Politike

Thirret në prokurori për lobimin në SHBA, Basha: Akuza putiniane, të montuara për të më trembur

  • I pandehur për lobimin rus në SHBA, Basha: S’më bëhet vonë fare!
  • Prokuroria e Tiranës ka thirrur kreun e PD-së, Lulzim Basha për të dëshmuar më datë 17 qershor në prokurori, lidhur me çështjen e lobimit në SHBA nga një kompani ruse. Basha nuk i ka pranuar akuzat duke i cilësuar si të montuara nga kryeministri Edi Rama.
    Featured image of article: Thirret në prokurori për lobimin në SHBA, Basha: Akuza putiniane, të montuara për të më trembur Kryedemokrati Lulzim Basha

    TIRANË-Kryetari i Partisë Demokratike Lulzim Basha zyrtarisht është i pandehur për lobimin rus në SHBA në periudhën zgjedhore të vitit 2017.  

    Së bashku me Bashën, të pandehur janë marrë edhe ish-sekretari i përgjithshëm i PD-së, Arben Ristani, por edhe Ilir Dervishin pasi akuzohen për falsifikim dhe fshehje të financimeve.

    Fletë-thirrja për t’u paraqitur ditën e hënë në Prokurorinë e Tiranës, kryedemokratit i është dërguar ditën e djeshme. Në shkresën e firmosur nga prokurorët e çështjes Ervin Karanxha, Gjergji Tako dhe Kole Hysenaj, theksohet se nëse Basha nuk paraqitet ditën e hënë në orën 09:30 pranë ambienteve të Prokurorisë atëherë ai do të shoqërohet forcërisht.

    Kërkesa për Lulzim Bashën

    Akuzës së ngritur nga Prokuroria, Basha i është përgjigjur se është e montuar nga kryeministri Edi Rama, i cili kërkon të heqë vëmendjen nga skandalet e qeverisë së tij.

    Për më shumë bëhu pjesë e grupit më viral në Facebook, Dosja.al

    Vendimi i marrë nga Prokuroria e Tiranës ditën e sotme është marrë pas letër-porosive të ardhura nga SHBA-të. Më 25 mars, Lulzim Basha dëshmoi për rreth një orë për lobimin në SHBA. Në përfundim të dëshmisë, Basha deklaroi para gazetarëve se as ai dhe asnjë drejtues tjetër i PD-së nuk e kishin shkelur ligjin. Ndërsa Prokuroria e Tiranës zbuloi dy letër-porositë që kishin ardhur nga SHBA dhe Skocia duke thënë se i gjithë hetimi është bazuar në prova që faktojnë se Partia Demokratike e ka fshehur financimin në këtë vlerë të madhe duke deklaruar në formularin e financimeve të fushatës për partinë vetëm 25 mijë dollarë dhe jo shumë prej 650 mijë dollarësh.

    Sipas Prokurorisë, njëra pagesat rezulton të jetë bërë nga “Biniatta Trade”, një shoqëri e regjistruar në Edinburg të Skocisë dhe është në pronësi të një zinxhiri kompanish të regjistruara në Belize,  shtet në Amerikën Qendrore i njohur si “parajsë fiskale”.

    “Biniatta Trade LP” është e krijuar nga partneriteti i dy kompanive “Asverro Corp” dhe “Liminez Commerce”, pronarët e të cilëve janë dy shtetase ruse: Victoria Valkovskaya dhe Natasha Radysheva.

    (k.m./dosja.al)

    • 22:11

      "Mendja gjë e madhe, Zot na ruaj", Maliqi 'shpërthen' ndaj Ramës: Kalorësit nuk i ndalet shpata

      Lefter Maliqi

      Deputeti Lefter Maliqi, e quan thirrjen në prokurori të kryetarit të opozitës Lulzim Basha, si skandal. Sipas tij kryeministri Edi Rama kontrollon çdo pushtet, tashmë sa vjen e kërkon më shumë për veten e tij.

      “Skandal Kryeprokurori,Kryepolici ,Kalorësi i Rilindjes ,urdheron marrjen të pandehur të Kryetarit të Opozitës,dhe nese nuk paraqitet do urdhëroj shoqërimin forcërisht të tij.Ska të ndalur kalorësi me ushtrin e rilindjes ka shpallur lufte me opoziten eshte kundra marrveshjeve.Kaloresi po i pushton te gjitha trojet,sot pushtoj e nënshtroj parlamentin,ka pushtuar prokurorin,drejtesin,KQZ,SHIKU-n,po pushton Presidencën,Pushtetin Lokal dhe se fundmi dhe Opoziten.Shtetet fqinj Italia,Greqia,Maqedonia,Mali i Zi në gadishmëri po ruajnë kufijtë nga Lideri Global,Zot na ruajt ku po përfundojmë,luftuam per liri,demokraci,shembem diktaturen në 1990 ,jemi per paqe.Por kalorësit nuk i ndalet shpata do dhe kokën e kreut te shtetit,kreut te opozites nuk ngopet do shume me teper troje,pushtet ,sundime. Mëndja gjë e madhe,zot na ruaj.🙏”. – shkruan Maliqi.

      (B.B/ Dosja.l)

    • 20:52

      Thirrja e Bashës në Prokurori, Bylykbashi: Veprim i pastër politik

      Prokuroria e Tiranës ka thirrur kryetarin e PD-së, Lulzim Basha për të dëshmuar në prokurori në lidhje me lobimin rus në SHBA në datë 17 Qershor. Por sipas ish-deputetit të PD-së, Oerd Bylykbashi, ky është veprim i pastër politik.

      Ai deklaroi gjatë rubrikës “Mbrëmje ABC” me Mirela Milorin se sa herë që Kryeminstri ka pasur probleme ka nxjerrë në skenë këtë histori.

      “Ajo që është shumë interesante është që sa herë Edi Rama ka nevojë, Arta Marku vepron menjëherë. Kjo është hera e katërt. Arta Marku ankohet se i është zvogëluar kompetenca kontrolluese mbi pjesën tjetër të prokurorisë , por ia ka dhënë mesazhin prokurorisë se me shkarkimet e paligjshme që ka bërë deri më sot kush nuk vepron sipas asaj që kërkon ajo ka probleme. Ta lemë mënjanë këtë histori. Ky është veprim i pastër politik. Do ju jap shembuj të vegjël. Kur iu desh me Saimir Tahirin e nxorrën këtë histori. Doli përsëri rasti ishin përgjimet e Agron Xhafaj, e nxorrën. Doli rasti Dako, e nxorrën përsipër. Sa herë i duhet Edi Ramës të heqë vëmendjen nga problemet e mëdha që i dalin nxjerr këtë çështje. Basha ka bërë reagim të drejtpërdrejtë sot. Ka dy gjëra, e para është një shmangie vëmendje nga çështja e madhe sot. Çështja e madhe sot nuk është dekreti i Presidentit, por përgjimet e Bildit. E dyta është rasti tipik, goditet kundërshtari me instrumentet që ka. Që është e pastër politike për të goditur kundërshtarin besoj se shqiptarët nuk duan shumë për ta kuptuar këtë gjë”, tha Bylykbashi.

      Sipas Bylykbashit pritet të dalin edhe përgjime të tjera ku përfshihet vetë kryeministri. Prandaj sipas tij, kjo është arsyeja pse u urdhërua publikimi i përgjimeve të tjera të dosjes 339 në media.

      “E rëndësishme është të kuptojmë në mesin e kësaj beteje të madhe ku i kanë dale raste që duhet të çojë në burg njerëzit më të afërt dhe po të fillojnë të këndojnë ata, këndojnë dhe për Edi Ramën. Siç thonë, në regjistrime del dhe vetë Edi Rama. Në regjistrime të tjera që priten të dalin. Ka shumë mundësi që urdhri që ai dha nëpërmjet kryetarit të Komisionit të Ligjeve, i dha kryeprokurores së përgjithshme që të ndalohet ndalja e publikimeve është për ato që do dalin më pas. Tani i duhet një histori tjetër, hidhet kjo në treg për ta çuar debatin aty”, tha Bylykbashi.

      Marrë nga ABC News

    • 20:33

      Basha i pandehur për lobimet ruse, reagon Bardhi: Akuzë qesharake, kërkojnë të tërheqin vëmendjen

      Pas thirrjes në Prokurori të kryedemokratit Lulzim Basha si dhe Arben Ristanit e Ilir Dervishit, lidhur me akuzat për lobime ruse në SHBA, ka reaguar edhe Sekretari i Përgjithshm i PD-së. 

      Me anë të një postimi në rrjetet sociale, Bardhi shprehet se akuzat ndaj liderit demokrat janë politike e qesharake, që sipas tij dalin në pah sa herë që Rama ka patur hall të madh. Ai e konsideron thirrjen në Prokurori politike dhe mënyrë për të tërhequr vëmendjen nga skandalet e qeverisë. 

      Postimi i plotë: 

      Akuza politike dhe qesharake, kundër Kryetarit të Opozitës dhe dy kolegëve të Partisë Demokratike z. Ristani dhe z. Dervishi, është përdorur nga prokurorët e tij të korruptuar, sa herë shefi i tyre politik Edi Rama ka patur një hall të madh dhe ka qenë e nevojshme shfokusimi i vëmendjes së qytetarëve nga skandalet e Kryeministrit të Avdylajve.

      Të gjithë mbajnë mend se:
      · Çështjen e nisën në kohën kur kërkohej arrestimi i Saimir Tahirit për trafik ndërkombëtar lëndësh narkotike dhe Edi Rama pengonte prokurorinë të bënte detyrën, derisa e vuri atë nën kontroll të plotë.
      · Çështjen e sollën në vëmendje kur doli në publik skandali i vëllait të Fatmir Xhafës, akuzuar po ashtu si trafikant ndërkombëtar droge, dhe u provua se Qeveria kishte manipuluar hetimet.
      · Çështjen e risollën në vëmendje të opinionit publik, deri me deklarata të paprecedenta të prokurorisë, kur u provua bashkëpunimi i Vangjush Dakos për të blerë votat me një trafikant ndërkombëtar droge.
      · Çështjen e rihedhin për konsum publik edhe tani, kur Edi Rama është faktuar se është organizatori i skemës së bashkëpunimit të Partisë Socialiste me krimin e organizuar.

      Shqiptarët nuk janë budallenj, edhe pse 4 prokurorë të korruptuar, bashkë me urdhëruesin politik të tyre Edi Rama, i kujtojnë për të tillë! Budallenjtë e vetëm janë këta që nuk kanë kuptuar ende që kanë marrë fund, dhe detyrohen të bëjnë veprime të dëshpëruara.

      Udhë e mbarë drejt humnerës që ju pret!

    Një Koment në “Thirret në prokurori për lobimin në SHBA, Basha: Akuza putiniane, të montuara për të më trembur

    1. Jo o llumi portaleve jo,Basha eshte thirrur si i pandehur kete radhe me urdher te amerikan vellait.Boll mashtruat e genjyet

    Shto Koment