Aktualitet

Trafiku i drogës, Prokuroria kërkon 8 vite burg për Tahirin dhe Jaeld Çelën, shtyhet gjyqi më 19 shtator

  • Të hetohet Rama?! Tahiri: Të mos kursehet askush, ç’është kjo parti që harxhon miliona
  • Tahiri nxjerr shkresën ‘SEKRETE’: Informova Kodhelin për radarët që s’punonin
  • Shtyhet gjyqi për Saimir Tahirin. Gjykata vendos për fatin e tij më 19 shtator. Nga ana tjetër, Prokuroria ka dhënë pretencën për të. Organi i akuzës kërkon 12 vite burg, që e konvertuar nga "gjykimi i shkurtuar", ulet në 8 vite burg. Të njëjtën pretencë kanë dhënë edhe për ish-kryepolicin e Vlorës, Jaeld Çela. Tahiri u mbrojt vetë në gjykatë.
    Featured image of article: Trafiku i drogës, Prokuroria kërkon 8 vite burg për Tahirin dhe Jaeld Çelën, shtyhet gjyqi më 19 shtator Saimir Tahiri te Krimet e Rënda
    Përditësuar:

    TIRANË– Shtyhet gjyqi për ish-ministrin e Brendshëm, Saimir Tahirin. Seanca e radhës, ku edhe do të komunikohet vendimi i Gjykatës do të zhvillohet më 19 shtator, në orën 10:00.

    Saimir Tahiri u përball sot në gjykatë me akuzat për trafik droge, korrupsion dhe shpërdorim detyre.

    Që prej orës 09:00, ish-ministri i Brendshëm u paraqit në Gjykatën e Krimeve të Rënda, i shoqëruar nga avokati i tij, Maks Haxhia.

    Tre prokurorët Arenc Çela, Dritan Prençi dhe Vladimir Mara, kanë kërkuar 12 vite burg për Tahirin për të trija akuzat, por më herët gjykata ka pranuar kërkesën e mbrojtjes së ish-ministrit për ‘gjykim të shkurtuar‘, që e ul pretencën në 8 vite burg.

    E njëjta pretencë është dhënë edhe për ish-kryepolicin e Vlorës, Jaeld Cela, i cili është në arrati. Në rast dënimi, për Tahirin dhe Celën, gjykata do të ulë 1/3 e dënimit. Prokuroria, nga ana tjetër ka kërkuar që ish-ministri të vuajë dënimin në një burg të sigurisë së zakonshme.

    Por si është mbrojtur Tahiri?

    Në një seancë maratonë, e cila pritet të zgjasë deri në mbrëmje, ish-ministri nuk ka qendruar ‘duarkryq’. Ka shfrytëzuar çdo minutë për të bërë mbrojtjen e tij, ku ka përmendur episode dhe fakte, pse sipas tij nuk i ka ndihmuar kurrë ‘Habilajt’ në trafikun e drogës.

    Tahiri ka thënë se Habilajt janë proceduar nga Policia, si dhe ka sjellë në vëmendje, trafikun e drogës përmes përdorimit të radarëve të fikur të ushtrisë. Saimir Tahiri ka thënë në gjykatë, se ka dërguar një letër ‘top secret‘ tek Kodheli, ku e ka informuar për këtë skandal dhe ka kërkuar ndërhyrjen e saj.

    Ish-ministri i Brendshëm, Saimir Tahiri akuzohet për trafik droge në kuadër të grupit të strukturuar kriminal. Ai akuzohet se ka kryer veprat penale ‘Trafikimi i narkotikëve’, në bashkëpunim, në formën e grupit të strukturuar kriminal, ‘Grup i strukturuar kriminal’ dhe ‘Kryerja e veprave penale nga organizata kriminale dhe grupi i strukturuar kriminal’ parashikuara nga nenet 283/a/1, 28/4/ dhe 333/a/2 të Kodit Penal.

    Në maj të vitit 2018 Tahiri dorëzoi dhe mandatin e deputetit dhe u vu në dispozicion të drejtësisë. Pas kësaj organi i akuzës kërkoi sërish arrestimin e tij, por Gjykata vendosi që ta linte vetëm në masën “arrest shtëpie”. Prokuroria ka kërkuar disa herë arrestimin e tij, por Gjykata nuk ka pranuar pasi nuk ka qenë e bindur nga provat e dorëzuara.

    (k.m;f.g/dosja.al)

    • 17:27

      Gjykata shtyu seancën, Tahiri: E vërteta ime ka fakte kokëforta, nuk më bën syri tërrt

      Ish-ministri i Brendshëm Saimir Tahiri ka folur për mediat pasi Gjykata e Krimeve të Rënda shtyu seancën për të më datë 19 shtator. Përballë gazetarëve, Tahiri u shpreh se vërteta e tij, sipas tij është kokëforte dhe me prova të pakundërshtueshme.

      Ish-ministri shpjegoi më tej se ka dhënë dorëheqjen nga posti i tij si ministër i Brendshëm për të dalë para Gjykatës si një qytetar i lirë dhe jo një njeri plot pushtet.

      Ndër të tjera ai shtoi se Prokuroria ka paraqitur sot prova të gënjeshtërta dhe sipas Tahirit këtë gjë e thotë edhe drejtësia italiane.

      Jo pa shkak kam dhënë dorëheqjen nga mandati i deputetit për t’u përballur me drejtësinë si qytetar i lirë. Jo pa shkak hoqa dorë nga posti si Minsitër i Brendshëm për të dalë para togave si një qytetar i lirë dhe jo si një njeri plot pushtet. Kam pasur shpresën që një ditë e vërteta është kollaj të dalë në dritë. Dëgjuat në sallë gjithë argumentimin tim dhe të Maksit për sa gënjeshtra janë thënë gjithë kësaj kohe. Ishin shumë të kollajshme për t’u verifikuar nga Porkuroria. Jam akuzuar si pjesë e një grupi të strukturuar kriminal bashkë me disa policë, të cilët për kohën kur akuzohen nuk kanë qenë në detyrë. Ky procedim penal është nisur nga vetë policët që kanë qenë në varësinë time dhe që sot janë të akuzuzar bashkë me mua. Ato prova të paraqitura nga Prokuroria janë të gënjeshtërta dhe këtë gjë nuk ka nevojë ta them unë. Këtë e thotë edhe drejtësia italiane. Policët që akuzohen bashkë me mua janë ata vetë që kanë nisur procedimin penal për Habilajt. Si i bie tani që ne paskemi kallëzuar njëri-tjetrin? E vërteta ime është kokëfortë dhe askush nuk i del dot përballë. Nuk më bën syri tërrt,“– tha ish-ministri ndër të tjera.

    • 17:27

      A do t’i rikthehet politikës? Tahiri: Vrasësit dhe hajdutët janë në maja, kjo betejë nuk përfundon këtu

      Ish-ministri Saimir Tahiri foli përpara gazetarëve pasi Gjykata e Krimeve të Rënda i shtyu seancën më 19 shtator. I pyetur nëse do t’i rikthehet politikës pas gjyqit, Tahiri nuk e mohoi këtë gjë si mundësi, por u shpreh se nuk është prioriteti i tij për momentin.

      Ish-ministri i Brendshëm u shpreh se ka persona që janë akuzuar për vrasje dhe për vjedhje stratosferike dhe sërish ndodhen në majat e politikës. Më tej ai shtoi se nuk po mendon për këtë gjë tashmë, por për gjyqin.

      Pyetja: A mendoni ju se do të riktheheni në majat e politikës?

      Tahiri: Janë akuzuar për vrasje njerëzish edhe për vjedhje stratosferike në xhepat e njerëzve dhe sot janë në majat politike. Por unë nuk mendoj për këtë, unë mendoj për drejtësinë time. Kur kjo betejë e imja të përfundojë siç dua unë të përfundojë atëherë këtë betejë do ta kthej në betejën e çdo qytetari.

    • 16:59

      ‘Kush ua ka montuar këtë gjë?, Tahiri: Nuk përgjigjem! E keni harruar ministrin që isha. Unë dua të jem i lirë

      Pas shtyrjes së seancës, ish-ministri i Brendshëm Saimir Tahiri ka ndalur jashtë ambienteve të Gjykatës së Krimeve të Rëndë për të dhënë një prononcim për mediat.

      Në fjalën e tij, Tahiri ka këmbëngulur në pafajësinë e tij duke u shprehur se Prokuroria nuk e kishte bërë punën e saj siç duhet.

      “Thashë që Prokuroria duhet të hapte një hetim dhe të mos kursente asnjë njeri. E thashë dhe e përsëris që Prokruroria ka pasur 2 vjet kohë ta hetonte. Kam zero takime dhe kontakte me personat e akuzuar. Si dreqin e kam bërë unë këtë? Më akuzojnë në të njëjtën kohë që luftoja Lazaratin. Si mund t’i bëja të dyja? E keni harruar ministrin që isha. Mos e harroni ministrin që isha. Është e tepërt kjo që ka ndodhur. Është gënjeshtër aq e madhe dhe mu desh aq kohë që ta çmontoja aty brenda,”-tha Tahiri.

      PRONONCIMI I TAHIRIT PËR MEDIAT:

      -Nëse dënoheni, kush ua bën këtë? Kush ua ka bërë këtë montim siç e quani ju?

      Nuk përgjigjem, e ke bërë pyetjen si për kafe. Unë besoj aq shumë tek e vërteta ime. Besoj aq shumë tek drejtësia. Besoj aq shumë saqë nuk më shkon ndër mend të mendoj këto që thua.

      Për kë ishte kodi i dhomës së hotelit?

      Përtoj të merrem me kode dhe të gënjej. E kam kollaj të them atë që mendoj drejtpërdrejt. Më akuzonin se kam paguar hotel 1000 euro nata. Kjo provohet me letërporosi. S’kam pasur as pasuri marramendëse. E thashë maksimumi që kam paguar ishte 140 euro. Ishte për të dhënë që drejtësia ka mundësi të flasë shumë më fort se gënjeshtat në publik. Të vërtetën time do ta përçoj fort. Do të kem kohë që të vërtetën tja them çdo qytetari në vesh.

      -Fikja e radarëve?

      Në dijeninë time radarët nuk ka asnjë mundësi që të fiken. Prokuroria kishte 2 vite kohë sesi mund të fiken. Unë them jo dhe jo, këta radarë nuk mund të fiken. Prokuroria as nuk e thotë por hamendëson se kjo është pjesë e veprimtarisë kriminale. Kam bërë të pamundurën për të luftuar krimin, e kam bërë me detyrën me pasion. E kam bërë duke iu sulur drejtësisë. Nuk më kanë lënë fuqitë dhe as nuk do të më lënë.

      Përmendët edhe Edi Ramën, ishte ftesë apo ironi ndaj Prokurorisë?

      Unë kisha një muaj në detyrë. Më akuzonin se harxhoja 20 mln euro në fushatë. Thashë që Prokuroria duhet të hapte një hetim dhe të mos kursente asnjë njeri. E thashë dhe e përsëris që Prokruroria ka pasur 2 vjet kohë ta hetonte. Kam zero takime dhe kontakte me personat e akuzuar. Si dreqin e kam bërë unë këtë? Më akuzojnë në të njëjtën kohë që luftoja Lazaratin. Si mund t’i bëja të dyja? E keni harruar ministrin që isha. Mos e harroni ministrin që isha. Është e tepërt kjo që ka ndodhur. Është gënjeshtër aq e madhe dhe mu desh aq kohë që ta çmontoja aty brenda.

      Si do ndjeheni nëse dilni i pastër?

      Kjo hyn në betejat më të mëdha të jetës time. Kam hyrë si qytetar i thjeshtë. Nuk më është dashur ndihma e askujt. Unë them e mirëpres datën 19 që Gjykata të japë vendimin. E shoh të pamundur që të mendoj çdo gjë tjetër. Ka deputetë dhe ish-ministra që kanë vrarë njerëz që jo vetëm kanë hequr dorë nga mandati madje nuk kanë shkuar as në Prokurori. Mua më intereson drejtësia. Unë dua të jem i lirë. Të kem gojë për të folur dhe shpirt për të menduar.

    • 16:15

      Shtyhet gjyqi për Saimir Tahirin, seanca e radhës në 19 shtator

      Gjykata e Krimeve të Rënda ka shtyrë seancvën për ish-minsitrin e Brenshëm Saimir Tahiri. Mësohet se seanca se radhës ku dhe do të merret një vendim për Tahirin do të zhvillohet në datën 19 shtator.

      Ish-ministri ka mohuar sot në gjykatë akuzat që Prokuroria ka ngritur kundër tij. Tahiri ka thënë se ky proces është i montuar dhe nuk qëndron asnjë akuzë për të.

      Në gjykatë ai është mbrotur vet, por dhe nga avokati i tij Maks Haxhia. Po ashtu Tahiri ka publikuar dhe një dokument ku ai i ka dërguar Mimi Kodhelit për fikjen e radarëve.

      Po ashtu është publikuar dhe një e-mail ku ish-polici Gjergj Kohila u ka dërguar prokurorëve për nisjen e hetimeve për Habilajt.

    • 15:48

      Maks Haxhia flet për mediet: Tahiri i pafajshëm, prokuroria asnjë provë. Ish-ministri bëri mbrojtje brilante

      Avokati i Saimir Tahirit gjatë pushimit që ka marrë gjykata ka dhënë një intervistë për mediet, ku ka theksuar edhe njëherë se akuzat për klientin e tij nuk qëndrojnë. Ai ka thënë para gazetarëve se provat që ka sjellë prokuroria janë gjykuar njëherë në Itali dhe Tahiri ka rezultuar i pafajshëm.

      Maks Haxhia, avokat i Tahirit

      Haxhia u shpreh  se mbrojtja e Tahirit ishte brilante dhe ish-ministri e kishte shkruar vet. “Gjej dhe rastin që të përgëzoj mbrojtjen që ai ka bërë”, tha Haxhia.

      PJESË NGA INTERVISTA

      12 vite burg?

      Këtë unë e kam dëgjuar kohë më parë, dhe unë them që ky proces është i paragjykuar, paramenduar dhe paravlerësuar.

      Nga kush paramendohet dhe paragjykohet?

      Unë nxjerr konkluzion i nxjerr nga mënyra e sjelljes, dhe materialet janë gjykuar në Itali dhe Tahiri ka dalë i pafajshëm.

      Ku është prova që ai ka shkelur ligjin?

      Këtë pyetje kemi bërë që në fillim, se cilat janë këto episode dhe cilat janë ndihmat që ka bërë Tahiri, por nuk kemi marrë asnjë përgjigje.

      Nëse Tahiri dënohet, çfarë do bëni?

      Do respektojmë ligjin, do apelojmë vendimin.

      Çfarë materialesh ka sjellë prokuroria?

      Ka sjellë disa materiale copy-paste dhe ishin të marra keq, prandaj gjyqi duhet të ishte ndërprerë.

    • 15:23

      Gjykata merr pushim, Tahiri lë seancën. Foto me mbështetësit dhe muhabet me gazetarët

      Një pushim të shkurtër ka marrë Gjykata e Krimeve të Rënda, në gjyqin kudnër Saimir Tahirit. Ish-ministri i shoqëruar nga avokati tij ka dalë jashtë ambienteve të gjykatës dhe  së bashku me gazetarët  po konsumon disa biseda që besohet të jenë për gjyqin kundër tij.

      Tahiri po përballet me Prokurorinë dhe Gjykatën sot, ku për disa orë po vijon gjyqin ku për të ësthë kërkuar 8 vite burgim. Ai po ashtu është takuar dhe me disa mbështetës së tij që kanë shkuar sot në gjykatë dhe kanë bërë foto me të.

    • 14:26

      Pas dy orësh përfundon mbrojtja e Saimir Tahirit, ish-ministri kërkon pafajësi

      Saimir Tahiri, ish-minister

      Ish-ministri i Brendshëm Saimir Tahiri ka përfunduar me argumentat, provat dhe faktet e tij duke kërkuar edhe pafajësinë. Pas dy orësh mbrojtje, burime për Dosja.al bëjnë me dije se Tahiri është tërhequr për të lënë të vazhdojë mbrojtja e ish-kryepolicit të Vlorës, Jaeld Çela.

    • 14:26

      Tahiri “përvesh mëngët”, mbrohet vetë para gjyqtarëve: S’jam Saimiri që merrte 30 mijë euro

      Saimir Tahiri tek Krimet e Rënda

      Dosja.al ka zbuluar detaje të reja nga gjyqi i ish-ministrit të Brendshëm Saimir Tahirit. Mësohet se Tahiri “ka përveshur mëngët” dhe ka nisur të bëjë mbrojtjen e vetëvetes. Tahiri tha para togave të zeza se nuk kishte të bënte me grupin e Habilajve duke i akuzuar edhe këta të fundit për mosveprim.

      “Më akuzoni për arratisjen e burgut të Drenovës. Atë natë dhe ditë nga burgu i Drenovës u arratisën 7 persona. Unë kam qënë në një takim zyrtar me Adriatik Lllallën dhe Visho Ajazin. Tani më shpjegoni isha në takim apo duke informuar këto persona? Kë kam urdhëruar që të favorizoj këta persona? Jaerd Çelën ndoshta? Ai nuk ishte drejtor atë kohë por një specialist i thjeshtë. Si mund t’ja jepja këtë urdhër një specialisti të thjeshtë? Dua prova konkrete. Të më thotë Prokuroria si mund të akuzohem për një grup të korruptuar ndërkohë që i denoncoja? Nuk jam unë Saimiri që merrja 30 mijë, por një shofer kamioni. Prokuroria e lë të paqartë qëllimisht këtë gjë,”-mësohet se ka thënë Tahiri. 

    • 14:15

      '140 euro nata maksimimumi', Tahiri 'sulmon' Etilda Gjonajn: S'kam paguar 900 euro nata si ajo tjetra

      Ish-ministri i Brendshëm, Saimir Tahiri ka kërkuar pafajësinë sot në një seancë maratonë që është zhvilluar në gjykatën për Krimet e Rënda. Ish-ministri ka mbrojtur vetë veten, ku që prej orës 11 ka renditur arsyet pse sipas tij, ai nuk është i përfshirë në trafikun e drogës. Dosja.alka mësuar Tahiri nuk ka harruar të thumbojë në këtë seancë, ministren socialiste Etilda Gjonaj, dhe nënkryetarin e bashkisë, Arbër Mazniku që kanë fjetur në hotele luksi.

      “Ju më akuzoni se jam pjesë e trafikut. Jam trafikant që fle me 140 euro nata maksimumi. Pasuria ime është verifikuar në të gjithë Evropën. Është parë sesa kam paguar. S’kam paguar 900 euro si ajo tjetra”-ka thënë Tahiri.

    • 14:08

       ‘Le ta bëjë dhe burgun por ta di…’, Tahiri mbrohet me gjithçka në gjykatë: Jaeld Çela dhe Gjergji Kohila kallëzuan Habilajt në prokurori

      Ish-ministri i Brendshëm, Saimir Tahiri është mbrojtur ashpër para akuzave që janë ngritur ndaj tij në Gjykatën për Krimet e Rënda. Tahiri ka thënë se i ka dërguar 6 shkresa zyrtare ish-ministres së Mbrojtjes, Mimi Kodheli për fikjen e radarëve. Tahiri ka shkuar më tej kur ka thënë se dy ish-oficerët në arrati, Gjergji Kohila dhe Jaeld Çela kanë çuar informacione në prokurori për grupin Habilaj.

      Pjesë nga mbrojtja e Tahirit në gjykatë:

      Gjergji Kohila, përmes një emaili ka njoftuar prokurorinë duke e vënë në dijeni për aktivitetin e grupit Habilaj.  Si ka mundësi që ne jemi një grup trafiku? Dhe nga ana tjetër denoncojmë për trafik? Dhe prokurori nuk e nis kurrë procedimin, por e nisë shumë më vonë.  Si është e mundur që një ministër të ketë rolin e ndihmësit?

      Më akuzoni për përgjimin e Taulant Haxhirajt. Haxhiraj thotë kushot e ministrit, pse qenkam unë ministri nga Vlora? Dhe s’është një ministër tjetër? S’kam asnjë komunikim kurrë me celularët e mi me vëllezërit Habilaj. Le ta bëjë burgun, por ta di se çfarë kam bërë.

      Jaeld Çela referonte në prokurori procedime për Moisi Habilaj, nga informacioni i grupit kriminal. Nëse është kështu, si ia kemi futur njëri-tjetrit? Ata flasin për 5 mln euro që fitoj dhe 20 mln që i marr në zgjedhje. Pse s’ka ardhur prokuroria tek unë dhe tek Rama që të bënin namin…?

      Gjyqtarja e parë ka kaluar çdo afat logjik. Pa prova, e shënoi si targë zyrtare atë të “Audit”, kur ajo është targë personale.

    • 13:49

      Tahiri me skicë në Gjykatë, mbrojtja e ish-ministrit: Më sillni një provë, çfarë kam bërë? I kam blerë cigare grupit?!

      Saimir Tahiri, ish-minister

      Dosja.al zbardh detaje nga mbrojtja e ish-ministrit të Brendshëm, Saimir Tahiri në gjykatën e Krimeve të Rënda.

      Me një skicë në të cilën, Tahiri ka ideuar dhe zhvilluar mbrojtjen e tij, ai i ka kërkuar tre prokurorëve që të sjellin një provë çfarëdo për një nga episodet për të cilat e akuzojnë për trafik droge.

      “Më sillni një provë për katër episodet që më akuzoni. Një grup i strukturuar kriminal kërkon një provë çfarëdo. Cfarë kam bërë? Ngarkim? Shkarkim? Cfarë? Kam ngritur traun? Kam blerë cigare për grupin?”-mësohet se është shprehur ish-ministri. 

    • 12:50

      Dy prokurorët nuk bien në një mendje, ish-ministri: Saktësojeni! Si kam qenë i përfshirë?

      Ish-ministri Saimir Tahiri dhe dy prokurorët e çështjes së tij

      Detaje të reja kanë dalë nga seanca gjyqësore që po zhvillohet ndaj ish-ministrit të Brendshëm, Saimir Tahiri tek Prokuroria e Krimeve të Rënda. Gjatë seancës, gjyqtari Ardit Mustafaj i ka kërkuar dy prokurorëve Dritan Prençit dhe Vladimir Marës që të saktësojnë se kush ishin konkretisht operacionet e trafikut të drogës, të cilët ata dyshojnë se janë favorizuar nga Tahiri. Ndër operacionet, dy prokurorët kanë përmendur edhe atë të bandës së Babicës, ku u kapën 3 978 kg kanabis dhe u arrestua Armando Koçerri. Në këtë moment ka ndërhyrë mbrojtja e Tahirit, e cila është shprehur se nëse kjo është një akuzë e re, procesi gjyqësor duhet të shtyhet. Prokruroria është përgjigjur se nuk është një akuzë e re por një fakt. Sërish në këtë moment ka ndërhyrë gjyqtari Mustafaj, i cili pyeti sërish nëse në provat për Tahirin përfshihej sekuestrimi i drogës së Armando Koçerrit. Në përgjigje dy prokurorët Premçi dhe Mara kundërshtuan njëri-tjetrin. Fakti që dy prokurorët nuk ishin në një mendje, ka ndezur “gjakrat” nga pala e akuzuar, ku vetë ish-ministri Tahiri është ngritur në këmbë dhe i është drejtuar akuzuesve me pyetje.

      “Saktësojeni nëse akuzohem apo jo. Në momentin e sekuestrimit të drogës Prokuroria e Krimeve të Rënda kishte kërkuar leje për arrestimin tim dhe unë po përballesha në Kuvend. Si mund të jem i përfshirë kur kam dorëzuar edhe mandatin e deputetit?,”-mësohet se ka thënë Tahiri gjatë seancës.

    • 12:50

      Tahiri para togave të zeza, përfaqësues të Ambasadës Amerikane në sallën e gjyqit (ROLI)

      Saimir Tahiri në Gjykatë

      Ditën e sotme ish-ministri i Brendshëm, Saimir Tahiri ndodhet në Gjykatën e Krimeve të Rënda ku edhe ka marrë pretencën nga Prokuroria. Burime të Dosja.al bëjnë me dije se në sallën e gjyqit ndodhen edhe përfaqësues të Ambasadës Amerikane, të cilat kanë për detyrë të vëzhgojnë procesin gjyqësor.

    • 12:14

      Seancë deri në mbrëmje për Tahirin, prokuroria kërkon burg të zakonshëm

      Saimir Tahiri, ish-minister

      Seanca në ngarkim të ish-ministrit të Brendshëm Saimir Tahiri pritet të zgjasë deri në mbrëmje. Mbrojtja e Tahirit sapo ka nisur, e pas tij fjalën e kanë avokatët por edhe avokatët e ish-kryepolicit të Vlorës, Jaeld Cela, i cili është në arrati. Burime për Dosja.al, bëjnë me dije se në pretencën e paraqitur në gjykatë, tre prokurorët  Arenc Çela, Dritan Prençi dhe Vladimir Mara i qëndruan akuzave të tyre për Tahirin, dhe kërkuan që të dënohet me 12 vite burg, dhe t’a vuajë dënimin në një burg të sigurisë së zakonshme. 

    • 11:57

      Seanca maratonë në Gjykatë, Tahiri mbrohet: I dërgova shkresë Top Secret Kodhelit për radarët, Habilajt si kam ndihmuar kurrë!

      Dosja.al zbardh detaje nga mbrojtja që ish-ministri i Brendshëm, Saimir Tahiri ka bërë sot në Gjykatën e Krimeve të Rënda. Tahiri ka thënë se nuk i ka ndihmuar kurrë kushërinjtë e tij të arrestuar tanimë në Itali.  Për këtë ai ka sjellë në vëmendje vitet 2013-2014, pasi ata kanë qenë të proceduar për pengmarrje.

      “Prokuroria më akuzon për katër episode, që kanë ndodhur në vitet 2013-2015. Si ka mundësi që prokururia të më akuzojë për kultivim drogë para se të marr detyrën e ministrit të Brendshëm? Policia e Shtetit më 3.10.2013 ata janë dërguar në procedim penal. Si mundet që t’i dërgoja në procedim nëse i favorizoja në trafikun e drogës? Të paktën në dy rastë të tjera, PSH i ka dënoncuar dhe proceduar vëllezërit Habilaj. Artan, Florian dhe Moisi Habilaj, për pengmarrje. Janë dërguar në vijën e dytë për kontroll në TIMs. Si mund t’i bëja nëse i favorizoja? “-mësohet të jetë shprehur Tahiri në Gjykatë.

      Tahiri është ndalur edhe tek çështja e radarëve që nuk punonin. Ish-ministri ka treguar se ka patur një shkresë “Top Secret” të cilën ia ka dërguar ish-ministres së Mbrojtjes, Mimi Kodheli, ku e ka informuar se policia ka konstatuar se radarët nuk punojnë.

      “Unë në kohën që kam qenë ministër i Brendshëm, në vitin 2016, i kam dërguar një shkresë konfidenciale, “Top Secrete”, koleges sime, ish-ministres Mimi Kodheli. Në këtë shkresë, e kam vënë në dijeni se radarët e ushtrisë nuk punonin, pasi Policia kishte konstatuar mosfunksionimin e tyre, duke hapur një rrugë të re për trafikun e drogës.”-ka thënë Tahiri.

    Shto Koment