Aktualitet

LIVE-PD mbledh Kuvendin, kryetari zgjidhet më 22 maj, Berisha: Priten beteja! Nis numërimi

30 Prill 2022, 05:21 Nga DOSJA

LIVE-PD mbledh Kuvendin, kryetari zgjidhet më 22 maj, Berisha: Priten

TIRANË– Për rreth 8 orë, Sali Berisha mbajti sot Kuvendin Kombëtar, ku në Pallatin e Kongreseve u mblodhën 1425 delegatë, por tani në PD ka nisur procesi i numërimit të votave për anëtarët e Këshillit Kombëtar. Ditën e sotme, para mbështetësve të tij, ish-kryeministri Sali Berisha është zotuar se do ta sjellë Partinë Demokratike në pushtet e se do të nisë fuqishëm betejën kundër qeverisë së kryeministrit Edi Rama, të cilën e konsideron kriminale. Lideri historik i PD-së garantoi këtë të premte në Kuvendin e Partisë Demokratike se Shqipëria do të jetë vendi me taksat më të ulëta në Evropë. Përballë 1425 delegatëve, Berisha akuzoi edhe njëherë ish-kryetarin e Partisë Demokratike, Lulzim Basha për pazare me kryeministrin Edi Rama. Në Kuvend folën edhe Albana Vokshi, Rudina Hajdari, Belind Këlliçi, Arben Imami, Artan Hoxha e Jozefina Topalli. Kjo e fundit madje u përlot dhe tha se kishte mbetur pa fjalë kur kishte parë bashkimin e demokratëve.

Kuvendi i 30 prillit që u mbajt në Pallatin e Kongreseve mbështetet nga vetëm 35 nga 53 deputetë që ka grupi parlamentar i Partisë Demokratike. Dosja.al ka zbardhur emrat e deputetëve që janë prezentë në sallë dhe të atyre që sot e kanë bojkotuar këtë Kuvend që për PD-në konsiderohet historik e rithemelim i Opozitës historike. Ajo që vihet re është se shumica e deputetëve, 66% e tyre, nuk janë prezant në sallë, ndërsa pjesa tjetër, 34% e mbështesin Kuvendin e PD. Pjesë e Kuvendit të Partisë Demokratike janë bërë edhe personazhë publikë. Mes tyre, Dosja.al vuri re prezencën e modeles Ada Deda, vajzës së Albina Dedës e cila është kandidatë për anëtare këshilli në PD. Gjithashtu, prezente në sallë është edhe Fjoralba Dizdari e Erla Mëhilli, ish-zëdhënësja e liderit historik të PD-së, Sali Berisha si dhe këngëtari Renis Gjoka. Kuvendit sot iu bashkuan dhe dy deputetët Ina Zhupa e Kasëm Mahmutaj.

Kuvendi i Partisë Demokratike ka miratuar ndryshimet statutore. Ishte deputeti Belind Këlliçi ai që lexoi ndryshimet nen për nen dhe mori aprovimin me votë me dorë. Ajo që u vulos ishte edhe shkarkimi nga detyra i kreut të grupit parlamentar të PD Enkelejd Alibeaj. Belind Këlliçi shpalli vakancën e kryetarit të grupit parlamentar të PD. Data për zgjedhjen e kreut të ri të PD-së u caktua 22 maji. Në kuvendin Kombëtar të PD-së është marrë vendimi që tu jepet fund praktikave jodemokratike dhe qasjeve të dështuara politike. Në rezolutën e miratuar, shkruhet se PD është distancuar nga praktika e bojkotit të zgjedhjeve, djegies së mandateve, si dhe mënyrës se si Lulzim Basha e ka drejtuar PD-në, gjë që sipas rezolutës është jodemokratike. Në rezolutë theksohet se PD-ja rikonfirmon aspiratën për të cilën PD u themelua: integrimin europian të vendit dhe mbështetjen për institucionet euro-atlantike dhe Shtetet e Bashkuara të Amerikës. Momentalisht po vijon numërimi i votave për anëtarët e Këshillit Kombëtar të PD-së.

Me përfundimin e punimeve tek salla e Kongresit, numërimi i votave ka nisur LIVE në hyrë të selisë së PD-së. Dosja.al ka zbardhur edhe listën e plotë me emrat që do të kandidojnë në Këshillin Kombëtar të PD-së. Mes tyre ka juristë, këngëtarë, mjekë e jo vetëm.

LIVE-PD mbledh Kuvendin, kryetari zgjidhet më 22 maj, Berisha: Priten beteja! Nis numërimi

Sondazh