Aktualitet

Rama djeg Konin në emër të studentëve, zanafilla e përçarjes mes tyre, ku gaboi Rektori që u kërcënua me shkarkim (PËR

13 Prill 2019, 15:02 Nga DOSJA

Rama djeg Konin në emër të studentëve, zanafilla e

TIRANË- Një luftë e hapur nga qeveria kundër drejtuesit të Universitetit të Tiranës, duket se sot pati dhe aktin e saj të fundit, atë të pezullimit nga detyra dhe shumë shpejt mund të sjellë shkarkimin. Në emër të studentëve qeveria dhe Rektori i Universitetit të Tiranës, kanë zhvilluar një sërë betejash me njëri-tjetrin. Lufta mes tyre ishte dhe për ligjin e Arsimit të Lartë, pasi palët e shihnin në optikë të ndryshme reformën. Akti i parë u luftës “Qeveri-Koni” shënohet në shkurt të vitit të kaluar. Në atë kohë Rama gjatë një mbledhje me Rektorët dhe Dekanët nuk ka pa sulmuar Mynyr Konin. Kryeministri dhe Rektori patën një përplasje me batuta dhe akuza të ndërsjellëta me njëri-tjetrin. Rama i tha Konit që ai duhet të reagonte, pasi i ishte bllokuar buka e gojës, pasi në të kohë kishte një bllokim i buxhetit nga adminitratori.

“Nuk e kam përmendur unë ‘bukën e gojës’ në reagimin tim. Dje kam mësuar që e kishte shprehur dikush tjetër. Unë nuk vuaj për bukën e gojës. Jam ndeshur në një situatë bllokuese nga ana e administratorit. Është krijuar një situatë e rëndë në lidhje me situatën e punonjësve të Rektoratit të UT-së, gjë për të cilën kam njoftuar edhe ministren e Arsimit”, ishte kjo përgjigja e Konit. Por Rama mes batutave, teksa akuzonte Rektorët, Dekanët dhe pedagogët për bllokimin e ligjit për Arsimin e Lartë, shtoi se ata ishin “fundi i bishtit të kavallit”.

Pas këtij sulmi ballë për ballë, akuzat mes tyre për bllokim të universiteti vijuan sërish, por këte herë në mënyrë virtuale. Në lojë hyri dhe Dekani i Fakultetit të Ekonimisë, Dhori Kule, që akuzonte Rektorin se kishte bllokuar fondet për punësimin e pedagogëve të rinj dhe një sërë vendimesh të tjera. Tendera pa fund të bllokuar, akuza dhe kundër akuza dhe të gjitha këto shkonin në kurriz të studentëve.

Kur gjërat Qeveri-Koni duket se ishin qetësuar, dallga e protestës së studentëve në dhjetor trazoi sërish detin e qetë mes tyre. Studentët adresuan disa probleme tek qeveria, ndërsa kjo e fundit kaloi kompetencat tek Universiteti i Tiranës. Tre ditë pas nisjes së protestës, Rama mblodhi Rektorët dhe Dekanët për t’u treguar atyre se dhe ata janë të akzuar nga studentët. Ditët kalonin dhe protesta e studentëve ishte drejt shuarjes, shigjetat e akuzës ishin drejt rektoratit dhe dekanëve. Lufta e ftohtë Koni-Rama, u nxeh në 13 dhjetor në një kohë kur studentët ishin në rrugë dhe auditorët bosh.

Rama i quante drejtuesit e universiteve si të arratisur nga përgjegjësitë e tyre. “Për shkak të autonomisë universitare është bërë arratisje nga përgjegjësia e universiteteve. Kur mendoj që rektori i Universitetit të Tiranës është një person i arratisur nga përgjegjësia, është një person që akoma sot nuk është i vetëdijshëm”, akuzonte Rama-Konin. Por ky i fundit i përgjigjej në atë kohë me anë të një letre, duke i thënë Kryeministrit se ky i fundit nuk njihte ligjin e Arsimit të Lartë. “Në mënyrë të vazhdueshme, kam paraqitur problematikat (që Ju vetëm tani po i pranoni se eksiztojnë) në të gjitha institucionet e Shtetit Shqiptar, përfshirë edhe Ju. Akuzat që ju bëni, tregojnë shumë qartë se Ju nuk e njihni ligjin e arsimit të lartë 80/2015”,-shkruante Koni.

Por Rama nuk la pa përgjigje reagimin e Konit, duke e quajtur atë dyfytyrësh. “Unë e mëshiroj pafytyrësinë Tuaj të dyfytyrtë dhe reagimin Tuaj tipik për burrat rrëshqanorë!”, shprehej numri një i qeverisë. Por kur protesta e studentëve u shua dhe dukej se dhe lufta mes Konit dhe Ramës po përfundonte, ky i fundit nisi një seri sulmesh kundër Rektorit. Rama gjatë ditëve të prillit në disa nga daljet e tij ka sulmuar Konit, dhe i përmendi shkarkimin.

“Keni parasysh si ndodh procedura, ministrja e Arsimit ka të drejtë që të kërkoja shkarkimin e rektorit dhe e bën për 30 ditë, kohë që i jepet Presidentit për të vendosur nëse e pranon ose jo këtë gjë”, ishte kjo deklarata e Ramës. Menjëherë pas kësaj u përgjigj dhe numri një i universitetit, i cili sërish me një letër të hapur shkruante se “Nuk mund të shmanget përgjegjësia për mosplotësimin e pikave të Paktit për Universitetin, duke tentuar të devijosh indinjatën e studentëve dhe të pedagogëve nga Qeveria tek Rektori i Universitetit të Tiranës”.

Por pas kësaj përgjigje në lojë hyri dhe ministjra e Arsimit, Besa Shahini e cila sot në një deklaratë për mediat, shprehu mendimin përfundimtar për Mynyr Konin duke thënë se nga sot ai është i pezulluar. Tani ngelet në dorë të Presidentit, Ilir Meta, për të pranuar apo jo shkarkimin e tij Rektorit të Universitetit të Tiranës.

E qershia mbi tortë në këtë përplasje janë artikujt në mediat pranë Ramës, që kanë kaluar në skaner të gjithë pasurinë e Mynyr Konit, punën e tij si rektor, madje edhe përndjekjen në artikujt shkencorë që ka botuar… Në emër të studentëve, Mynyr Koni me shumë gjasë do të digjet. Koha do të tregojë, nëse “koka e turkut” është e duhura, apo do të kthehet në boom-erang. Nëse Meta pranon kërkesën e Qeverisë, do të mbyllet lufta dy vjeçare “Rama-Koni”, e bashkë me të, socialistët do të rizgjedhin të besuarën e tyre në krye të Universitetit me më shumë para e fonde në Shqipëri.

(A.B. Dosja.al)

Tirana është boshatisur për ditët e pushimit. Cilën nga ritet e shenjta po ndiqni:

View Results

aktualitet aktualitet besa shahini edi rama mynyr koni pakti per universitetin shkarkimi i mynyr konit universiteti i tiranes besa shahini edi rama mynyr koni pakti per universitetin shkarkimi i mynyr konit universiteti i tiranes