Takimi në Bruksel për dialogun Kosovë-Serbi, të hënën diskutohen propozimet nga dy palët për çështjen e dinarit serb

pamje nga takimi

BRUKSEL- I dërguari i BE-së për dialogun Kosovë-Serbi, Miroslav Lajçak, ka reaguar pas takimit trepalësh që kishte me kryenegociatorët, Besnik Bislimin dhe Petar Petkoviç.

Lajçak shkruan në "X" se u ra dakord mes palëve që të hënën të diskutojnë mbi çështjen e dinarit. Ai shton më tej se Marrëveshja( Bazike dhe Aneksi i Ohrit), duhet të adresohet nga kryeministri i Kosovës, Albin Kurti dhe presidenti serb, Aleksandër Vuçiç. 

POSTIMI I PLOTË:

Pritëm dy kryenegociatorët për të diskutuar zbatimin e Marrëveshjes për Rrugën drejt Normalizimit dhe çështje të tjera, duke përfshirë ndikimin e vendimit në operacionet me para. Ne ramë dakord që të vazhdojmë me këtë çështje të hënën e ardhshme, ndërsa Marrëveshja do të duhet të adresohet nga liderët.

Besnik Bislimi

BRUKSEL- Pas takimit të zhvilluar ditën e sotme në Bruksel në lidhje me zbatimin e marrëveshjes së Ohrit si dhe për çëahtjen e dinarit ka folur zëvendëskryeministri i Kosovës, Besnik Bislimi.Në takim ishin të pranishëm Bislimi dhe kryenegociatori i Serbisë Petar Petkoviç. Bislimi u shpreh se shumica e diskutimit të sotëm që ai e pati me Petkoviç kishte të bënte me mundësitë se si të zbatohet marrëveshja bazike dhe aneksi i saj.

Ai më tej u shpreh se Kosova në vazhdimësi do të dëgjojë edhe nga pala serbe se a kanë marrëveshje dhe a janë të përkushtuar ta zbatojmë në tërësi.

“Iu bishtnua përgjigjes disa herë. Në fund tha se për Serbinë është problematike marrëveshja pasi ka nene të cilat merren me statute, sidomos ato nene që tregojnë për respektimin e integritetit territorial, për anëtarësimin e Kosovës në organizata ndërkombëtare dhe të ngjashme. Në fakt, na u tha që Serbia nuk e njeh marrëveshjen si të tillë.

Ai tha se për Serbinë është e pamundur të nënshkruhet një marrëveshje me Kosovën. Kur pastaj vetë pala serbe iu referua marrëveshjes së vitit 2013 të cilën e kishin nënshkruar, por ai tha se ne nënshkruajmë marrëveshje vetëm aty ku s’diskutohen statutet”, tha Bislimi.

Sipas Bislimit, Kosova dhe Serbia deri më 22 mars, do t’i dorëzojnë propozimet e tyre për përdorimin e dinarit serb në Kosovë, ndërsa javën e ardhshme do të takohen sërish për diskutimin e opsioneve.

pamje nga takimi

BRUKSEL- Kanë përfunduar takimi Bislimi- Lajçak- Petkoviç në kuadër të dialogut Kosovë-Serbi.Dy palët janë zotuar që deri më 22 mars, t'i dorëzojnë propozimet e tyre për zgjidhjen e çështjes së përdorimit të dinarit serb në Kosovë. Kështu tha në fund të takimit kryenegociatori i Kosovës, Besnik Bislimi.

Për javën e ardhshme, ai paralajmëroi një takim tjetër, për të parë nëse propozimet e tyre mund të shndërrohen në një të vetëm që, siç tha, do të ishte i pranueshëm për Kosovën. Bislimi dhe kryenegociatori i Serbisë, Petar Petkoviç, u takuan sot në Bruksel, me ndërmjetësimin e përfaqësuesit të posaçëm të BE-së në dialogun Kosovë-Serbi, Mirosllav Lajçak, shkruan REL.

Petkoviç tha se gjëja e parë për të cilën këmbënguli pala serbe ishte themelimi i Asociacionit të komunave me shumicë serbe në Kosovë, sepse kjo, sipas tij, do ta zgjidhte edhe çështjen e financimit të të gjitha institucioneve serbe në Kosovë. Ai tha se është gjithashtu e rëndësishme që të gjendet një zgjidhje, e cila do të mundësonte vazhdimin e funksionimit të bankës së Serbisë në Kosovë, Kursimorja e Postës. Ai shtoi se pret që bisedimet të vazhdojnë në frymë konstruktive, ndoshta nga fillimi i javës së ardhshme.

Me një rregullore të Bankës Qendrore, Kosova ndaloi përdorimin e dinarit serb nga 1 shkurti, duke e bërë euron mjet të vetëm pagese. Çështja, përveçse zemëroi Serbinë, nxiti mospajtime edhe mes Qeverisë së Kosovës dhe bashkësisë ndërkombëtare, pasi komuniteti serb në Kosovë, prej vitesh, merr pagesa në dinarë nga buxheti i Serbisë. Diplomatë perëndimorë i kërkuan Kosovës që ta pezullojë rregulloren, për t’iu dhënë kohë qytetarëve të prekur që të përshtaten me praktikën e re. Bashkimi Evropian paralajmëroi një ditë më herët se do të shtojë trysninë mbi dy vendet për të zbatuar marrëveshjen e arritur një vit më parë për normalizimin e marrëdhënieve.