Politike

Publikohet VIDEO, Lefter Alla kapet duke thithur kokainë: Është sulm politik dhe montazh. PD: Të shkarkohet

  • Vjen reagimi i parë nga Partia Socialiste: Për Lefter Allën fliten fjalë pozitive në zonë
  • Artan Hoxha pas fotove ka publikuar edhe videon, ku shihet se Lefter Alla, kreu i Bashkisë Bulqizë, duke thithur kokainë. Pas publikimit të videos, Alla ka thënë se është montazh dhe është publikuar nga PD për ta sulmuar politikisht, duke ndryshuar versionin e parë që kishte deklaruar për Dosja.al. Nga ana tjetër PD kërkon shkarkimin e tij, por nga maxhoranca ende nuk ka një reagim.
    Featured image of article: Publikohet VIDEO, Lefter Alla kapet duke thithur kokainë: Është sulm politik dhe montazh. PD: Të shkarkohet Lefter Alla, Artan Hoxha dhe selia e PD

    TIRANË- Lefter Alla, kreu i Bashkisë Bulqizë është kapur në një ambient publik duke konsumuar kokainë. Gazetari Artan Hoxha kishte paralajmëruar që do publikonte një video, dhe pamjet sot janë bërë publike. Sipas shihet nga video, Alla është në një lokal në zonën e Bulqizës duke thithur kokainë, pak ditë pasi kishte fituar zgjedhjet.

    Por dhe pas publikimit të pamjeve, Alla nuk ka pranuar se është ai dhe akuzon Partinë Demokratike se po e sulmon politikisht dhe pamjet janë një montazh. Në një reagim në Facebook, Alla shkruan se asgjë nuk është e vërtetë nga ajo që është transmetuar në media dhe ai nuk do japë dorëheqjen.

    Për më shumë bëhu pjesë e grupit më viral në Facebook, Dosja.al

    Por Partia Demokratike në një deklaratë zyrtare, kërkon largimin e Allës nga drejtimi i Bashkisë Bulqizë. Sipas reagimit të PD, Alla është fytyra e asaj që ai përfaqëson në qeverisje dhe për ta është ilegjitim në mbajten e postit. Gazetari Artan Hoxha që publikoi dhe videon në AbcNews, ka thënë se është kërcënuar që të mos bënte publike videon. Ai i ka bërë thirrje Policisë dhe Prokurorisë që të hetojë dhe të marrë masa, pasi kërcënimet kanë qenë serioze.

    (A.B. Dosja.al)

    • 19:38

      Pasi e denoncoi publikisht, Bardhi ia ‘dorëzon’ SPAK-ut: Të zbulohet grupi që shpërndan drogën, veproni pa asnjë vonesë!

      Pamje nga video dhe Gazment Bardhi

      Sekretari i Përgjithshëm i Partisë Demokratike, Gazment Bardhi ka reaguar pas publikimit të videos ku kryebashkikaku i PS-së në Bulqizë, Lefter Alla shfaqet duke pirë drogë. Pasi e denoncoi rastin në emisionin “Opinion”, Bardhi u shpreh se tanimë Prokuroria e Posaçme ka një mundësi që të vendosë para përgjegjësisë një grup kriminal që shkërndan drogë në Bulqizë.

      “SPAK ka një mundësi reale të zbulojë dhe vendosë përpara përgjegjësisë një grup të stukturuar kriminal që merret me shpërndarjen dhe trafikimin e kokainës në zonën e Bulqizës. Edi Rama i Bulqizës duhet të ndiqet penalisht për moskallëzim krimi ndaj atyre që i kanë siguruar kokainën. SPAK duhet të veprojë pa asnjë vonesë!,”-shkruan Bardhi.

    • 18:29

      LEFTERI e thithi me sy mbyllur, ka të drejtë, s’e njihte drogën, pse kryebashkiaku i Bulqizës nuk gënjen

      Lefter Alla, që mban dhe detyrën e kreut të Bashkisë Bulqizë, është kapur duke thithur kokainë. Por Lefter Alla ka thënë se kurrë nuk ka parë drogë me sy, e nuk nuk e njihte drogën se çfarë është. Në deklaratën e tij Alla ka 100% të drejtë, pasi siç mund të shihet dhe në videon (edhe pse në një cilësi të ulet) ai është pa syze kur thith kokainën. Po ashtu me aq sa mund të shihet ai mbyll dhe sytë kur nga hunda e tij deporton një pluhur i bardhë që është nxehur pak më herët në pjatën qëndron mbi banak dhe përzihet disa herë me një kartë plastike.

      Lefter Alla, kreu i Bashkisë Bulqizë

      Pra Lefteri ka të drejtë, ai nuk e ka parë drogën me sy, por vetëm në momentin që e ka thithur, se para dhe pas thithjes e vështron shumë qartë. Sidomos pas thithjes, sepse mjekësia thotë që kokaina qartëson shikimin dhe mendjen për disa minuta.

      Por Lefteri nuk u ndal në një reagim për Dosja.al, ku tha “turp është por nuk e njoh drogën”. Sërish ka të drejtë se ai dhe nëse e ka thithur nuk e dimë nëse ai ka pasur dijeni se çfarë ka thithur. Duhet t’i bësojmë Lefterit, ai ka qenë i lodhur nga fushata, nga gara me shumë kandidatë dhe bindi të gjithë banorët e Bulqizës. U fut në miniera e doli sërish, i ra cep më cep Bulqizës, ngjiti e zbriti kodra e male (pasi kjo bashki ka një terren të thyer malor), e në fund pas një muaj sfilitës duke luftuar me kandidatët përballë, ai festoi deri në orët e vona të natës.

      Një burim i besueshëm i tha Dosja.al se i sapo mandatuari atë natë ishte i lodhur dhe kërkoi një paracetamol se i dhimbte koka (thonë që kishte konsumuar dhe alkool). Një prej të pranishmëve (edhe për servilosje, se helbete Lefteri u bë kryetar) i tha: Zoti Alla kam unë paracetamol, por vetëm se është pluhur dhe ka efekt të menjëhershëm. Pas kësaj Lefteri Nuk pyeti më dhe siç shihet në video, pasi e thërrmoi pak me kartë nisi thithjen, sepse koka po i shpërthente nga dhimbja. Prandaj Lefteri ka të drejtë, kokainën e konsumoi me sy mbyllur dhe “nuk ka pasur” dijeni se çfarë po thithje.

      *Shkrimi nuk ka fakte të vërteta, është i trajtuar me satirë

    • 18:14

      Lefter Alla kapet duke konsumuar kokainë, PD: Është modeli që ofron ai në qeverisje, të shkarkohet menjëherë

      Partia Demokratike ka reaguar pas publikimit të videos së kreut të Bashkisë Bulqizë duke u shprehur se pamjet janë shokuese dhe tregojnë modelin e Lefter Allës në qeverisje. Më tej në reagim shtohet se Lefter Alla është pasqyra ku të gjithë mund të shohin Edi Ramën e kokainës. PD kërkon largimin e menjëhershëm nga detyra të Lefter Allës. “Edi Rama i Bulqizës duhet të ndiqet penalisht për moskallëzim krimi ndaj atyre që i kanë siguruar kokainën”, shkruan partia opozitare.

      Selia e PD dhe Lefter Alla

      DEKLARATA E PLOTË

      Kandidimi në 30 Qershor nga Edi Rama i individëve me të shkuar kriminale apo personave të lidhur me krimin e organizuar ka qenë strategji e Edi Ramës për të vazhduar bashkëqeverisjen me krimin. Video shokuese e kryebashkiakut ilegjitim të emëruar nga Edi Rama në Bulqizë, është modeli që ofron ai në qeverisje. Lefter Alla është pasqyra ku të gjithë mund të shohin Edi Ramën e kokainës. Ai ka jo vetëm përgjegjësinë politike për përzgjedhjen e këtyre individëve, por edhe përgjegjësinë ligjore për shkarkimin e menjëherëshëm nga detyra të Lefter Allës. Edi Rama i Bulqizës duhet të ndiqet penalisht për moskallëzim krimi ndaj atyre që i kanë siguruar kokainën. Përdorimi i kokainës në ambiente publike nga Edi Rama i Bulqizës provon, për fat të keq, degradimin e Partisë Socialiste nga një parti politike në një bandë trafikantësh dhe përdoruesish droge. Është kjo arsyeja pse të rinjtë e mirëshkolluar dhe shqiptarët e ndershëm kanë humbur besimin dhe kërkojnë të largohen nga Shqipëria.

      Ndarja e politikës nga krimi është emergjencë kombëtare! Largimi i trafikantëve dhe përdoruesve të drogës nga politika është hapi kyç për t’i hapur rrugë një qeverisje normale në Shqipëri dhe për të kthyer besimin tek të rinjtë se meritokracia dhe jo lidhja me krimin janë mundësia për të bërë karrierë. Kjo ndodh vetëm me largimin e Edi Ramës, njeriut të kokainës që promovoi bashkëqeverisjen me krimin dhe qëndron në pushtet me mbështetjen e krimit.

    • 18:10

      Thithte kokainë mbi banak, REAGON për herë të parë Lefter Alla: Montazh i PD, më shantazhojnë grupet kriminale

      Kryebashkiaku i Bulqizës, Lefter Alla ka reaguar menjëherë pas publikimit të videos ku shfaqet duke thithur kokainë në banakun e një lokali. Në statusin e tij në Facebook, Alla shkruan se pamjet janë të montuara njësoj si ‘Babale’ duke premtuar se çështjen do ta çojë edhe në Gjykatë.

      Lefter Alla dhe Ervin Salianjin

      Numri një i Bulqizës pretendon gjithashtu se është kërcënuar nga grupe kriminale, që sipas tij dikur plaçkisnin pasurinë e Bulqizës me bekimin e Partisë Demokratike dhe tanimë që nuk e bëjnë dot më e kanë shantazhuar.

      “Unë nuk jam në detyrë për të kënaqur orekset e mbushur xhepat e klientëve të PD që për vite me radhë e kthyen Bulqizën në një parajsë për grabitje e ferr për qytetarët. Jam këtu për të punuar për qytetarët e thjeshtë dhe jam krenar që një nga punët më të mira që kam bërë ka qenë largimi i asaj tufe grabitësish që sot montojnë video në SHQUP,”-shkruan ndër të tjera Alla. 

    • 18:07

      Babai doli duke thithur kokainë, familja e Lefter Allës “ngujohet” nga turpi, djali i fortë zhduk të gjitha gjurmët (FOTO+DETAJE)

      Videoja e publikuar nga gazetari Artan Hoxha, ku kryebashkiaku i Bulqizës Lefter Alla shihet teksa merr kokainë, ka dhënë efekt edhe tek familjarët e tij. Më konkretisht, djali i Allës, Enio ka marrë masa drastike në rrjetet sociale. Në një vëzhgim në rrjetet sociale, Dosja.al vuri re se 19-vjeçari, që është arrestuar më parë me lëndë narkotike në makinë, ka fshirë të gjitha fotot nga profili i tij i Instagramit. Madje, Enio ka ndërruar edhe emrin duke vendosur pseudonimin “Loku”.

      Kjo gjë na lë të nënkuptojmë se familja e Allës është ‘ngujuar’ nga publiku dhe po qëndron në heshtje pas ‘boom’-it të madh në media. Enio Alla nuk e mori këtë vendim as pas arrestimit të tij, që tashmë ndodhet nën masën “detyrim paraqitjeje”, por mesa duket videoja e të atit teksa thith kokainë e vënë nën presion publik. Tashmë që të gjithë ia panë të atin, edhe Enio që herën e parë i pyeti forcat “Shqiponja” nëse ia njohnin të atin, nuk do të ketë më nevojë të prezantohet! Vetë Lefter Alla ndërpreu edhe linjën telefonike live për mediat, në momentin që u kontaktua që të jepte një koment mbi videon.

    • 17:22

      Del VIDEO, me kartë krediti si mjeshtër, ja si thith kokainën kryebashkiaku i Bulqizës, në banakun e lokalit zbras pjatën

      Gazetari Artan Hoxha ka publikuar pamjet sesi kryebashkiaku i Bulqizës, Lefter Alla kapet duke konsumuar kokainë në një ambient publik. Në videon e publikuar sot nga “Abc News”, Lefter Alla edhe pse e mohoi kategorikisht për Dosja.al se nuk ishte ai personi në video, në pamje shihet qartë sesi Alla merr kokainë. Me një kartë krediti ai përgatit drogën të cilën e ka vendosur në një pjatë tek banaku i një lokali. Gazetari Artan Hoxha tha se pamjet janë kapur nga kamera sigurie dhe momenti është fiksuar disa kohë më parë.

      “Kemi të bëjmë me një rast që është shumë i rëndë. Kjo konfirmon akuzat e PD që kërkoi të fusë me ligj testin për narkotikët për funksionarët e lartë. Është një rast që përbën problem. Kemi të bëjmë me njerëz që janë zgjedhur me votën e qytetarëve dhe marrin vendime për të mirën e qytetarëve. Për mirëadminstrimin e zonës. Problematika tjetër është se si është e mundur që këta persona i shpëtojnë filtrit të përzgjedhjes nga ata që i kandidojnë. Këtu është një ambient publik dhe bëhet fjalë për një moment diskreditues”, tha Artan Hoxha.

    • 17:12

      ”Kërcënim me jetë”, Artan Hoxha thirrje policisë: Nëse ndodh gjë në Dibër, do të ketë pasoja, presion që videoja e kryebashkiakut të mos dilte

      Gazetari investigativ Artan Hoxha ka denoncuar se është kërcënuar për të mos e publikuar videon e kryebashkiakut të Bulqizës, Lefter Alla duke pirë kokainë. Në fjalën e tij në studion e “Abc News”, Hoxha tha se ai vetë dhe persona të afërt me të janë kërcënuar që prej ditës së djeshme kur ai doli dhe tregoi se posedonte videon, duke bërë që gazetari të lëshojë një paralajmërim edhe për Policinë e Shtetit.

      “Dje gjatë gjithë ditës dhe gjatë gjithë darkës por ka vazhduar me të gjitha llojet e mundësive që kjo video të evitohet. Për mua nuk përbën objektiv kryesor personi por fenomeni. Mbrojtja ime më e mirë është e vërteta por e vështirë se ne kemi fëmijë, grua pas. I bëj thirrje policisë në Dibër dhe Tiranë se nëse do të ketë pasoja mbi njerëz që s’kanë lidhje me këtë histori. Policia të ketë para syve nëse do të ketë ngjarje pas publikimit të videos, mbi ta do të ketë pasoja të rënda. Kanë kërcënuar me jetë njerëzish dhe familjesh, që të mos publikohet kjo video. Janë njerëz që janë kërcënuar që të mos publikohen këto pamje. Mendojnë se kjo bëhet për interesa lokale dhe për të kontrolluar territorin. Më thanë, nëse ti bën këtë, filani atje ka për t’a paguar,”-tha Hoxha.

    • 12:58

      Telefoni ‘busy’/ Lefter Alla struket pas denoncimit të PD, iu ndërpret lidhjet live mediave…por ja detajet, kokainën e mori për të festuar FITOREN e mandatit

      ‘Line Busy’, kjo është e vetmja përgjigjie që vjen nga numri i telefonit të kryebashkiakut Lefter Alla, pas denoncimit të Partisë Demokratike, se Alla është filmuar në pamjet e publikuara nga gazetari Artan Hoxha duke marrë kokainë në banakun e një lokali. Thuajse të gjitha televizionet kanë tentuar të kontaktojnë përmes telefonit me Allën. Pak minuta pas daljes së Salianjit, Dosja.al mundi të marrë një reagim fare të shkurtër nga Alla, dhe më pas linja u mbyll. Ndërkohë që në lidhjen me Report Tv, kryebashkiaku e ndërpreu pasi tha se nuk mund të dëgjonte. Pasi e mbylli, redaksia e provoi për të paktën 5 herë por pa rezultat.

      Foto të kryebashkiakut duke pirë kokainë.

      Por çfarë ka ndodhur me pamjet ku është filmuar Lefter Alla?

      Burime të sigurta, i konfirmuan Dosja.al se është kryebashkiaku i Bulqizës, ai që është filmuar duke marrë kokainë, duke shtuar edhe kohën dhe rrethanat e ngjarjes. Një natë pas mbylljes së numërimit të votave në Bulqizë, ku Alla u zgjodh kryetar, ai ka qenë në një lokal bashkë me miq të tij, dhe ka konsumuar kokainë për të festuar sipas mënyrës së tij “fitoren”. Atë që ligji nuk ia ndalon, por morali politik po, duket se e ka detyruar Allën të fshihet dhe të mos i hapë më askujt telefonin. Mbetet të shohim sesi do të vijojë kjo telenovelë. 

    • 12:45

      Merr kokainë mbi banakun e lokalit, çfarë thoshte dje kryebashkiaku i Bulqizës: Se kam parë kurrë drogën me sy, është montazh…

      Publikimi i disa fotografive nga gazetari Artan Hoxha ku në fokus është një kryebashkiak socialist që konsumon kokainë, janë kthyer tashmë në një mister për mediat. Partia Demokratike akuzon kryebashkiakun Lefter Alla se është ai personi që është filmuar duke marrë kokainë, ndërkohë që vetë Alla këmbëngul që nuk është ai personi në video. Ditën e djeshme, ai pati një komunikim me Dosja.al ku mohoi në mënyrë kategorike se ishte ai kryebashkiaku që merrte kokainë në banakun e një lokali.

      Lefter Alla dhe pamjet duke konsumuar kokaine

      Jo nuk është e vërtetë. Nuk ka lidhje me emrin tim. S’ka lidhje me mua hicc droga. Se njoh as si material. E di që është turp ndoshta që e them, por nuk ka lidhje me mua kjo. Le të vazhdojë Bardhi me shantazhet e veta.”-tha Alla për Dosja.al. Ndërkohë që sot, i pyetur sërish nga Dosja.al, Alla tha se: Nuk jam unë në video, është montazh, po më bëhet shantazh politik. 

    • 12:13

      Kryebashkiaku që merr drogë. PD zbulon emrin, Salianji: Lefter Alla konsumon kokainë

      Ervin Salianji ka kërkuar largimin e kryebashkiakut të Bulqizës, Lefter Alla, pasi sipas PD është Alla, kryebashkiaku që u publikua në foto nga gazetari Artan Hoxha,  duke marrë drogë. Ish-deputeti i Partisë Demokratike, thotë se në pamje është Alla, dhe më tej akuzon qeverinë dhe kryeministrinë se janë këto cilësitë që i ka veshur platformës qeverisëse.

      “Opinioni publik është tronditur sot nga pamjet sesi kryebashkiaku ilegjitim i Bulqizës, i emëruar nga Edi Rama, është duke konsumuar kokainë.  Kokaina, heroina, kanabisi vjedhja, zhvatja janë cilësitë kryesore të kësaj bande që vjedh vendin. Janë cilësitë e kryeministrit.”-tha Salianji. 

      Më tej, në një deklaratë nga selia blu, Salianji foli sërish për emërimin e Artur Metani, në krye të Inspektoriatit të Lartë të Drejtësisë dhe tha se ky emërim është në kundërshtim të plotë me ligjin dhe Kushtetutën, pasi sipas tij, Metani ka mbajtur një post politik, si këshilltar i Presidentit, që sipas PD e pengon të jetë Inspektor i Lartë i Drejtësisë.

      “Janë lidhjet me krimin, babëzia dhe hajdutëria, motivi që e shtyn Edi Ramën të kapë sistemin e drejtësisë. Siç vulosi emërimin anti-kushtetues të Artur Metanit, në krye të ILD. Emërimi, në kundërshtim me ligjin dhe Kushtetutën. Një jurist s’mund të jetë inspektor i lartë, nëse ka mbajtur post politik. Metani, në shkelje të ligjit, pasi ishte këshilltar i presidentit dhe ligji e sqaron qartë që ky është post politik. Dihej që Artur Metani ishte funksionar politik.”-tha Salianji.

    • 9:48

      Me kokën ulur tek banaku, publikohen fotot e kryebashkiakut shqiptar duke pirë kokainë (VD)

      Një Kryetar Bashkie është filmuar duke pirë kokainë. Fotot janë publikuar sot ekskluzivisht në emisionin e Enkel Demit “Abc-ja e Mëngjesit”. Fotot janë vënë në dispozicion nga gazetari investigativ Artan Hoxha. Pritet që në orët në vijim, gazetari  të publikojë edhe videon, ndërsa më poshtë janë fotot ku shihet momenti kur kryebashkiaku është duke pirë kokainë.

    Shto Koment