Aktualitet

Protesta/Policia: Synohet hyrja me forcë në Kuvendit, opozita: Ky skenar gjendet vetëm në zyrën e Ramës

Policia e Shtetit bën me dije se protesta e nesërme e opozitës para Kuvendit do të jetë e dhunshme. Sipas një deklarate për shtyp të Policisë, synimi i protestuesve është hyrja në Kuvend me anë të dhunës. Lidhur me deklaratën e Policisë ka reaguar edhe opozita e bashkuar, e cila shprehet se një skenar i tillë ndodhet vetëm në zyrën e kryeministrit Edi Rama.
Featured image of article: Protesta/Policia: Synohet hyrja me forcë në Kuvendit, opozita: Ky skenar gjendet vetëm në zyrën e Ramës Kuvendi i Shqipërisë dhe kreu i PD-së Lulzim Basha, Monika Kryemadhi e Sali Berisha
Përditësuar:

TIRANË- Policia e Shtetit me anë të një deklarate për shtyp ka bërë me dije se ka marrë disa informacione se protesta e nesërme e opozitës para Kuvendit do të jetë e dhunshme.

Sipas informacioneve e mbledhura nga Policia, mësohet se nga ana e protestuesve synohet hyrja me forcë në sallën e Parlamentit, duke ushtruar dhunë ndaj punonjësve të Kuvendit.

Në deklaratën e saj, Policia u bën apel organizatorëve dhe protestuesve që të distancohen nga dhuna ndryshe forcat e rendit do t’i përgjigjen dhunës me forcën e ligjit.

Njoftimi i plotë i policisë:

Deklaratë e Policisë së Shtetit – 21 shkurt 2019

Policia e Shtetit në zbatim të ligjit “Për tubimet”, si dhe në mbështetje të së drejtës së organizmit të tubimeve paqësore të qytetarëve, ka marrë të gjitha masat për mbarëvajtjen e protestës së njoftuar nga subjektet politike të opozitës, për datën 21 shkurt 2019.

Policia e Shtetit është tërësisht e angazhuar për të garantuar rendin dhe sigurinë publike, si edhe paprekshmërinë e institucioneve gjatë kohës së zhvillimit të protestës.

Nga informacionet e mbledhura nga shërbimet përkatëse, ka të dhëna për nxitje të dhunës dhe organizime me natyrë kriminale. Synohet hyrja me forcë në sallën e Parlamentit, duke ushtruar dhunë mbi personelin që ka detyrimin ligjor të sigurojë mbrojtjen e institucionit themelor të demokracisë.

Për të parandaluar çdo mundësi të tillë, Policia e Shtetit, u bën apel në radhë në radhë të parë organizatorëve që të distancohen hapur nga dhuna dhe të bëjnë thirrje për respektimin e ligjit nga çdo protestues. Po ashtu Policia e Shtetit u bën apel të gjithë atyre që duan të ushtrojnë nesër lirinë e tubimit dhe të drejtën e protestës, që të mos përfshihen në asnjë rast e për asnjë arsye në veprime të dënueshme ligjërisht.

Policia e Shtetit e siguron opinionin publik, se forcat e rendit dhe sigurisë janë të gatshme t’i përgjigjen me forcën e ligjit dhe në proporcionalitet të plotë, çdo veprimi të paligjshëm apo akti dhune. Po ashtu, janë marrë të gjitha masat për identifikimin dhe skedimin e çdo individi që do të evidentohet si shkelës i ligjit, si edhe për ndalimin e për nxjerrjen e çdo shkelësi përpara drejtësisë.

Policia e Shtetit kërkon mirëkuptimin dhe bashkëpunimin e qytetarëve, për bllokimin e disa rrugëve që lidhen me vendin ku do zhvillohet protesta, si dhe për kontrollet e shtuara përgjatë akseve rrugore kombëtare, që ajo është e detyruar të zhvillojë, në interes të sigurisë së qytetarëve dhe të vetë protestës.

Ftohen të gjithë qytetarët që kanë informacione me rëndësi, të kontaktojnë në anonimat në numrin e telefonit pa pagesë 112, ose në Komisariatin Dixhital!

Për më shumë bëhu pjesë e grupit më viral në Facebook, Dosja.al

Pas deklaratës së Policisë, Opozita e Bashkuar me anë të një deklarate për shtyp ka dënuar me prononcimin e Policisë duke e cilësuar si nxitës të dhunës në protestën e së enjtes para Kuvendit të Shqipërisë.

“Nëse ka një skenar dhune apo sulmi ndaj institucioneve, ky skenar gjendet në zyrën e Edi Ramës. Sovrani do të ushtrojë nesër të drejtat e tij, në orën 10.00 para Parlamentit, i cili nuk duhet të mbetet peng i krimit dhe korrupsionit, por t’u kthehet sa më shpejt Shqipërisë dhe shqiptarëve.”

Deklarata e opozitës:

Opozita e Bashkuar dënon më forcë deklaratën e Policisë Politike dhe të Ministrit të fundit të Brendshëm të diktaturës komuniste për nxitjen e dhunës nga opozita në protestën e së enjtes para Kuvendit të Shqipërisë.

Nëse ka një skenar dhune apo sulmi ndaj institucioneve, ky skenar gjendet në zyrën e Edi Ramës.

Të tilla thirrje nga Policia Politike e Edi Ramës janë të dala boje. Protesta e 16 Shkurtit provoi se mes protestuesve nuk ka kriminelë.

Opozita e Bashkuar njofton bandën në krye të qeverisë, Kuvendit dhe të Policisë se koha e kërcënimit të shqiptarëve ka ikur!

Edi Rama mund të ndryshojë axhendën e Parlamentit “339”, mund të arratiset vetë nga Tirana, por është i pafuqishëm të ndryshojë axhendën e popullit!

Sovrani do të ushtrojë nesër të drejtat e tij, në orën 10.00 para Parlamentit, i cili nuk duhet të mbetet peng i krimit dhe korrupsionit, por t’u kthehet sa më shpejt Shqipërisë dhe shqiptarëve.

Më 16 shkurt pas 5 orësh protestë, kryetari i PD-së Lulzim Basha, njoftoi një protestë të dytë edhe më të madhe do të zhvillohej para parlamentit, ditën e enjte në orën 10:00. (Lexo këtu)  Në një konferencë për mediat, ditën e sotme Ruçi u shpreh se duke pasur parasysh informacionet e organeve dhe thirrjet e ndërkombëtarëve ka vendosur të mos zhvillojë seancën e datës 21, ditën e enjte. (Lexo këtu)

(k.m./dosja.al)

Shto Koment