Deputetët replikojnë për pagat tek 'Ekonomia'/Shehaj e Spaho: Mos u tallni me njerëzit, në Albcontrol trajtohen me xhakuzi

Mbledhja

TIRANË- Komisioni i Ekonomisë pas debateve mes deputetëve dhe Ministres së Financave Delina Ibrahimaj kanë votuar sot rritjen e rrogave të deputetëve dhe ministrave. Në vendimin e miratuar ditën e sotme paga e një ministri nga 181 mijë që e ka sot shkon në 345 mijë lekë bruto.

Ndërsa paga e një deputeti nga 158 mijë lekë që është shkon në 330 mijë lekë bruto. Ndërkohë që paga e kryeministrit dhe kryetarit të kuvendit shkon në 329 mijë lekë lekë. Ndërkohë që në mbledhjen e sotme të Komisionit kundër ka votuar vetëm deputeti Agron Shehaj. 

Pamje nga komisioni

TIRANE- Mbledhja e sotme e Komisionit të Ekonomisë u përfshi nga replika mes deputetëve të opozitës dhe ministres së Financave dhe Ekonomisë, Delina Ibrahimaj në lidhje me rritjen e pagave për administratën publike. Deputeti Agron Shehaj pyeti ministren sesi ajo ndihej kur shihte se nga tabela e propozimit për pagat, drejtorët do ta kenë pagën më të lartë se vetë ministrja.

Debatet në Komision: 

Delina Ibrahimaj: Paga në administratën publike do të shkojë në 900 euro në dy hapa. Hapi i parë sapo ka filluar dhe hapi i dytë do të jetë gjatë vitit të ardhshëm. Me përcaktimin e pagës së Presidentit si paga më e lartë, janë të lidhura edhe disa funksione të krijuara në kuadër të reformës në drejtësi. Praktikisht përfitojnë. Përsa i përket koeficentëve të pagës për pozicionet që kanë të bëjnë  me institucionet e Kuvendit dhe Ekzekutivit janë përshtatur pa ndryshuar nivelin aktual të pagave për ta rikonsideruar në një moment të dytë kjo për shkak se kemi pasur për qëllim të përqendrohemi fillimisht tek finalizimi i kësaj politike të re të rritjes së pagave për një kategori më të madhe përfituesish sikundër janë të gjithë punonjësit e administratës publike qendrore dhe vendore.

Agron Shehaj: Ju keni përjashtuar ministrat dhe deputetët nga propozimi për rritjen e pagave. Me këtë që keni bërë, nëse nuk gaboj, drejtorja e Përgjithshme, zonja Dhëmbi, do të ketë një rrogë më të lartë se tuajën.

Delina Ibrahimaj: Në fakt po. Propozimi që kemi sjellë në Kuvend, nuk parashikon rritje të pagave për ministrat dhe deputetët. Ne donim që të gjithë kategoritë e tjera të përfitonin nga rritja e pagave dhe në përfundim të kësaj, do të sillnim një nisëm për rishikimin e koeficentëve për anëtarët e kabinetit dhe deputetët. Do ta sjellim më pas si propozim.

Agron Shehaj: Ju po thoni që rrogat e deputetëve dhe ministrave janë më pak të rëndësishme sesa rrogat e punonjësve të tjerë të administratës. Ju duket normale që drejtorët që u shoqërojnë sot e kanë rrogën më të lartë se?

Delina Ibrahimaj: Qëllimi ka qenë që reforma të përfundonte dhe më pak të përcaktohej paga e ministrit dhe deputetit.

Agron Shehaj: Ju po vini këtu dhe po na ofendoni të gjithë.

Blerina Gjylameti: Po bëni të njëjtën pyetje 3 herë.

Agron Shehaj: Mos është një tallje, një farsë e kryeministrit? Ju vetë keni nevojë për rritje rroge, apo do ta sakrifikoni atë për të mirën e popullit?

Arbi Agalliu: Kuvendi që miraton pagën e Inspektorit, ka rrogë sa gjysma e inspektorit. Kjo nuk bën sens. Nëse duam të ruajmë dinjitetin e çdo individi, të nisë rritja me Presidentin, të shkojë te Kryeministri, të shkojë më pas te ministri e deputeti.

Edmond Spaho: Paga e deputetit nuk është indeksuar prej vitesh. Unë mban mend që me këtë pagë e kam filluar që në vitin 2005. Madje deputetit i thuhet edhe që të blejë makinën me lekët e tij dhe të bëjë punën e qeverisë.

Delina Ibrahimaj: Unë nuk kam thënë që nuk e vlerësojmë punën e deputetit apo ministrave. Thashë që pasi të zbatohet rritja për administratën, do të sjellim një propozim për rritjen e pagave për deputetët dhe ministrat./Dosja.al

Komisioni

TIRANË- Komisioni i Ekonomisë është shoqëruar me debate sot teksa po diskutohet ligji për pagat. Deputetët Erion Braçe dhe Edmond Spaho kanë kritikuar ligjin duke theksuar se ka diferenca shumë të mëdha mes titullarit dhe punonjësit.  Spaho theksoi se ka abuzime masive me pagat në Institucione, duke përmendur këtu dhe Albcontrol, që sipas tij ka xhakuzi dhe bëjnë festa të harbuara.  

Pjesë nga diskutimet:

Erion Brace: Për shoqëritë aksionere ka ndonjë përcaktim në ligj?

Ermal Nufi: Nuk ka një përcaktim për këtë ligj Shoqëritë tregtare kanë ligjin për shoqëritë tregtare. Ato kanë një vendim bordi apo Këshilli mbikëqyrës që përcakton se kush është niveli i pagave

Brace: Kemi një diferencë të rrogave të drejtuesve të shoqërive tregtare me rrogat e punonjësve të tyre. Diferenca mes rrogës së titullarit dhe rrogës së punëtorit është shumë e madhe. Po marr sektorin e energjisë, të ujit apo të shërbimeve postare. Duhet të bëjmë një rregullim sepse siç edhe ju thoni që këto ndërmarrje janë të rëndësishme, nuk ka konkurrencë. Pagat e drejtuesve indeksohen të punonjësve jo. Ka një zhbalancim anormal. Tani si do të trajtohen rrogat e tyre në raport me inflacionin. Nuk kam dëgjuar të jetë indeksuar rroga e punëtorëve të këtyre ndërmarrjeve, mund të jenë të pambrojtur plotësisht.

Ermal Nufi: Ka qenë një periudhë e gjatë që nuk janë bërë indeksime dhe kjo po ndryshon me këtë ligj.

Braçe: Ka shoqëri tregtare pa konkurrencë, janë monopole

Spaho: Albcontrol, paga disa herë më të larta se Presidenti. Deri tani është bërë kokrra e qejfit kanë marrë çfarë kanë dashur. Xhakuzi, salep, masazhe, festa harbuese ja si shpërdorohen paratë dhe rasti është me Albcontrol. Nuk mund të ndodhë në një kompani shtetërore ku drejtuesi i saj të ketë rrogë më të lartë se Presidenti i Republikës, ky nuk është shtet.