19 Maj 2023, 14:52
Nga m.s
Petar Petkoviç
SERBI- Drejtori i Zyrës për Kosovën në Qeverinë e Serbisë, Petar Petkoviç e ka quajtur “pushtim” ardhjen në detyrë të kryetarit të ri të Mitrovicës së Veriut Erden Atiç, duke thënë se me veprimet e tyre “Kurti dhe Prishtina [zyrtare] duan të dëbojnë popullin serb nga Kosova dhe të provokojnë luftë”.
“Simboli i atij pushtimi dhe ajo leckë [flamuri i Kosovës] që e kanë ekspozuar në ndërtesën komunale të Mitrovicës…nuk do të jetë kurrë flamur për ne. Do të qëndrojë atje për aq kohë sa vetë pushtimi, dhe kjo do të thotë jo për shumë kohë”, tha Petkoviç në një konferencë për media pas betimit të Atiç si kryetar i komunës.
Atiç, më 19 maj u betua para Kuvendit Komunal të Mitrovicës së Veriut, procedurë kjo solemne për të marrë detyrën si kryetar. Atiç fitoi rreth 550 vota ose 66 për qind të votave. Gjatë seancës solemne të betimit të tij, në ndërtesën e komunës është vendosur flamuri i Kosovës.
Pjesëmarrja në zgjedhjet e jashtëzakonshme lokale ishte 3.47 për qind e trupit zgjedhor.
Petkoviç në deklaratën e tij tha se është e papranueshme që dikush që ka fituar kaq vota tash të udhëheqë komunën e Mitrovicës së Veriut.
“E keni të qartë se dikush që nuk ka legjitimitet nuk mund t'i përfaqësojë qytetarët e asaj komune siç ka thënë Atiç, kur ka deklaruar se do të jetë në shërbim të të gjithë qytetarëve. Cilët qytetarë, kur për të kanë votuar vetëm dy serbë?”, tha ai.
Petkoviç gjithashtu bëri të ditur se presidenti i Serbisë Aleksandër Vuçiç është duke biseduar me të dërguarin e posaçëm të Bashkimit Evropian për dialogun Kosovë-Serbi, Mirosllav Lajçak për, siç tha, “të gjitha pasojat e sjelljes, incidenteve dhe provokimeve të Kurtit, të cilat mund të kthehen në krizën më të madhe deri më tani”.
Pak më herët gjatë ditës, Lista Serbe, që është partia më e madhe e serbëve në Kosovë, i ka dhënë afat kryeministrit të Kosovës, Albin Kurti, deri më 1 qershor për të “ndaluar represionin, shpronësimin, arrestimin, persekutimin dhe sulmet ndaj serbëve”.
Zyrtarë të kësaj partie thanë se nëse kërkesa e tyre nuk plotësohet, “përgjigjja e popullit serb do të pasojë më 1 qershor, ata do ta mbrojnë veten me të gjitha mjetet", tha Simiç duke mos cekur se cilat janë këto mjete.
Petkoviç, gjatë konferencës mbështeti ultimatumin e Listës Serbe, duke thënë se “ne do të jemi me popullin tone”.
“Do të jemi me ta edhe me 1 qershor, deri kur serbët t'i kenë dhënë afat ndërkombëtarëve dhe Kurtit që të vijnë në vete dhe të ndalojnë provokimet”, u shpreh Petkoviç duke shtuar se “historia na mëson se çdo pushtim ka një fund, dhe ky do të përfundojë kur serbët të vendosin se ka mbaruar”.
Zgjedhjet në katër komunat në veri të Kosovës, të banuara me shumicë serbe – Mitrovicë e Veriut, Zveçan, Leposaviq dhe Zubin Potok – u mbajtën pasi kryetarët paraprakë nga partia më e madhe e serbëve në Kosovë, Lista Serbe, dhanë dorëheqje nëntorin e kaluar.
Ata u larguan nga institucionet në shenjë pakënaqësie me një vendim të Qeverisë së Kosovës që obligonte shoferët me makina me targa ilegale të lëshuara nga Serbia, t’i riregjistronin ato në targat legale RKS – Republika e Kosovës.
Pjesëtarët e komunitetit serb gjerësisht bojkotuan zgjedhjet e prillit dhe thanë se nuk i pranojnë rezultatet, përkatësisht kryetarët e rinj nga komuniteti shqiptar.
Shtetet e QUINT-it të enjten vonë kanë shprehur shqetësimin e tyre për situatën e krijuar në veri të Kosovës, duke thënë se zgjedhjet e 23 prillit nuk përbëjnë zgjidhje politike të qëndrueshme afatgjatë për komunat e përfshira, për shkak të bojkotit nga komuniteti serb.
Nëpërmjet një deklarate të përbashkët, ky grup shtetesh i përbërë nga Shtetet e Bashkuara, Franca, Italia, Gjermania dhe Mbretëria e Bashkuar u kanë bërë thirrje të gjithë aktorëve “që urgjentisht të punojnë së bashku mes vete të gjitha palët e interesuara, përfshirë komunitetet lokale, drejt një zgjidhjeje që siguron demokraci të qëndrueshme, përfaqësuese dhe pjesëmarrëse në këto komuna”.
Marrë nga Radio Evropa e Lirë
petar petkoviq kosove serbi
Bota
19 Maj 2023, 14:12
a.l
Rishi Sunak në Hiroshima
JAPONI- Kryeministri Britanik Rishi Sunak ndodhet në Hiroshima, në kuadër të samitit që po zhvilloh...
Bota
19 Maj 2023, 13:59
a.l
Përmbytje
Vala e motiti të keq ka përfshirë prej disa ditësh disa zona në Itali, më konkretisht Emilia Romagna dhe Bolo...
Bota
19 Maj 2023, 13:46
a.l
Varrezat në Sidnei
SIDENI- Disa komuniteteve ortodokse dhe myslimane në Sidnei u kanë mbetur vetëm 3 vite kohë para se të mb...
Bota
19 Maj 2023, 13:38
a.l
Lista Serbe
SERBI- Pas betimit të kryetarit të ri të Mitrovicës Veriore, Erden Atiç, Lista Serbe, që refuzoi të ...
Bota
19 Maj 2023, 13:30
a.l
Erden Atiç
KOSOVË- Erden Atiç është tashmë zyrtarish kryetari i ri i Mitrovicës së Veriut. Pas betimit, në...
Bota
19 Maj 2023, 13:22
a.l
Foto ilustruese
SHBA- Aplikacioni i famshëm 'Tik-Tok' ka sjellë një risi në përdorimin e saj dhe llojet e videove që qarkull...
Bota
19 Maj 2023, 13:13
a.l
SIlvio Berlusconi
ITALI- Ish-kryeministri italian, Silvio Berlusconi pritet të dalë nga spitali San Raffaele i Milanos brenda disa or...
Bota
19 Maj 2023, 13:09
a.l
Hiroshima
JAPONI- Në samitin që po mbahet në Hiroshima në Japoni, liderët e G7 kanë kërkuar që Rusia të t&eum...
Bota
19 Maj 2023, 13:01
a.l.
Mohammed Bin Salman dhe Volodymyr Zelenskyy
ARABIA SAUDITE- Pas takimit me liderët e G7 në Japoni, presidenti ukrainas Volodymyr Zelenskyy zhvil...
Bota
19 Maj 2023, 12:53
a.l
Plantacioni i drogës në Gjermani
GJERMANI- Një operacion antidrogëështë zhvilluar nga autoritetet në Gjermani. Mediat v...