Këshilli i Ministrave miraton Programin Kombëtar të Punës: Trajnim çdo vit i 600 të rinjve, 250 punësohen, pagesë dhe kontratë pune në shtet

4 Qershor 2025, 18:15 Nga M.B

Foto ilustruese

TIRANA- Këshilli i Mininistrave ka miratuar Programin Kombëtar të Praktikave të Punës në administratën shtetërore dhe institucionet publike, me qëllim trajnimin 3-mujor dhe më pas punësimin me kontrata 1-vjeçare të të rinjve. Vendimi u mor sot në mbledhjen e radhës të Këshillit të Ministrave, pas propozimit nga ministrja e Shtetit për Rininë dhe Fëmijët.

Vendimi përmban 8 nene të veçanta, ndërsa qëllimi është përfshirja në një eksperiencë dhe integrim i të rinjve profesionistë në administratën publike, qëndrore dhe vendore. Programi parashikon 3 muaj trajnim dhe 1 vit punësim me kontratë. Praktika dhe viti i kontratës do njihen edhe si vjetërsi pune. Çdo vit do trajnohen 600 të rinj dhe vetëm 250 prej tyre kualifikohen për punësim sipas klasifikimit nga institucionet përkatëse.

Në nenin nr. 2 parashikohen edhe kriteret, ku veçohen mosha 21-29 vjeç, i diplomuar, të mos ketë qenë pjesë e programit më parë apo i punësuar në institucione. Në vendim shkruhet gjithashtu se shpenzimet i heq të gjitha buxheti i shtetit dhe pagesa ditore do të jetë 500 lekë, kurse të rinjtë do të kenë edhe trajtim me ushqim.

Ndërsa në Nenin nr. 5 parashikohen edhe numri i kursantëve që do trajnohen dhe trajtimi i tyre. Në nenin nr. 6 parashikohet se në përfundim të periudhës 3-mujore të praktikës, deri në 250 nga praktikantët e thirrjes vjetore përzgjidhen nga institucionet ku kanë kryer praktikën për t’u punësuar me kontratë.

Vendimi i plotë i Këshillit të Ministrave:

"MIRATIMIN E PROGRAMIT KOMBËTAR TË PRAKTIKAVE  TË PUNËS NË ADMINISTRATËN SHTETËRORE  DHE INSTITUCIONET E TJERA PUBLIKE

Në mbështetje të nenit 100 të Kushtetutës dhe të pikës 4, të nenit 14/2, të  ligjit nr.75/2019, “Për rininë”, të ndryshuar, me propozimin e ministrit të Shtetit për Rininë dhe Fëmijët, Këshilli i Ministrave

V E N D O S I:

I. DISPOZITA TË PËRGJITHSHME

Neni 1

Ky vendim ka si objekt miratimin e Programit Kombëtar të Praktikave të Punës në Administratën Shtetërore, në nivel qendror dhe vendor, dhe institucionet e tjera publike për profesionistë të rinj (në vijim referuar si “Programi Kombëtar i Praktikave të Punës”).

Neni 2

1. Programi Kombëtar i Praktikave të Punës synon të përfshijë pjesëmarrësit në një eksperiencë pune të integruar e në ndërveprim me profesionistë karriere në administratën publike, me qëllim përfitimin e një përvoje kualifikuese që ndikon në zhvillimin e aftësive të tyre profesionale e të shprehive të tyre praktike në njohje me sistemin administrativ publik.

2. Kriteret, që duhet të plotësojë aplikanti për t’u bërë pjesë e këtij programi, janë, si më poshtë vijon:

a)  Të jetë i ri nga mosha 21 deri në 29 vjeç;

b) Të jetë diplomuar në një program studimi të ciklit të parë apo të ciklit të dytë, të ofruar nga një institucion i arsimit të lartë;

c)  Të mos ketë qenë pjesë e programit në thirrjet e mëparshme;

ç)  Të mos ketë qenë i punësuar në institucionet e administratës shtetërore apo institucione të tjera publike në të shkuarën, me përjashtim të punësimit si punonjës administrativ, në kuptim të shkronjës “d”, të pikës 1, të nenit 4, të ligjit nr.152/2013, “Për nëpunësin civil”, të ndryshuar.

3. Programi Kombëtar i Praktikave të Punës, për çdo thirrje vjetore, përbëhet nga:

a) periudha 3 (tre)-mujore e praktikës;

b) periudha 1 (një)-vjeçare e punësimit me kontratë.

4. Periudha 3 (tre)-mujore e praktikës dhe periudha 1 (një)-vjeçare e punësimit me kontratë në kuadër të Programit Kombëtar të Praktikave të Punës njihen si përvojë pune gjatë procedurave të rekrutimit në institucionet e administratës publike.

II. REALIZIMI I PROGRAMIT DHE TRAJTIMI I PRAKTIKANTËVE

Neni 3

1. Programi Kombëtar i Praktikave të Punës realizohet nga ministria përgjegjëse për rininë, e cila mbështetet nga institucionet e administratës shtetërore dhe institucione të tjera publike që ofrojnë gatishmëri për pranimin e praktikantëve. Ministria përgjegjëse për rininë  kryen rolin e sekretariatit teknik të programit për koordinimin ndërinstitucional.

2. Programi Kombëtar i Praktikave të Punës realizohet për çdo thirrje vjetore, sipas planveprimit dhe metodologjisë së përcaktuar në lidhjen 1, që i bashkëlidhet këtij vendimi dhe është pjesë përbërëse e tij.

3. Shpallja e thirrjes vjetore dhe procesi i aplikimit për profesionistët e rinj realizohet përmes platformës zyrtare elektronike të Programit Kombëtar të Praktikave të Punës, që administrohet nga ministria përgjegjëse për rininë.

Neni 4

1. Institucionet e administratës shtetërore dhe institucionet e tjera publike, që mbështesin këtë program, përcaktojnë numrin e praktikantëve të kërkuar dhe profilin e tyre.

2. Të gjitha institucionet pjesëmarrëse në këtë program kanë për detyrë të përcaktojnë 1 (një) person kontakti, i cili është përgjegjës për:

a)  dorëzimin pranë ministrisë përgjegjëse për rininë të numrit të praktikantëve për çdo thirrje;

b)  krijimin e kushteve të nevojshme për mbarëvajtjen e programit;

c)  komunikimin me ministrinë përgjegjëse për rininë;

ç) koordinimin e pjesëmarrjes së praktikantëve në programin e posaçëm të trajnimit;

d) përcjelljen pranë ministrisë përgjegjëse për rininë të listës emërore të praktikantëve që përfshihen në thirrjen vjetore të programit, brenda 5 (pesë) ditëve punë nga nënshkrimi i marrëveshjes për zhvillimin e praktikës 3 (tre)-mujore dhe nënshkrimi i kontratës 1 (një)-vjeçare të punës.

3. Për institucionet e administratës publike, pjesë të shërbimit civil, personi i kontaktit duhet të jetë nëpunës civil i konfirmuar. Për institucionet e tjera, ai duhet të ketë eksperiencë pune të paktën 3 (tre) vjet.

4. Të gjitha institucionet pjesëmarrëse në këtë program kanë për detyrë të caktojnë 1 (një) mbikëqyrës për çdo praktikant të pranuar.

5. Mbikëqyrësi i praktikantit ka përgjegjësitë e mëposhtme:

a)  Të përcaktojë detyrat dhe angazhimet për praktikantin;

b)  Të mbikëqyrë, të këshillojë dhe të udhëzojë praktikantin gjatë realizimit të detyrave të dhëna;

c) Të vlerësojë performancën e praktikantit gjatë praktikës;

ç)  Të përgatisë vlerësimin përfundimtar për praktikantin;

d)  Të gjykojë për arsyet e përfundimit të programit nga ana e praktikantit në rast shkeljeje të marrëveshjes midis institucionit dhe praktikantit.

6. Për institucionet e administratës publike, pjesë të shërbimit civil, mbikëqyrësi i praktikantit duhet të jetë nëpunës civil i konfirmuar. Për institucionet e tjera, ai duhet të ketë eksperiencë pune të paktën 2 (dy) vjet.

Neni 5

1. Numri i praktikantëve, që përfshihen në periudhën 3 (tre)-mujore të praktikës në kuadër të thirrjes vjetore të Programit Kombëtar të Praktikave të punës, në çdo rast, nuk është më shumë se 600 (gjashtëqind) praktikantë. Gjatë periudhës së kryerjes së praktikës, praktikanti përfiton:

a)  trajtim ushqimor në formën e kompensimit financiar;

b) trajnim në kuadër të një programi të posaçëm trajnimi pranë Shkollës Shqiptare të Administratës Publike (referuar në vijim ASPA).

2. Vlera ditore e kompensimit financiar të përcaktuar në shkronjën “a”, të pikës 1, të këtij neni, është 500 (pesëqind) lekë dhe i akordohet praktikantit për çdo ditë praktike të kryer prej tij. Pagesa e kompensimit financiar kryhet nga Agjencia Kombëtare e Rinisë, e cila programon në buxhetin e saj fondet e nevojshme për këtë qëllim.

3. Me qëllim kryerjen e pagesës së kompensimit financiar:

a) ministritë koordinojnë me institucionet e sistemit të tyre ministror për mbledhjen e listëprezencave mujore me numrin e ditëve efektive të praktikës së kryer nga çdo praktikant i angazhuar në këto institucione dhe me të dhënat e përditësuara të llogarive bankare të praktikantëve dhe i raportojnë ato pranë Agjencisë Kombëtare të Rinisë, brenda datës 5, të muajit pasardhës;

b) institucionet e pavarura dhe njësitë e vetëqeverisjes vendore raportojnë drejtpërdrejt pranë Agjencisë Kombëtare Rinisë brenda datës 5 (pesë), të muajit pasardhës, të njëjtat të dhëna të përcaktuara në shkronjën “a”, të kësaj pike, për praktikantët pranë institucioneve të tyre.

4. Agjencia Kombëtare e Rinisë përllogarit shumën e kompensimit financiar mbi bazë mujore dhe e transferon atë në llogarinë bankare të praktikantit, në një bankë të nivelit të dytë.

5. Programi i posaçëm i trajnimit sipas shkronjës “b”, të pikës 1, të këtij neni, hartohet nga ASPA, në bashkëpunim me ministrinë përgjegjëse për rininë, bazuar në vlerësimin e njohurive e të kapaciteteve të nevojshme për angazhimin e profesionistëve të rinj pranë institucioneve të administratës shtetërore. Pjesëmarrja në programin e trajnimit përfshihet në vlerësimin përfundimtar të praktikantit.

6. Programi i posaçëm i trajnimit të praktikantëve zhvillohet, në përputhje me rregullat dhe procedurat e ndjekura nga ASPA. Praktikanti pajiset me certifikatën e trajnimit, me përfundimin e suksesshëm të programit të trajnimit.

7. Pagesa për pjesëmarrjen e çdo praktikanti në programin e posaçëm të trajnimit  përllogaritet, në bazë të tarifës së miratuar për përgatitjen paraprake të kandidatëve për të marrë pjesë në konkurrimin e hapur për kategorinë ekzekutive dhe kryhet nga Agjencia Kombëtare e Rinisë në bazë të faturës së lëshuar nga ASPA.

Neni 6

1. Në përfundim të periudhës 3 (tre)-mujore të praktikës, deri në 250 (dyqind e pesëdhjetë) nga praktikantët e thirrjes vjetore të Programit Kombëtar të Praktikave të Punës përzgjidhen nga institucionet ku kanë kryer praktikën për t’u punësuar me kontratë pune 1 (një)-vjeçare.

2. Përzgjedhja e praktikantëve të thirrjes për efekt të punësimit me kontratë pune 1 (një)-vjeçare është, si më poshtë vijon:

a) deri në 200 (dyqind) praktikantë për institucionet e administratës shtetërore;

b)  deri në 50 (pesëdhjetë) praktikantë për institucionet e tjera publike.

3. Praktikanti për t’u punësuar me kontratën 1 (një)-vjeçare të punës duhet të ketë përmbyllur me sukses praktikën 3 (tre)-mujore dhe programin e trajnimit pranë ASPA-s.

4. Përzgjedhja e praktikantëve kryhet nga secili institucion pjesëmarrës, bazuar në vlerësimin e performancës së tyre në praktikën 3 (tre)-mujore.

5. Ministria përgjegjëse për rininë administron procesin e punësimit të praktikantëve në thirrjen vjetore për institucionet e administratës shtetërore dhe për institucionet e tjera publike, bazuar në kërkesat e institucioneve për punësimin e praktikantëve dhe numrin e praktikantëve që kanë kryer me sukses periudhën 3 (tre)-mujore të praktikës.

6. Ministria përgjegjëse për rininë dërgon në ministrinë përgjegjëse për financat numrin e praktikantëve që do të punësohen në çdo institucion të administratës shtetërore dhe institucion tjetër publik, në kuadër të këtij programi për çdo vit buxhetor. Ministria përgjegjëse për financat njofton degët e thesarit për numrin e praktikantëve që do të paguhen brenda fondeve të miratuara për institucionin përkatës në ligjin vjetor të buxhetit.

7. Praktikantët e punësuar, për efekt pagese, klasifikohen jo më lart se niveli i specialistit të kategorisë IV-3.

8. Fondet e nevojshme financiare për punësimin 1 (një)-vjeçar përballohen nga fondet e buxhetit, të miratuara për secilin institucion për shpenzimet e personelit, për vitin përkatës.

III. DISPOZITA TË FUNDIT

Neni 7

1. Në përfundim të çdo thirrjeje, ministria përgjegjëse për rininë raporton pranë Departamentit të Administratës Publike të dhënat për çdo praktikant, që ka kryer me sukses periudhën 3 (tre)-mujore të praktikës dhe për çdo praktikant të punësuar me kontratë pune 1 (një)-vjeçare.

2. Vendimi nr.395, datë 29.4.2015, i Këshillit të Ministrave, “Për miratimin e Programit Kombëtar të Praktikave të Punës në administratën shtetërore dhe institucionet e tjera publike”, i ndryshuar, shfuqizohet.

Neni 8

Ngarkohen ministria përgjegjëse për rininë, Ministria e Financave, Agjencia Kombëtare e Rinisë, Departamenti i Administratës Publike, Shkolla Shqiptare e Administratës Publike dhe të gjitha institucionet e administratës publike, të përfshira në program, për zbatimin e këtij vendimi.

vendimet e qeverise

Galeria fotografike (

)

Në përputhje me standarded JTI

Politike 4 Qershor 2025, 18:01 M.B

Kandidati i PD-ASHM në qarkun e Tiranës, Elton Roshi kërkon rinumërim të kutive: Ka mospërputhje midis votave të lexuara dhe të dhënave të pasqyruara

Elton Roshi TIRANA- Kandidati i PD-SHM për Qarkun Tiranë, Elton Roshi, i ka kërkuar KQZ dhe KAS rrëzimin e miratimit të tabel...

Politike 4 Qershor 2025, 16:59 M.B

Deklaratat e Berishës për zgjedhjet, eurodeputeti Michael Gahler: Do ta ndjek çështjen e Shqipërisë me objektivitet dhe prioritet

Foto nga takimi BRUKSEL- Delegacioni i Partisë Demokratike të Shqipërisë, i kryesuar nga Kryetari Sali Berisha, zhvilloi një ...

Politike 4 Qershor 2025, 16:37 M.B

Punimet në burgun e Spaçit/ Zhupa kërkon seancë dëgjimore urgjente me Gonxhen dhe IKTK: Historia mësohet për mos t'u përsëritur më, nuk zbukurohet për propagandë

Ina Zhupa TIRANA- Deputetja e Partisë Demokratike Ina Zhupa ka reaguar në lidhje me rikonstruksionet që po bëhen në burgun fa...

Politike 4 Qershor 2025, 16:09 M.B

"Qeveria ngre akademi për të formësuar të rinj!" Projektligji i ri në Kuvend: Të gjithë diplomatët duhe të futen në provim

Kuvendi TIRANA- Një ligj i ri për shërbimin e jashtëm të Shqipërisë, parashikon që brenda një viti, t&eu...

Politike 4 Qershor 2025, 16:08 E. D

"Shqipëria nuk mund të integrohet në Europë me “trenat bullgarë” të Edi Ramës"/ Blushi: Raporti i PE fakton blerjen e votave, Qeveria e ka humbur legjitimitetin

Tedi Blushi TIRANË- Sekretari i Përgjithshëm i Partisë së Lirisë Tedi Blushi ka reaguar me një deklaratë pas rapor...

Politike 4 Qershor 2025, 15:39 E. D

"Dezinformacion për shkak të burimeve të njëanshme"/ Deklaratat e gazetares, Meta: Mund të vini për intervistë, do sqaroheni edhe për akuzat e SPAK, edhe për shëndetin

Ilir Meta TIRANË- Kreu i Partisë së Lirisë, Ilir Meta, ka reaguar pas deklaratave të një dite me parë të gazet...

Politike 4 Qershor 2025, 15:32 M.B

Vokshi në Bruksel: Rezolutat e miratuara të zbatohen nga qeveritë dhe institucionet që drejtohen nga PPE-ja

Albana Vokshi BRUKSEL- Depuetja e Partisë Demokratike Albana Vokshi ka mbajtur fjalën në Asamblenë Parlamentare të Parti...

Politike 4 Qershor 2025, 15:28 M.B

"Zgjerojmë hyrjen e qytetit!" Balluku inspekton kantierin në Shkodër: Ura ekzistuese e Bahçallëkut nuk preket, do ndërtojmë urë të re paralele

Belinda Balluku SHKODRA- Ministrja e Energjisë dhe Infrastrukturës, Belinda Balluku, inspektoi sot punimet në kantierin e rrugës &...

Politike 4 Qershor 2025, 15:21 M.B

Osmani: Data e zgjedhjeve lokale do të caktohet në ditët në vijim

Vjosa Osmani KOSOVA- Presidentja e Kosovës, Vjosa Osmani, ka bërë të ditur të mërkurën se në ditët në vij...

Politike 4 Qershor 2025, 15:13 M.B

Rinumërim votash në Tiranë dhe Durrës! KAS legjitimon kërkesën e kandidatëve të PD-së Aulon Kalaja dhe Asllan Dogjani

Foto ilustruese TIRANA- Komisioni i Ankimimeve dhe Sanksioneve ka legjitimuar kërkesën e dy kandidatëve të Partisë Demokratik...

MË SHUMË