Aktualitet

Ardi Veliu drejt konfirmimit në detyrë: Kam porositur apartament 79 mijë euro, por jetoj me qira me gruan

Drejtori i Përgjithshëm i Policisë së Shtetit, Ardi Veliu ka dalë sot para Vettingut. KJV deklaroi se Veliu nuk ka kryer fshehje të pasurisë. Pasuria e numrit 1 të policisë: 1 apartament në ndërtim e sipër. Vetë Veliu ka deklaruar se aktualisht jeton me qira.
Featured image of article: Ardi Veliu drejt konfirmimit në detyrë: Kam porositur apartament 79 mijë euro, por jetoj me qira me gruan Ardi Veliu, nr.1 i Policise pasi doli ne Vetting

TIRANË- Drejtori i Përgjithshëm i Policisë së Shtetit, Ardi Veliu ka dalë sot para Komisionit të Jashtëm të Vlerësimit. Veliu është verifikuar në të trija shtylla e këtij procesit, që janë; pastërtia e figurës, aftësitë profesionale, dhe deklarimi pasuror. Veliu ka deklaruar si pjesë e pasurisë së tij një apartament me vlerë 79 mijë euro, të cilin e ka prenotuar, dhe për të cilin ka paguar deri më tani 37 mijë euro. Aktualisht, Veliu ka deklaruar se jeton në një shtëpi me qira, pasi apartamenti është në ndërtim e sipër, bashkë me të shoqen. Ai ka deklaruar pranë KJV-së edhe një kredi me 5 milionë lekë dhe të ardhura familjare. Kështu, Veliu ka deklaruar 750 mijë lekë në një llogari bankare dhe 5 mijë euro të tjerë, të përfituara nga shitja e një makine. E shoqja e Veliut, ka deklaruar në bankë rreth 2 milionë e 400 mijë lekë si dhuratë nga prindërit e saj, e provuar kjo me një deklaratë, pas shitjes së një apartamenti në Vlorë.

Sipas KJV-së, të dhënat e Veliut janë në përputhje dhe nuk tregojnë shkelje të ligjit.

“Subjekti ka kryer deklarim të saktë në perputhje me ligjin. Nuk ka kryer deklarim të rremë dhe nu e ka fshehur pasurinë”, u shpreh komisioni.

Në lidhje me kriterin e dytë, atë të pastërtisë së figurës, DSIK ka lëshuar një  certifikatë sigurie për Ardi Veliun, dhe se për të nuk ka procedim penale. Ai nuk ka qenë as i dënuar, e as i përfshirë në Sigurimin e Shtetit. Ndaj Veliut ka patur disa denoncime, të cilat kanë sjellë edhe përgënjështrimin e tij. Në vitin 2002, 2003 dhe 2007, Veliu ka qenë pjesë e Policisë në Vlorë. Për të ka patur denoncim se ishte i implikuar me kalimin e klandestinëve, të dhëna këto, që sipas KJV-së nuk janë provuar. Po ashtu, dy denoncime kanë shkuar në KJV nga një person dhe një denoncim nga Sindikata e Punonjësve të Policisë.

Për më shumë bëhu pjesë e grupit më viral në Facebook, Dosja.al

 

“Duke vlerësuar gjithë raportin, doja të shtoja për transparencë diçka në lidhje me pastërtinë e figurës, në lidhje me një falsifikim pasaporte. Prej 15 gusht 2006 nuk kam qenë pjesë e Policisë Vlorë. Dua të hedh dritë mbi të vërtetën. Sa i përket pretendimit të Sindikatës së Punonjësve të Policisë, jam munduar të punoj me respekt ndaj ligjit.”-tha Veliu.

Vetë, kreu i Sindikatës së Policëve ishte i pranishëm dhe u shpreh se Komisioni nuk i mori parasysh denoncimet e tyre.

Sabetin Fishta, avokat

Sabetin Fishta, Kreu i sindikatës së Policisë: Ne kemi ankesa për marrëdhënien me drejtorin. Që kur ka ardhur, marrëdhënia është zero. Ai e tha edhe vetë, që si drejtor, Ligji e parashtron që të ketë shumë sindikata. Por ai se njeh marrëveshjen me ne. Detyrimet me ne i ka shkelur. Shkelja e ligjit është sepse, drejtori ka larguar edhe drejtues sindikate, që duhet të kishte marrë edhe mendimin e sindikatës, dhe nuk ka zbatuar vendimet e formës së prerë të gjykatave. Këto janë shkelja më e pakët. Ka emëruar punonjës me grada më të ulëta, në vend që të respektojë grada. Komisioni këto na i quajti si ankesa që nuk rrezikojnë pozitën e drejtorit në raport me ligjit. Me këto që dëgjuam, raporti është përpiluar nga strukturat shtetërore, atë e emëroi shteti dhe kryeministri. Komisioni e quajti aktin për emërimin e tij të ligjshëm, megjithëse është në shkelje.

Jo më larg se dje, para KJV doli kreu i Gardës, Gramos Sako. Komisioni i Lashtëm i Vlerësimit në seancën dëgjimore për komandantin e Gardës tha se subjekti ka probleme me pasurinë. Sipas KVJ, Gramos Sako ka bërë deklarim të rremë të pasurisë, ka fshehur të ardhura dhe ka dhënë deklarime të rreme. Procesi i Vettingut në polici ka nisur më 5 nëntor me Oltion Shehun, shefin e Ankesave në SHÇBA, i cili u shkarkua, pasi nuk arriti dot të justifikonte 1.4 milionë lekë. Adriatik Ago, zv.drejtor i SHCBA dhe Tonin Vocaj u konfirmuan në detyrë, ndërsa Ernest Dimashi, drejtor i Teknologjisë së Informacionit dha dorëheqjen para nisjes së procesit. Lista që do të kalojë në ‘lupë’ përbëhet nga 43 emra. Në dallim nga Vettingu i gjyqtarëve dhe prokurorëve, Vendimet e KJV-së mund të ankimohen vetëm në gjykatën Administrative, pasi nuk ka një Komision Apelimi.

(F.g/dosja.al)

Shto Koment