Tensionet te "Media"/ Bardhi dhe Noka përplasen me Açkën: Mos shkel mbi votat e demokratëve. Deputetja: Shfaqje jo e hijshme

TIRANË- Pas debateve dhe tensioneve në mbledhjen e Komisionit të Medias ka reaguar kryetarja e Kuvendit, Lindita Nikolla, e cila tha se sjellja e tyre është shkelje e Rregullores së Kuvendit dhe e etikës së sjelljes së deputetit.

Sipas saj dy deputetët penguan me dhunë zhvillimin e mbledhjes dhe fyen rëndë kryetaren e Komisionit, Flutura Açkën.

“Dhuna e ushtruar prej deputetëve Bardhi dhe Noka i kaloi caqet e dhunës verbale, dhe për këtë flasin pamjet e transmetuara nga media’, shkruan ajo.

REAGIMI I PLOTË:

Dënoj ashpërsisht ngjarjen shumë të rëndë që ndodhi sot në Komisionin e Medias të Kuvendit të Shqipërisë. Deputetët Gazment Bardhi dhe Flamur Noka, jo vetëm penguan me dhunë zhvillimin e mbledhjes së Komisionit, por fyen rëndë Kryetaren e Komisionit, deputeten e nderuar Flutura Açka.

Ky sulm i paprecendent ndaj një zonje deputete të Kuvendit të Shqipërisë, është shumë më tepër se shkelje e Rregullores së Kuvendit dhe e etikës së sjelljes së deputetit.

Në një kohë kur Kuvendi është duke punuar për ashpërsimin e legjislacionit kundër dhunës ndaj grave, në mjediset e tij, në një sallë mbledhjesh ku duhet të zhvillohet debat për ligjet dhe prej nga duhet të rrezatohet edukatë dhe qytetari, në sy të kolegëve, medias dhe gjithë qytetarëve, dy deputetë ushtrojnë dhunë ndaj një kolegeje të tyre, deputete dhe Kryetare Komisioni. Dhuna e ushtruar prej deputetëve Bardhi dhe Noka i kaloi caqet e dhunës verbale, dhe për këtë flasin pamjet e transmetuara nga media.

Gazment Bardhi

TIRANË- Kreu i Grupit Parlamentar të Partisë Demokratike, Gazment Bardhi ka reaguar pas fjalëve të deputetit Lulzim Basha në drejtim të tij.

Bardhi e ka quajtur Bashën "të paburr" dhe si një politikan i cili sipas Bardhit nuk përballet me qeverinë por shton katet e kullave. 

REAGIMI I GAZMENT BARDHIT:

Absolutisht i keqardhur nga debati me kolegë të opozitës! Por, është fakt i njohur që opozita është në një betejë kundër mazhorancës në Kuvend, dhe çdo opozitar duhet të jetë krah nesh në këtë betejë, dhe jo përballë njëlloj si Edi Rama. Tentativa për të provokuar me “normalitet të rremë” i kolegëve të opozitës, nuk mund të jetë kurrë strategjia e një opozitari. Ajo është vetëm strategjia e një të paburri, që vetë rri në shtëpi e kujdeset të shtojë katet në Kulla, ndërkohë që keqpërdor për fasadë të pazareve në kurriz të demokratëve, ndershmërinë e disa zonjave deputete, që vazhdojnë të besojnë gënjeshtrat e tij!

flutura acka

TIRANË- Kryetarja e Komisionit të Medias dhe njëkohësisht anëtarja e grupit të Bashës, Flutura Açka ka folur për mediat pas tensioneve dhe debateve të zhvilluara në mbledhje.

Ajo tha se ishte në mbështetje të komisioneve hetimore dhe se përplasja me kolegët ishte një shfaqje jo e hijshme. 

“Sot përballem me një përplasje me kolegët e mi që mendojnë se ne duhet të mbajmë në kaos parlamentin. Personalisht e shoh si një gjest jo të mirë dhe jashtë detyrës time si deputetë të dal dhe të bërtas nëpër korridor dhe mos tregoj ku e ka plagën kjo qeveri, çfarë vjedh dhe ku vjedh.

Kjo ka qenë arsyeja që këtë vit ta nis komisionin me prezence fizike. Sic e patë vetë, u bëtë dëshmitarë të një përplasje. Me vjen keq sepse është një përplasje me kolegët tanë që duan të prishin seancat. Keqardhjen më të madhe e kam për aludimet. Më vjen keq që për shkak të këtij konfuzioni ne kemi përkeqësuar klimën.  Kjo formë e të bërit opozitë nuk na ka nxjerrë në dritë”, tha Açka.

pamje nga komisioni

TIRANË- Një debat i ashpër ka ndodhur mes deputetëve demokratë në Komisionin e Medias që drejtohet nga Flutura Acka.

Kryetari i Grupit Parlamentar të PD-së, Gazment Bardhi ka kundërshtuar zhvillimin e komisionit duke e akuzuar si fasadë të Edi Ramës.

Ai i ka kërkuar Açkës të mbyllë punimet e komisionit, dhe duke thënë se Lulzim Basha është shërbëtor i regjimit, zagar që shiti interesat e demokratëve dhe deputetët e tij po bëhen mburojë për PS-në.

'T'ju vij turp, Lulzim Basha shiti interesat e demokratëve! Çfarë jemi ne këtu? Patjetër që e vendosim ne! Je kundra kolegëve këtu...Mos u bëj fasadë! Mos shkel mbi votat e demokratëve, mos shkel mbi votat e opozitarëve. Mos u bëj fasadë e Edi Ramës. Lulzim Basha është shërbëtor i regjimit dhe një zagar që ka shitur interesat e demokratëve dhe të vij turp që i shkon nga mbrapa. Një zagar që ka shitur interesat e demokratëve.', ishin fjalët e Bardhit.

pamje nga komisioni

TIRANË- Mbledhja e sotme e Komisionit të Medias është shoqërua me tensione dhe debate, ku deputetët e opozitës kanë ndërprerë punimet duke përdorur në sallë zhurmues. 

Pas kësaj, Gazment Bardhi dhe Flamur Noka janë përplasur ashpër me kryetaren e komisionit njëkohesisht deputeten e PD-së, Flutura Açka, duke e akuzuar se po shkel votat e demokratëve dhe po mbështet mazhorancën. 

“Deklaro se je me mazhorancën. Këtu ke ardhur me votën e demokratëve.”, ka thënë ai. Pas debateve të ashpra mes deputetëve të pranishëm, mbledhja është mbyllur.

foto nga komisioni

TIRANË- Mbledhja në Komisionin e Medias është shoqëruar me tensione dhe debate. Deputetët e opozitës kanë bllokuar punimet e Komisionit të Medias me drejtuese Flutura Açkën, të cilët kanë marrë në sallë zhurmuese dhe kanë ndërprerë mbledhjen.

Ndërkohë, Gazment Bardhi dhe Flamur Noka kanë debatuar me kryetaren e këtij komisioni, Flutura Açka, duke i fikur mikrofonin dhe duke i thënë të mos bëhet sipas tyre fasadë e bandave të Elbasanit. 

Komisioni i Medias është i vetmi që nuk po zhvillohet online ashtu si mbledhjet e komisioneve tjera. 

DEBATI: 

Flutura Açka: Gaz Bardhi unë të kam kërkuar..

Gazment Bardhi: Mos u bëj fasadë e bandave të Suel Celës dhe bandave të Elbasanit. Mos shkel mbi votat e demokratëve dhe të opozitarëve

Noka: Je me votat tona këtu.

Noka: Je duke i shërbyer edi ramës.

Noka: Po i shërben edi ramës, turp

Gazment Bardhi: Fike mikrofonin Flutura. Ngri zërin për të drejtat e opozitës.