Akuzat e Ramës për gjyqtarët, KLGJ: Minohet pavarësia e pushtetit gjyqësor! Kryeministri: Të shqetësohen për cilësinë e drejtësisë

Bardhi

TIRANË- Kryetari i Grupit Parlamentar të PD-së Gazment Bardhi përmes një postimi në "Facebook" ka reaguar lidhur me reagimet e kryeministrit Edi Rama ndaj KLGJ-së. Kryeministri Rama reagoi pas një deklaratë të KLGJ-së ndërsa Bardhi thekson se ai duhet të kuptojë rolin e tij.

Bardhi shkruan se Rama është për bandat dhe jo për qeverisje. Ai shton se Rama është person që duhet gjykuar nga prokurorët e gjykatësit dhe jo ai t'i gjykojë ata. Bardhi gjithashtu shtoi se asnjë kryeministër në Evropë nuk komenton në lidhje me çështjet dhe vendimet që marrin gjyqtarët. 

"Përpara se të “shtrembërojë” nga padija e rolit të KLGJ, Edi Rama bën mirë të kuptojë rolin e tij: Është për të bandat, jo për t'i ulur në qeverisje; Është për t'i siguruar ekonomikisht bandat, jo për t'u dhënë licencë, tendera, koncesione apo leje ndërtimi;

Është për të luftuar korrupsionin, jo për ta ligjëruar atë përmes projekteve të inceneratorëve që nuk kanë si rrjedhojë;  Është për t'u gjykuar nga prokurorët e gjykatësit, jo për t'i gjykuar ata!
Prandaj, bën mirë, përpara se të gjykojë gjyqtarin e prokurorës nuk i ka dalë avazit apo humorit të tij, të kujtohet se asnjë Kyeministër në Evropë, nuk komenton më shumë se një gjyqtar i caktuar për çështje specifike. Dhe boll harxhoi kohë me çështjet që si i kupton dhe si të kuptojë, sepse Edi Rama është gatuar si “antiligji” dhe “anti interesi publik”!" shkruan Bardhi.

Rama

TIRANË- Kryeministri Edi Rama përmes një postimi në "X" ka reaguar në lidhje me deklaratën e KLGJ-së për akuzat që ai ka hedhur ndaj gjyqtarëve që kanë dhënë vendimet për subjektet e ndërtuara pa leje në hapësira publike. Rama në reagim është shpehur se e ka lexuar me vëmendjen reagimin teksa theksoi se kjo deklaratë e KLGJ-së ka ardhur pasi ai ka folur lidhur me disa vendime skandaloze të gjyqtarëve.

Ai u shpreh se KLGJ ka harruar se roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit. Nga reagimi i KLGJ-së, Rama u shpreh se bie dakord me pjesën se çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse. Kryeministri gjithashtu tha se anëtarët e KLGJ nuk duhet të harxhojnë kohën e tyre për të gjykuar se si e ai e bën punën.

"Lexova reagimin e KLGJ, organi më i lartë i vetëqeverisjes së gjyqësorit, lidhur me çka unë kam ndarë me publikun për disa vendime skandalozisht brutale gjykatësish, të cilët u kanë dalë në mbrojtje të zaptuesve të hapësirës publike, në dëm të rendit ligjor, interesit publik si edhe komuniteteve të cënuara drejtëpërdrejt nga këto vendime.

KLGJ i ka rënë shumë gjatë, duke harruar se roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit në dëm të tij, nuk kalojnë pa u analizuar dhe gjykatësit nuk janë maliqër që bëjnë ç’të duan me ligjin në emër të pavarësisë.

KLGJ ka harruar gjithashtu se si instanca më e lartë e vetëqeverisjes së gjyqësorit, ka jo vetëm të drejtën po edhe detyrën të marrë seriozisht shqetësimet e palëve të cënuara nga vendime qorre të gjykatësve, të cilat në këtë rast janë të ububushme për nga mungesa e ndjeshmërisë ndaj interesit publik.

KLGJ ka harruar edhe të tjera gjëra më shumë rëndësi, por të paktën ka thënë një të vërtetë që më gjen shumë dakord, duke nënvizuar se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, gjë për të cilën e kam informuar në çdonjërin nga rastet publikun, se do të bëjmë duke iu drejtuar pikërisht KLGJ dhe ILD si “institucionet përkatëse”.

Duke e mbyllur me kaq për sot, u them anëtarëve të KLGJ të mos harxhojnë kohën e tyre për të gjykuar se si e bëj unë punën për të cilën më ka votuar populli shqiptar - gjykatësi im i përditshëm të cilit unë nuk kam se si të mos ia shpjegoj hapur pse nuk largohen njësoj si të tjerat ca ngrehina të paligjshme në mes të rrugës, që marrin mbrojtjen e pajustifikueshme të ca gjykatësve të pandjeshëm ndaj interesit publik - po të përqëndrohet tek puna e vet, që gjermësot le shumë për të dëshiruar në funksion të Shqipërisë 2030 në BE", shkruan Rama.

FOTO

TIRANË- Këshilli i Lartë Gjyqësor, KLGJ ka dalë me një reagim në lidhje me deklaratat që kryeministri Edi Rama ka bërë lidhur me gjyqtarët që  kanë dhënë për vendimet për subjektet e ndërtuara pa leje në hapësira publike. Në reagim KLGJ thekson se këto deklarata cënojnë figurën e gjyqarëve si dhe minojnë pavarësinë e gjyqësorit.

KLGJ shton se ushtrimi i profesionit duhet të jetë i pavarur. Më tej Këshilli bëri thirrje që të respektohet pavarësia e gjyqësorit si një nga themelet e shtetit të së drejtës. Gjithashtu theksohet se çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.

Reagimi i plotë:

Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cënojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor.

Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm.

Këshilli ju bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës. E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.

KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.

Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut.