Përshkallëzohet situata në Lindjen e Mesme/ SHBA vijon bombardimet, Irani përgjigjet me sulme në shtetet e Gjirit
Shetet e Gjirit Persik dënojnë sulmet iraniane ndaj infrastrukturës civile: Janë krime lufte 18 Korrik, 17:37 ...
Shetet e Gjirit Persik dënojnë sulmet iraniane ndaj infrastrukturës civile: Janë krime lufte 18 Korrik, 17:37 ...
Abuizimi me fondet në Durrës, zbardhen dëshmitë/ Elisabeta Mataj: Jam qytetare e lirë, kush ma ndalon kazinonë...
Falja e pronave publike në Dhërmi e Palasë/ Berisha: PD nuk do i njohë kurrë këto vendime të Ramës 18 K...
Atentati në Sarandë/ Si u organizua sulmi ndaj 50-vjeçarit, dyshimet për arratisjen me skaf 18 Korrik, 10:00 ...
Përmes një reagimi në rrjetet sociale, Tare e cilëson këtë një arritje të rëndësishme për kulturën shqiptare, por njëkohësisht ndalet te mënyra se si trajtohen artistët në vend.
TIRANË- Gazetari dhe studiuesi Auron Tare ka reaguar pas lajmit se mjeshtri i fyellit dhe culës dyjare, Vendim Kapaj, është bërë pjesë e kolonës zanore të filmit më të ri të regjisorit Christopher Nolan, "Odisea".
Përmes një reagimi në rrjetet sociale, Tare e cilëson këtë një arritje të rëndësishme për kulturën shqiptare, por njëkohësisht ndalet te mënyra se si trajtohen artistët në vend. Sipas tij, kombi nuk nderohet kur bota na duartroket, por kur di të respektojë dhe të vlerësojë njerëzit e tij, përpara se ta bëjnë të tjerët.
Reagimi i Tares vjen në një kohë kur historia e Vendim Kapajt ka rikthyer në vëmendje edhe realitetin e artistit, i cili, pavarësisht titullit "Mjeshtër i Madh" dhe karrierës mbi 50-vjeçare, ka punuar në shërbimin e pastrimit të Bashkisë së Vlorës, ndërsa vazhdonte të kultivonte muzikën tradicionale shqiptare.
Me mesazhin e tij, Tare ngre një reflektim më të gjerë për mënyrën se si Shqipëria vlerëson figurat e saj të kulturës, duke theksuar se mirënjohja nuk duhet të vijë vetëm pasi artistët marrin duartrokitjet e botës.
Postimi i plotë:
"Tu rrojë "Kënua"!
Dje, në një barakë druri diku në bregdet, një peshkatar më ftoi të ulesha.
Ulu, drejtor! - më tha me atë respektin që shqiptarët vazhdojnë t'ua ruajnë per ofiqe të vjetra.
Më pëlqeve shumë te ajo intervista për Vendimin tonë - vazhdoi. - Ai është mjeshtër i madh. Po e di ç'punë bënte dikur bashkë me mua?
shiste peshk me biciklete - thashe.
Pastronim plehrat në Vlorë, o babam...
E tha qetë. Pa mllef. Si një fakt që nuk kishte më nevojë për koment.
Ai është fisnik. Nuk ankohet kurrë. Po të lumtë ty që e kujton e që e respekton. Hajde, ta ngremë një gotë për Vendimin!
Përplasëm shishet e birrës.
Për artistin e madh që të dy e duam fort... Sa për këta palaçot... t'u rrojë Kënua!
Po kush është Kënua? e pyeta i habitur.
Peshkatari qeshi.
Kënua, mor burrë... ai zeshkani që erdhi e na klepsi paratë!
Qeshëm të dy. Por, sapo u ndamë, më mbetën në mendje fjalët e tij.
Kisha ndërmend t'ia kushtoja këto radhë mikut tim të vjetër, mjeshtrit të fyellit, Vendim Kapaj. Një artist i rrallë dhe një njeri që e ka mbajtur dinjitetin mbi supe pa bërë zhurmë, pa kërkuar favore dhe pa u përkulur para oborreve të pushtetit.
Për shumë vite kemi ndarë emocione dhe udhë artistike. Si zakonisht, ato mbetën larg syrit të burokratëve të kulturës. Sepse burokrati ynë ka një dhunti të rrallë, nuk sheh kurrë atë që ka vlerë. Ai sheh vetëm atë që prodhon ceremoni.
Por, duke marrë penën në dorë, e kuptova se ky shkrim nuk i takonte më Vendimit.
Ai i takon shoqërisë sonë.
Asaj shoqërie që politika ka marrë përsipër ta beje "evropiane" me aq zell, sa, në këtë hargalisje për t'u dukur moderne, ka harruar të mbetet shqiptare.
Na u desh një film hollivudian që të kujtoheshim se fyelli i Vendim Kapajt dhe polifonia shqiptare qenkan pasuri botërore. Menjëherë shpërtheu patriotizmi ceremonial, flamuj, statuse, deklarata, fotografi dhe mburrje pa fund.
Shqiptari ka një ves të vjetër. Thesarin që ka në prag të shtëpisë nuk e sheh. Mjafton t'ia vulosë i huaji dhe menjëherë e shpall mrekulli.
Po këto vlera ku qenë dje?
Ku ishin një javë më parë?
Ku ishin një vit më parë?
Ishin aty ku kanë qenë gjithmonë.
Vendim Kapaj, me biçikletën e tij të vjetër, duke shitur peshk në Vlorë.
Goliku, mjeshtri i polifonisë, me dhitë e tij në Bënçë.
Lebërit, duke mbajtur gjallë këngën që ua lanë amanet të parët me tufat e bagetive ne kullota.
Askush nuk i pengoi të ishin të mëdhenj.
Por edhe askush nuk u kujdes për ta.
Në Shqipëri artisti kujtohet vetëm kur duhet të zbukurojë një podium. E thërrasin të këndojë në inaugurimin e një rruge, ta shoqërojë me iso ardhjen e ndonjë ministri, të bëhet sfond folklorik i ndonjë fjalimi Kryeministror. Por sapo mbaron ceremonia, politikanët marrin duartrokitjet, ndërsa artisti kthehet në vetminë e tij.
Sot desha të shkruaja për mrekullinë e polifonisë sonë.
Nuk munda.
Sepse më doli përpara një kronikë e vitit 2022.
Vendim Kapaj, mjeshtri i fyellit, pastronte plehrat e qytetit.
Mos e quani tragjedinë e Vendimit. Ai punoi gjithë jetën me fisnikërinë që vetëm artistët e mëdhenj e njohin. Nuk u ankua. Punoi për të mbajtur familjen.
Tragjedia është e jona.
Është tragjedia e një shoqerie që, brez pas brezi, po humbet copëza të identitetit të vet dhe nuk e kupton se po varfërohet shpirtërisht.
Eshte Tragjedia e një shteti që nuk gjen dot një vend dinjitoz për një artist të këtij rangu, por gjen miliona për spektakle që harrohen sapo fiken projektorët.
Një Ministri Kulture që nuk lodhet duke financuar festivale glikosh, trahanash, lakrorësh e pastërmash, sikur të ishte drejtoria e gastronomisë dhe jo institucioni që duhet të mbrojë kujtesën shpirtërore të kombit.
Një ministër që nuk la studio televizive pa folur për "Kënon", por nuk gjen një minutë për të folur për Vendim Kapajn, për Golikun, për rapsodët dhe mjeshtrit që mbajnë mbi supe kulturën shqiptare.
Pse nuk ngrihen shkolla vere për këta artistë?
Pse nuk mbështeten që ta përcjellin artin e tyre te brezi tjetër?
Pse nuk u jepet dinjiteti që e kanë merituar prej kohësh?
Apo kujtohemi për ta vetëm kur na i zbulon Hollivudi?
Ai që sot hyn me tingujt e fyellit në tempullin botëror të kinematografisë, dje mblidhte mbeturina për të siguruar bukën e familjes.
Dhe sot dëgjojmë britma patriotike, sikur kombi u shpëtua vetëm pse bota më në fund dëgjoi fyellin shqiptar.
Jo.
Kombi nuk nderohet kur bota na duartroket.
Kombi nderohet kur di të nderojë bijtë e vet përpara se t'ia zbulojë bota.
Ndryshe mbetemi ata që kemi qenë gjithnjë, mjeshtër për të brohoritur pas çdo suksesi të vulosur nga të huajt dhe po aq mjeshtër për të kaluar pranë njerëzve tanë të mëdhenj pa ua hedhur sytë.
Prandaj sot nuk munda të shkruaj vetëm për Vendimin dhe artin e tij. Sa herë përpiqesha të flisja për fisnikërinë e një artisti të madh, më dilte përpara fytyra e një shoqërie që di të duartrokasë propagandën, por jo vlerën. Dhe atëherë më kujtohej peshkatari vlonjat, që ngriti gotën për Vendimin dhe, me një buzëqeshje therëse, tha:
"Për artistët tanë... sa për këta të tjerët, t'u rrojë Kënua!", shkruan Tare./Dosja.al
Pamje GREQI- Një 68-vjeçar shqiptar është arrestuar në Follorinë të Greqisë, pasi u kap duke transportuar me auto...
Vendim Kapaj TIRANË- Vendim Kapaj është një nga figurat më të spikatura të muzikës tradicionale shqiptare dhe ...
Pamje DIBËR- Kompanitë 'BE-IS' sh.p.k., 'ERGI' sh.p.k. dhe 'VËLLEZËRIT HYSA' kanë ndërprerë punimet për asfaltimin ...
Mira Murati SHBA- Mira Murati, ish-Drejtoresha Kryesore e Teknologjisë (CTO) e OpenAI, ka bërë lëvizjen e saj t&e...
Marjana Koçeku TIRANË- Deputetja e pavarur Marjana Koçeku, e njohur si “Neomalsorja”, është nisur drejt Tiranë...
Sarande SARANDË- 50-vjeçari Thimjo Rubati, i cili mbeti i plagosur mbrëmjen e së premtes pas një atentati me arm&eu...
Pamje VLORË- Policia Kufitare e Vlorës ka arrestuar një 43-vjeçar nga Afganistani, i dyshuar si organizator i kalimit t&eu...
ANGLI- 29-vjeçari shqiptar që po përballet me procedurat e deportimit në Britani ka tërhequr vëmendjen e mediave pasi publikoi...
Foto TIRANË- Detaje të reja kanë dalë nga dosja penale me nr. 3377 që bën fjalë për mashtrimet online përmes n...
Romeo Bajrami SHBA- Një shtetas shqiptar, Romeo Bajrami, është akuzuar se ka përdorur një motor uji Sea-Doo të marrë me...
