotit Alibeaj dhe hapjen e garës për një kryetar të ri ose për rikonfirmimin e tij, do jemi në një moment të dytë. Besoj se kjo është vendimmarrja e Grupit Parlamentar."

Megjithatë pritet për t'u parë se cilat do të jenë zhvillimet e tjera të PD-së, ndërkohë që shumë shpejt do të rikthehet edhe Kuvendi, i cili mblidhet për herë të parë pas pushimeve të verës më 5 shtator. 

enkelejd alibeaj lefter geshtenja darka e lefter geshtenjes

Sondazh

Poll

MË SHUMË