Aktualitet

U bllokuan në Kanionin e Langaricës, shpëtohen turistët francezë, momenti kur policia i nxjerr nga lumi

Shërbimet e Komisariatit të Policisë Përmet, në bashkëpunim me shërbimet zjarrfikëse kanë ndërhyrë në zonë dhe kanë bërë të mundur lokalizimin e turistëve, në Kanionin e Langaricës.

11 Gusht 2022, 19:37 Nga F.M
U bllokuan në Kanionin e Langaricës, shpëtohen turistët
Momenti i shpëtimit të turistëve, Përmet

PËRMET- Dy turistë francezë që u bllokuan në Kanionin e Langaricës në Përmet janë shpëtuar nga efektivët e Policisë së Shtetit. Në njoftimin zyrtar, policia bën me dije se reth orës 16:15, kanë marrë njoftimin se francezët, duke eksploruar me këmbë zonën e quajtur "Kanioni i Langaricës", kanë mbetur të bllokuar për shkak të rritjes së nivelit të ujit në lumin e Langaricës, nga reshjet e shiut. Më pas, shërbimet e Komisariatit të Policisë Përmet, në bashkëpunim me shërbimet zjarrfikëse kanë ndërhyrë në zonë dhe kanë bërë të mundur lokalizimin e turistëve, në Kanionin e Langaricës. Atyre u është ofruar kontrolli mjekësor dhe aktualisht ndodhen në gjendje të mirë shëndetësore.

Njoftimi i policisë:

Punonjësit e Policisë, të përkushtuar dhe të angazhuar për garantimin e rendit dhe sigurisë publike dhe për t’u ardhur në ndihmë turistëve dhe vizitorëve. Më datë 11.08.2022, rreth orës 16:15, në sallën operative Përmet ka ardhur një telefonatë se dy turistë francezë, duke eksploruar me këmbë zonën e quajtur "Kanioni i Langaricës", në Përmet, kanë mbetur të bllokuar në pjesën e kanionit, për shkak të rritjes së nivelit të ujit në lumin e Langaricës, nga reshjet e shiut. Menjëherë pas marrjes së njoftimit, shërbimet e Komisariatit të Policisë Përmet janë nisur në drejtim të zonës ku kishin mbetur të bllokuar turistët. Shërbimet e Komisariatit të Policisë Përmet, në bashkëpunim me shërbimet zjarrfikëse dhe punonjësit e subjektit privat "Vjosa Explorer", kanë ndërhyrë në zonë dhe kanë bërë të mundur lokalizimin e turistëve, në Kanionin e Langaricës. Gjatë kërkimit për 2 turistët francezë, i është dhënë ndihmë dhe një shtetasi të moshuar, i cili gjithashtu kishte mbetur i bllokuar në këtë zonë. Punonjësit e Policisë, së bashku me shërbimet zjarrfikëse dhe punonjësit e "Vjosa Explorer", i kanë nxjerrë 2 turistët dhe shtetasin e moshuar nga terreni i vështirë ku ishin bllokuar dhe më pas u është ofruar kontrolli mjekësor. Aktualisht ndodhen në gjendje të mirë shëndetësore. DVP Gjirokastër falënderon subjektin privat "Vjosa Explorer", për bashkëpunimin dhe ndihmën e ofruar për ndërhyrjen në zonën ku kishin mbetur të bllokuar turistët e huaj, si dhe fton qytetarët që për çdo rast nevoje për ndihmë të telefonojnë në numrin pa pagesë 112.

 

bllokohen turistet franceze kanioni i langarices permet

Sondazh

Poll

MË SHUMË