Bota

Britania e Madhe firmos ekstradimin e Julian Assange në SHBA

17 Qershor 2022, 12:23 Nga d.d

BRITANI E MADHE- Sekretarja e Brendshme e Britanisë së Madhe Priti Patel nënshkroi urdhrin e ekstradimit të themeluesit të WikiLeaks, Julian Assange, pas një vendimi të gjykatës britanike në prill se Assange mund të dërgohej në SHBA.

Qeveria britanike ka urdhëruar ekstradimin e Assange në Shtetet e Bashkuara për t'u përballur me akuzat për spiunazh. ëikileaks është përgjigjur duke thënë se Assange do të apelojë ekstradimin e tij.

“Sot nuk është fundi i luftës. Është vetëm fillimi i një beteje të re ligjore. Ne do të apelojmë përmes sistemit ligjor”, thuhet në një deklaratë në llogaritë e Wikileaks në Twitter.

Sipas mediave të huaja, një gjykatës britanik miratoi ekstradimin në prill, duke ia lënë vendimin përfundimtar qeverisë. Vendimi erdhi pas një beteje ligjore që shkoi deri në Gjykatën e Lartë të Mbretërisë së Bashkuar.

Organizatat e gazetarisë dhe grupet e të drejtave të njeriut i kanë bërë thirrje Britanisë të refuzojë kërkesën për ekstradim. Mbështetësit dhe avokatët e Assange, argumentojnë se ai po vepronte si gazetar dhe ka të drejtë për mbrojtjen e lirisë së fjalës.

Assange është mbajtur në burgun Belmarsh të sigurisë së lartë në Londër që nga viti 2019, kur ai u arrestua për anashkalimin e lirimit me kusht gjatë një beteje të veçantë ligjore.

julian assange wikileaks