Aktualitet

"Erdhi i gjakosur dhe me dokumentat e një gruaje", dëshmia e mikut që fundos vrasësin e Nevila Pjetrit

Shkou dëshmoi se 32-vjeçari ishte ndërruar duke i marrë një bluzë shokut të tij dhe duke justifikuar praninë e gjakut me një mosmarrëveshje që kishte patur gjatë asaj dite.

13 Qershor 2022, 12:37 Nga d.a
"Erdhi i gjakosur dhe me dokumentat e një gruaje", dëshmia e
Camilla, Bedini dhe Nevila Pjetri

ITALI- Edhe pse vazhdon të thotë se është i pafajshëm në lidhje me vrasjen e 32-vjeçares shqiptare Nevila Pjetri dhe transeksuales Camilla, 32-vjeçarin italian e 'fundosi' dëshmia e shokut të tij.

Sipas mediave vendase, një miku i Daniele Bedinit para hetuesve u shpreh se natën e krimit të dyfishtë, ata ishin takuar të dy. Bedini kishte vajtur në shtëpinë e mikut të tij dhe ishte i tronditur dhe rrobat i kishte me gjak.

“E takova në mes të natës, ai erdhi tek unë, ishte i tronditur dhe i lagur. Ai kishte një këmishë të zezë të pistë dhe të njollosur me gjak ”, u ka treguar miku karabinierëve të cilët po përpiqen të konfirmojnë alibinë e Bedinit.

Shkou dëshmoi se 32-vjeçari ishte ndërruar duke i marrë një bluzë shokut të tij dhe duke justifikuar praninë e gjakut me një mosmarrëveshje që kishte patur gjatë asaj dite.

“Bedini qante dhe kishte dokumentet e një gruaje",-vijon dëshminë shoku i tij i cili u shpreh se menjëherë dyshoi se ai mund të kishte bërë diçka të rëndë.

Dëshmia e tij vërtetohet nga fakti se, sipas asaj që doli nga hetimet, gjatë kontrollit në shtëpinë e të dyshuarit janë gjetur disa objekte dhe dokumente që i përkasin Camilla -s. Dëshmia, bashkë me videot e shumta nga kamerat e vëzhgimit dhe dokumentet e gjetura në shtëpi, sipas hetueses, “nuk mund të jenë thjesht rastësi”.

Daniele Bedini, për gjyqtarin, është një subjekt që "përçmon jetën e të tjerëve dhe mund t'ua heqë atë për arsye të kota", dhe ndaj të cilit ekziston një sërë provash që vërtetojnë fajësinë e tij. Hetuesit besojnë se Bedini vrau Nevila Pjetrin dhe Camillën për t'i grabitur. Motivi, sipas hetuesve, do të ishte nevoja e të dyshuarit për të mbledhur para për të blerë drogë, varësi nga e cila vuante prej disa kohësh dhe nga e cila, megjithatë, tha se kishte dalë.

Burri, për të cilin tashmë ishte në pritje një dënim i formës së prerë për një grabitje të kryer në vitin 2019, nuk iu përgjigj pyetjeve të gjyqtarit hetues gjatë marrjes në pyetje të garancisë. Megjithatë, më parë ai kishte pohuar se ishte në lokal me miqtë dhe qenin gjatë vrasjes së Nevilës.

Ndërkohë, hetuesit po fokusohen në kërkimin e armës së vrasjes, një pistoletë e kalibrit të vogël, pikërisht si ajo që i ati i Bedinit raportoi të vjedhur pasi kuptoi se ishte zhdukur nga një kasafortë.

nevila pjetri

Sondazh

Poll

MË SHUMË