Bota

'Do të bisedojmë për negociatat', kryeministri maqedonas takim me homologun bullgar në Vatikan

Sipas mediave vendase, gjatë qëndrimit në Romë Kovaçevski ditën e sotme pritet që të mbajë një takim me homologun bulgar Kiril Petkov.

23 Maj 2022, 12:43 Nga DOSJA
'Do të bisedojmë për negociatat', kryeministri

VATIKAN-Kryeministri i Maqedonisë së Veriut Dimitar Kovaçevski i shoqëruar nga ministri i jashtëm, Bujar Osmani, ministri i brendshëm Oliver Spasovski dhe ministrja e kulturës Biseri Kostandinovska-Stojçevska ka mbërritur në Vatikan për një vizitë dyditore.

Sipas mediave vendase, gjatë qëndrimit në Romë Kovaçevski ditën e sotme pritet që të mbajë një takim me homologun bulgar Kiril Petkov.

Takimi siç mësohet do ta zhvillohet në orën 17:00 në Romë, ndërsa Kovaçevski i tha shkurt mediave se me Petkovin do të bisedohet për negociatat e deritanishme.

“Do të takohem me Petkov për të biseduar mbi negociatat të cilat janë zhvilluar deri tani mes dy ministrive të jashtme”, tha shkurt Kovaçevski pas takimit që kishte me Papa Françeskun në Vatikan.

Bullgaria, si shtet anëtar i BE-së, në nëntor të vitit 2020 ka përdorur veton për të bllokuar Maqedoninë e Veriut për nisjen e bisedimeve të anëtarësimit evropian. Sofja konteston gjuhën dhe identitetin maqedonase duke kërkuar nga Shkupi që të pranojë “rrënjët bullgare” në identitetin e tyre. Bullgaria gjithashtu kërkon respektimin e të drejtave të bullgarëve që jetojnë në Maqedoninë e Veriut duke kërkuar përfshirjen e tyre në kushtetutën e këtij vendi, si popull shtetformues.

(d.a/dosja.al)

Sondazh

Poll

MË SHUMË