Bota

Politico: Mario Draghi, teknokrati dhe personi më i fuqishëm në Evropë

13 Dhjetor 2021, 11:35 Nga DOSJA

Politico: Mario Draghi, teknokrati dhe personi më i fuqishëm në

ITALI –Në renditjen vjetore të POLITICO të njerëzve më me ndikim në Evropë, përveç personit më të fuqishëm në kontinent lista është e ndarë në tre kategori…bërësit, ëndërrimtarët dhe përçarësit dhe secila kategori përfaqëson një lloj tjetër pushteti.

Në kategorinë e personit më të fuqishëm në Evropë është zgjedhur Kryeministri italian Mario Draghi. Italianët nuk janë mësuar t’i shohin kryeministrat e tyre në detyrë për një kohë të gjatë, por shumë shpresojnë që Mario Draghi të jetë një përjashtim. Kjo për shkak se ish-shefi i Bankës Qendrore Evropiane ka sjellë një balancë në politikën kombëtare në Romë, duke e mbajtur vendin stabël teksa kërkon të dalë nga pandemia me një sërë reformash ekonomike.

I lidhur me asnjë parti, Draghi po qeveris Italinë si një teknokrat, duke i dhënë rëndësinë e humbur një vendi që prej kohësh ka rënë nën peshën e tij në arenën evropiane. Që nga Brexit, Bashkimit Evropian i ka munguar një lojtar i tretë për t’iu kundërvënë Parisit dhe Berlinit. Me Draghin, Italia ka një lider që mund ta tërheqë vendin në zemër të çështjeve evropiane ashtu si largimi i kancelares gjermane Angela Merkel i hap një hapësirë atij si udhëheqës de fakto i BE-së, të paktën për çështjet ekonomike. Kjo do të jetë veçanërisht e vërtetë nëse Draghi mund të “çimentojë” një aleancë pune me presidentin francez Emmanuel Macron dhe pasardhësin e Merkelit, Olaf Scholz, duke krijuar një treshe qendrore që mund të ndryshojë në mënyrë dramatike mënyrën se si Evropa funksionon.

Draghi nuk ka pasur një jetë të lehtë. Ai humbi të dy prindërit në vitet e adoleshencës, duke e detyruar atë të përshtatet herët me moshën madhore. Pas kësaj erdhën studimet e tij në MIT si ekonomist dhe një qëndrim në Bankën Botërore. Më pas ai punoi në thesarin italian, Goldman Sachs, Bankën e Italisë dhe BQE. Një 74-vjeçar i padukshëm, me mendje akademike, ai njihet më së shumti për stabilizimin e tregjeve financiare si president i BQE-së në vitin 2012, duke deklaruar se do të bënte çfarëdo që të duhej për të shpëtuar euron. Dhe e mbajti fjalën. Euro u rimëkëmb gjatë krizës financiare dhe krizës së borxhit.

Tani Draghi është nën presion për të dhënë përsëri prova. Italia është marrësi i këstit më të madh të fondit të rimëkëmbjes NextGenerationEU të Komisionit Evropian. Është në rrugën e duhur për të marrë 191.5 miliardë euro grante dhe kredi në këmbim të kryerjes së një sërë reformash që Brukseli shpreson se do ta vendosin vendin në një rrugë rritjeje. Nëse Draghi mund të arrijë atje ku kanë ngecur kaq shumë kryeministra, ai mund të mbahet mend si ai që më në fund gjeti recetën për ta nxjerrë vendin nga më shumë se 20 vjet ngërç ekonomik. Po aq e rëndësishme, ai do të ketë vërtetuar efektivitetin e vendimit të BE-së për të nxjerrë borxhe të përbashkëta për të ndihmuar vendet të rikuperohen nga kriza e koronavirusit. Suksesi i tij nuk është aspak i garantuar. Roli i Draghit si një i huaj politik është gjithashtu një disavantazh. Pa një grup politik të tijin, ai qëndron jashtë familjeve të mëdha politike evropiane dhe është i përjashtuar nga arritjet e tyre para samitit.

“Ai është një gjeneral fantastik, por një gjeneral pa trupa”, tha një diplomat i BE-së në Bruksel. Muajt e tij të parë në detyrë si kryeministër ekspozuan gjithashtu një naivitet kur bëhet fjalë për menaxhimin e gjeopolitikës. Atij iu deshën muaj për të ndrequr një grindje me presidentin rebel të Turqisë, Recep Tayyip Erdoğan, një figurë qendrore në konfliktin në Libi, pasi e quajti atë një “diktator”. Ai gjithashtu e ka vënë veten në mes të politikës së fuqive të mëdha pasi thirri një samit të G20, vetëm që Kina dhe Rusia të mos dërgojnë liderët e tyre.

Pastaj është fakti që ai po punon kundër kohës. Italia duhet të mbajë zgjedhje të përgjithshme deri në vitin 2023, një garë në të cilën Draghi pothuajse me siguri nuk do të kandidonte dhe si një njeri pa parti, ai do të luftonte për të fituar gjithsesi. Ndërkohë, e djathta ekstreme italiane po rritet në sondazhe, duke kërcënuar të zhbëjë axhendën e tij. Eemri i tij është përmendur si një kandidat i mundshëm për president, një rol kryesisht ceremonial që shërben kryesisht si një garantues i stabilitetit politik dhe rendit kushtetues. Ai pozicion, i cili ka një mandat shtatëvjeçar, duhet të plotësohet në janar. Do të thotë se parlamenti italian mund të detyrohet të zgjedhë midis Dragit që do të udhëheqë vendin për muajt e ardhshëm ose do ta udhëheqë atë nga lart për pjesën e mbetur të dekadës.

(m.k/dosja.al)

Cila mendoni se është alternativa më e mirë:

View Results

bota rajoni kryeministri i ri i italisë mario draghi mario draghi mario draghi kryeminister i italise qeveria e mario draghi kryeministri i ri i italisë mario draghi mario draghi mario draghi kryeminister i italise qeveria e mario draghi