I arrestuar për vrasjen e Kozeta Teços/ Zbardhet dëshmia e 31-vjeçarit: E doja, nuk më interesonte mosha! Nëna e të riut: Djali im nuk është vrasësi, vuan nga zemra

ilirjan selmani

POGRADEC- Nëna e Ilirjan Selmanit, të arrestuar dhe akuzuar për vrasjen e Kozeta Toçes në Pogradec, ka mohuar që djali i saj të jetë autori i krimit. Ajo është shprehur se ai dje ishte kthyer nga Korça dhe kishte shkuar te banesa e viktimës të hidhte mbeturinat pasi sipas Sanie Selmanit, ajo nuk lëvizte.

Nëna e të riut është shprehur se ishin në dijeni për marrëdhënien e tyre por edhe pse nuk ishin dakord, djali e kishte pranuar 52-vjeçaren siç ishte, pavarësisht qëndrimit të familjes. Gjithashtu ajo ka shtuar se djali është i sëmurë nga zemra, ndërsa i bëri thirrje policisë të nxjerrin të vërtetën.

Dëshmia e Sanie Selmanit: Djali im nuk mund të vriste askënd, dje ai u kthye nga Korça dhe vajti tek dera e viktimës mori mbeturinat sic bënte gjithmonë sepse ajo nuk lëvizte dhe i hodhi në kazan. Nuk e ka bërë ai ketë vrasje, nuk ka prova. Ne nuk ishim dakord për marrëdhënien me të, por ai pavarësisht se ne nuk ishim dakord e kishte pranuar siç ishte viktimën dhe nuk i kemi kërkuar të ndahet.

Djalin tim e njohin të gjithë mund te pyesni, ai nuk krijonte probleme. Kam lexuar në media shume gënjeshtra për djalin tim, dje erdhën shume policë, desh e mbytën kur e morën. Ai është i sëmurë nga zemra. Policia të nxjerrë të vërtetën, nuk është djali im siç thuhet në media.

viktima dhe autori

POGRADEC- Ilirjan Selmani, 31-vjeç, i arrestuar për vrasjen e Kozeta Teços në Pogradec ka dëshmuar para hetuesve për 7 orë, ndërsa është zbardhur dhe deklarata e tij për krimin. Selmani ka mohuar ta ketë vrarë 52-vjeçaren, duke thënë se është besimtar në Zot dhe nuk mund të ishte autor i një vrasjeje.

Ndërkohë për provat materiale të gjetura nga hetuesit, rrobat dhe peshqirët me gjak, 31-vjeçari tha i kishte hedhur në kosh pasi Kozeta mund të kishte therur një pulë, dhe sipas tij, ajo ishte shumë e fiksuar pas pastërtisë.

“Besoj në Zot. E doja, nuk më bënte përshtypje mosha. Vij nga një familje e mirë dhe nuk mund të bëhem vrasës. Peshqirët me gjak i hodha në mbeturina duke menduar se mos në apartament ishte therur ndonjë pulë, sepse bashkëjetuesja ishte e fiksuar pas pastërtisë,”, ka thënë ai në përballjen me pamjet e kamerave të sigurisë. 

Më pas ai është shprehur se me viktimën kishte një marrëdhënie të tensionuar por përsëri e donte edhe pavarësisht moshës. Gjithashtu ka pretenduar se Kozeta kishte nisur kohët e fundit të pinte dhe kishte raste që e godiste. 

“Ajo dehej shpesh. Njësoj bëja dhe unë. Kjo na bashkonte – dashuria dhe e pira. Kohët e fundit kishte raste kur më godiste. E duroja sepse e doja. Pastaj nuk durova dot më, E dija që ishte më e madhe, por unë e doja. Nuk më bënte përshtypje mosha. Ajo më përdorte, nuk më donte,”, është shprehur më tej ai para hetuesve. Raportohet se për Selmanin pritet të kryhet një vlerësim psikologjik. 

ilirjan selmani

KORÇË- Policia e Korçës ka dalë me një njoftim zyrtar lidhur me vrasjen e 52-vjeçares, Kozeta Teços në Pogradec. Në pranga si autor i krimit është vënë 31-vjeçari, Ilirjan Selmani. Ky i fundit, sipas informacioneve zyrtare, ka vrarë me thikë 52-vjeçaren dhe më pas i ka vënë zjarrin banesës ku jetonte viktima. 

Ngjarja e ndodhur në lagjen nr. 1, Pogradec, fillimisht u raportua si aksidentale pasi u dyshua se 52-vjeçarja kishte humbur jetën nga asfiksia gjatë djegies së banesës së saj.

Më pas gjatë veprimeve hetimore dhe këqyrjes së trupit të pajetë, janë krijuar dyshime se shkaku i humbjes së jetës së 52-vjeçares nuk ishte asfiksia, sepse në trupin e saj konstatuan dëmtime të shkaktuara me thikë.

Nga pamjet filmike të kamerave të sigurisë në zonë, u bë i mundur identifikimi i autorit, i cili dyshohet se ka patur lidhje intime me 52-vjeçaren, prej 3 vitesh. Pasi ka vrarë 52-vjeçaren dhe i ka vënë flakën shtëpisë, Selmani dyshohet është larguar nga banesa, rreth orës 05:00. Ai akuzohet për veprën penale “Vrasja për shkak të marrëdhënieve familjare”.

NJOFTIMI I POLICISË:

Drejtoria Vendore e Policisë Korçë

Si rezultat i hetimeve të shpejta dhe profesionale, zbardhen rrethanat dhe autorësia e ngjarjes së ndodhur dje, në Pogradec.

Vrau 52-vjeçaren, me mjet prerës thikë, në banesën e saj, dhe më pas i vuri zjarrin banesës, arrestohet 31-vjeçari.

Si rezultat i hetimeve profesionale dhe të shpejta, të kryera nga specialistët e Drejtorisë Vendore të Policisë Korçë, në drejtimin e Prokurorisë së Korçës, u bë e mundur zbardhja e rrethanave të ngjarjes së ngjarjes së ndodhur më datë 28.07.2025, në lagjen nr. 1, Pogradec, e cila fillimisht u raportua si aksidentale pasi u dyshua se 52-vjeçarja kishte humbur jetën nga asfiksia gjatë djegies së banesës së saj.

Shërbimet e Policisë, gjatë veprimeve hetimore dhe këqyrjes së jashtme të trupit të pajetë, kanë krijuar dyshime se shkaku i humbjes së jetës së 52-vjeçares nuk ishte asfiksia, sepse në trupin e saj konstatuan dëmtime të dyshuara të shkaktuara me mjet prerës (thikë).

Në vijim të veprimeve të thelluara hetimore, të kryera në drejtimin e Prokurorisë e Korçës, bazuar dhe në pamjet filmike, është bërë i mundur identifikimi i autorit të dyshuar të ngjarjes, shtetasit I. S., 31 vjeç, banues në Pogradec, i cili dyshohet se ka patur lidhje intime me 52-vjeçaren, prej 3 vitesh.

Shtetasi I. S. dyshohet se ka vrarë me thikë, shtetasen K. T., 52 vjeçe, i ka vënë zjarrin banesës së saj dhe është larguar nga banesa, rreth orës 05:00.

Në përfundim të veprimeve është arrestuar në flagrancë shtetasi I. S., 31 vjeç, banues në Pogradec, për veprën penale “Vrasja për shkak të marrëdhënieve familjare”.