Aktualitet

Krimi tek 3! Efektivi akuzohet për 'vrasje me paramendim', dëshmia: Më shau, s'punonte, pinte

Në shtëpinë e të riut janë gjetur edhe medikamente që kurojnë depresionin. Ende nuk dihet me saktësi, por paraprakisht është raportuar se Zaimi si pasojë e ofendimeve në punë ishte mbyllur në vetvete dhe u ishte drejtuar qetësuesve. Kolegët e tjerë në komisariatin 3 e përshkruajnë Saliasin si një person që bënte batuta e humor, por jo bullizues.

24 Maj 2022, 15:19 Nga DOSJA
Krimi tek 3! Efektivi akuzohet për 'vrasje me paramendim',
Ludjan Zaimi dhe Çaush Saliasi

TIRANË- Komisariati numër 3, një prej vendeve ku qytetarët shkelin për të gjetur drejtësi u kthye në një skenë krimi e u rrethua me shiritet e verdhë. Ludjan Zaimi, efektivi 25-vjeçar qëlloi gjashtë herë në drejtim të kolegut të tij, Çaush Saliasi, i cili shërbente mbi 20 vite në radhët e uniformave blu. Gjithçka ndodhi teka ndërroheshin turnet e bëhet instruktazhi. Sipas dëshmisë së dhënë nga vetë i riu, pas një seri sharjesh nga kolegu Saliasi ai nuk ka duruar më dhe ka nxjerrë armën e shërbimit. Kolegëve të tjerë që ishin të pranishëm në sallë u ka kërkuar që të ulnin kokat dhe ka shënjestruar Saliasin.

Pamjet ku blutë e komisariatit nr.3 shiheshin teksa transportonin me makinën e shërbimit 55-vjeçarin bënë xhiron e të gjitha mediave një natë më parë, por pavarësisht se Saliasit iu dha ndihma mjekësore, nuk iu mbijetoi plagëve të marra. Ai ndërroi jetë, ndërsa efektivët e tjerë i vunë pranga kolegut të tyre. 25-vjeçari që si zgjedhje për jetën kishte bërë që t’i shërbente shtetit, tashmë ndodhet pas hekurave, aty ku janë mbyllur shkelësit e ligjit.

Në dëshminë e tij, Zaimi ka treguar se Saliasi e shante nga ‘nëna’, e bullizonte vazhdimisht dhe e quante ‘qorr’ për shkak se mbante syze optike. Ai ka shtuar se Saliasi as nuk punonte e shkonte i pirë në punë.

“Po bënim instruktazhin në momentin kur ndodhi ngjarja. Çaushi vijoi me përsëritjen e fjalëve dhe veprimeve fyese ndaj meje, me shau nga familja dhe ofendime te tjera, nuk durova dhe e qëllova. Jam përplasur edhe më herët me të, edhe në kohën kur kemi qenë në krye të detyrës, pasi me ofendonte shpesh. Konsumonte alkool dhe shfaqte sjellje denigruese ndaj meje dhe e kam duruar gjate gjithë kohës. Jam penduar për veprimin që kam bërë, ishte moment dobësie dhe mungese të vetëpërmbajtjes nga ana ime,”- ka thëne 25-vjeçari.

Në shtëpinë e të riut janë gjetur edhe medikamente që kurojnë depresionin. Ende nuk dihet me saktësi, por paraprakisht është raportuar se Zaimi si pasojë e ofendimeve në punë ishte mbyllur në vetvete dhe u ishte drejtuar qetësuesve. Kolegët e tjerë në komisariatin 3 e përshkruajnë Saliasin si një person që bënte batuta e humor, por jo bullizues. Gjithsesi, Agjencia e Mbikëqyrjes Policore ka ngritur një grup hetimi që po merret me ngjarjen dhe të riun e akuzon për kryerjen e veprës penale “Vrasje me paramendim”.

Kjo vrasje brenda dyerve të Policisë së Shtetit ka sjellë edhe reagime nga politika. Edhe pse të përçarë, PD-ja sot ka pasur vetëm një thirrje e kërkesë, shkarkimin e ministrit të Brendshëm Bledi Çuçi. Thirrje kanë bërë ish-kryeministri Sali Berisha, Enkelejd Alibeaj dhe Flamur Noka.

(f.m/dosja.al)

Sondazh

Poll

MË SHUMË