Sport

Thyerja e stolave në stadium, reagon FSHF: Kemi fotografuar të gjithë vandalët (Video)

Organi më i lartë i futbollit shqiptar iu bën thirrje edhe Tiranës, edhe Kukësit
Featured image of article: Thyerja e stolave në stadium, reagon FSHF: Kemi fotografuar të gjithë vandalët (Video) Stolat e thyer në stadiumin kombëtar

Ndeshja Kukësi-Tirana ishte e bukur për t’u parë, por pati edhe probleme. Tifozët duket se kanë dëmtuar 164 stola dhe kjo ka acaruar tejmase FSHF-në, që ka dalë me një deklaratë ku kërkon nga Policia e Shtetit të ndalojë personat që kanë shkaktuar këto akte vandale.

FSHF komunikon se janë identifikuar të gjithë ata që kanë dëmtuar stolat dhe se fotografitë e tyre do të publikohen në stadium.

REAGIMI – “Federata Shqiptare e Futbollit dënon ashpër sjelljet e papranueshme dhe vandale të disa grupeve të tifozëve në ambientet e “Air Albania Stadium” gjatë ndeshjes Kukësi – Tirana, sjellje këto që nuk kanë asnjë lidhje me synimin tonë për t’i kthyer ndeshjet e kampionateve tona në festa futbolli. Këto akte vandale përbëjnë shkelje ligji dhe ne kërkojmë që personat përgjegjës të përballen me ligjin.

Për më shumë bëhu pjesë e grupit më viral në Facebook, Dosja.al

Pas verifikimeve të kryera nga administrata e “Air Albania Stadium”, rezulton se janë dëmtuar 164 ulëse, nga të cilat 145 nga ana e tifozëve të Tiranës dhe 19 nga ana e tifozëve të Kukësit. FSHF ka tashmë të dokumentuara me video dhe foto personat konkretë që thyejnë ulëset dhe i flakin ato në fushë, duke dëmtuar sportdashësit e tjerë si dhe duke rrezikuar edhe jetën e zyrtarëve të ndeshjes si dhe futbollistëve.

FSHF, nëpërmjet një kërkese zyrtare, i ka kërkuar policisë së Tiranës ndalimin dhe arrestimit e këtyre personave dhe tashmë ka nisur procedura nga ana e forcave të rendit. Federata e Futbollit, bazuar te ligji, do të publikojë në stadium fotot dhe videot e personave që ushtrojnë dhunë në mjediset sportive.

FSHF u bën thirrje klubeve dhe grupeve të tifozerive të marrin masa dhe të respektojnë rregullin dhe ligjin në cilëndo hapësirë sportive të vendit. Komisionet në FSHF do të veprojnë në bazë të rregulloreve të brendshme, duke marrë masa kundër këtyre shkelësve. Kërkojmë nga Policia e Shtetit që t’i shoqërojë personat përgjegjës në bazë të ligjit në fuqi, në mënyrë që ata të dalin para drejtësisë. Kërkojmë mirëkuptimin e tifozerive dhe u bëjmë thirrje që së bashku t’i kthejmë stadiumet tona në mjedise familjare, ku mbizotëron festa sportive dhe jo dhuna dhe aktet vandale”.

M.P. / Dosja.al

Shto Koment