Aktualitet

Oficeri ra në humnerë, policia: U nxor pas 12 orësh, presim helikopter për ta dërguar në spital

Ai është nxjerrë nga humnera dhe po kryhet transportimi i tij me helikopter drejt spitalit të Tiranës.

28 Maj 2022, 12:32 Nga DOSJA
Oficeri ra në humnerë, policia: U nxor pas 12 orësh, presim
Policia Shkoder

SHKODËR- Rrok Frroku qëndroi brenda humnerës për 12 orë. Policia ka dhënë detaje nga operacioni për shpëtimin e oficerit për të cilin thotë se ishte duke ushtruar kontrollë në zonë për goditjen e veprimtarisë së kultivimit të lëndëve narkotike.

Operacioni nuk ka përfunduar ende, as pas 12 orësh nga ngritja e oficerit të plagosur rëndë lart. Ai po mbahet në monitorim nga mjekët në pritje të një helikopteri mjekësor, pasi transporti në atë terren është shumë i vështirë.

NJOFTIMI I POLICISË:

Me datë 27.05.2022, rreth orës 12:00, në një zonë malore të fshatit Shosh, Dukagjin gjatë kontrollit në terren, në kuadër të planit të masave për kontrollin e territorit, për goditjen e veprimtarisë kriminale të kultivimit të bimëve narkotike, njëri nga efektivët e grupit të kontrollit, konkretisht Nënkomisar Rr. F., 54 vjeç, si pasojë e terrenit mjaft të thepisur, është rrëzuar dhe ka rënë në humnerë. Për pasojë, shtetasi Rr. F. ka marrë lëndime të shumta në trup. Shërbimet e Policisë dhe disa grupe të RENEA-s, në bashkëpunim me shërbimet mjekësore pranë Spitalit Rajonal Shkodër, nën drejtimin e Drejtorit të Policisë Shkodër, pas 12 orë përpjekjesh, kanë bërë të mundur nxjerrjen nga humnera të efektivit të Policisë, deri në një pikë ku mund të ulet helikopteri apo të bëhet tërheqja e tij me litarë, me qëllim transportimin e tij drejt Tiranës, për ndihmë mjekësore. Ekipi i urgjencës mjekësore i ka dhënë ndihmën e pare oficerit të Policisë dhe po e mban nën monitorim, së bashku me shërbimet policore, deri në mbërritjen e helikopterit, pasi transportimi i mëtejshëm nga shërbimet e Policisë, zjarrfikësit dhe shërbimet e urgjencës mjekësore është i pamundur, për shkak të terrenit shumë të vështirë. Nga pika fundore e rrugës që shkon automjeti deri në vendin ku aktualisht ndodhet punonjësi i Policisë i dëmtuar, është 6 orë me këmbë dhe një terren shumë i vështirë që e bën të pamundur transportimin me krahë, të punonjësit të Policisë.

(a.b)/dosja.al

Sondazh

Poll

MË SHUMË