Politike

"Më të lartat në rajon"/ Kërkesa e gjyqtarëve për pagat, Lamallari: Duhet analizë e fortë për punën e drejtësisë…

Ai nënvizoi se problemet reale të sistemit janë proceset gjyqësore që zvarriten, vakancat e pazbatuara, zgjatjet e afateve të krerëve të gjykatave dhe paraburgimi i padrejtë për qytetarët. 

6 Shkurt 2026, 18:54 Nga E. D
"Më të lartat në rajon"/ Kërkesa e gjyqtarëve
Besfort Lamallari

TIRANË- Ministri i Drejtësisë, Besfort Lamallari ka deklaruar se indeksimi i pagave është i vlefshëm për çdo punonjës të shtetit shqiptar dhe sipas tij, sot gjyqtarët kanë paga të dinjitetshme, të barabarta me vendet anëtare të BE-së. Duke folur për Abc News, Lamallari theksoi se llogaridhënia e zyrtarëve dhe besimi i qytetarëve te drejtësia janë kyçe për forcimin e demokracisë dhe integrimin europian.

Gjithashtu, ai nënvizoi se problemet reale të sistemit janë proceset gjyqësore që zvarriten, vakancat e pazbatuara, zgjatjet e afateve të krerëve të gjykatave dhe paraburgimi i padrejtë për qytetarët. 

"Indeksimi është i vlefshëm për çdo punonjës të shtetit shqiptar, institucionet e pavarura, buxhetore ose jo. Çdo dy vjet ligji e bën të qartë që ka nevojë për indeksim për inflacionin. Diskutimi real duhet të jetë për një nevojë për analizë të fortë për 10 vitet e reformës: a ka sot procese gjyqësore që zvarriten, a ka vakanca që duhen adresuar, a ka sot zgjatje të afateve të qëndrimit në detyrë të krerëve të gjykatave dhe prokurorive, a ka drejtësi cilësore për qytetarët.

Nuk duhet të ketë sot zvarritje dhe qytetarët duhet të marrin drejtësi; një drejtësi e vonuar është e mohuar. Këtë mund ta pësojë një qytetar në paraburgim dhe nuk ka vendim gjykate apo pafajësie që të kthejë pas kohën e mohuar të një qytetari.

Këto janë çështje reale që gjyqësori duhet t’i flasë sot. Qeveria e ka treguar mbështetjen. Sot gjyqtarët kanë pagat më të larta në rajon, paga të barabarta me një vend anëtar të BE-së, konkretisht Greqinë. Pagat e gjyqtarëve janë dinjitoze, duke marrë parasysh edhe kontekstin e pagave, dhe besimi i qytetarëve te drejtësia është kyç dhe nuk duhet të cenohet nga diskutime të vogla për një mision të madh.

Unë respektoj ndarjen e pushteteve, por më e rëndësishme është llogaridhënia. Kjo është në funksion të forcimit të demokracisë. Çdo zyrtar shqiptar duhet të japë llogari para qytetarit. Paraburgimi është padrejtësi e shtuar ndaj qytetarëve dhe kur kjo përforcohet nga Këshilli i Europës, kur kemi një stok çështjesh që nuk po shqyrtohen nga gjyqtarët, këto janë çështjet reale që duhen diskutuar. Kjo duhet të jetë ajo," deklaroi Lamallari./Dosja.al

besfort lamallari

Sondazh

Poll

MË SHUMË