Bota

Krishtlindja i gjeti mes bombardimesh! Zelensky: Rusia nuk mund të shkatërrojë "zemrën ukrainase"! Të gjithë kemi një ëndërr... paqen

Presidenti vuri në dukje se, pavarësisht sulmeve dhe bombardimeve, Rusia nuk mund të shkatërrojë “zemrën ukrainase, besimin e ndërsjellë dhe unitetin tonë”.

25 Dhjetor 2025, 09:09 Nga M.L

 

Krishtlindja i gjeti mes bombardimesh! Zelensky: Rusia nuk mund të
Volodymyr Zelensky

 

UKRAINA- Presidenti i Ukrainës, Volodymyr Zelensky, i drejtoi një mesazh kombit në prag të Krishtlindjeve, duke theksuar se, pavarësisht vuajtjeve dhe shkatërrimeve të shkaktuara nga lufta, Rusia nuk mund të shkatërrojë atë që është më e çmuar për Ukrainën: unitetin dhe shpirtin e popullit ukrainas.

“Ne po festojmë Krishtlindjet në një kohë të vështirë. Fatkeqësisht, jo të gjithë jemi në shtëpi sonte. Jo të gjithë kanë ende një shtëpi. Dhe jo të gjithë janë me ne,” tha Zelensky, duke përkujtuar humbjet njerëzore dhe pasojat e përditshme të pushtimit rus.

Presidenti vuri në dukje se, pavarësisht sulmeve dhe bombardimeve, Rusia nuk mund të shkatërrojë “zemrën ukrainase, besimin e ndërsjellë dhe unitetin tonë”. Ai e përdori fjalimin për të theksuar një “ëndërr të përbashkët” të ukrainasve dhe nënvizoi se lutja e tyre drejtuar Zotit ka një qëllim më të madh: paqen, pa e përmendur drejtpërdrejt presidentin rus Vladimir Putin.

“Kur i drejtohemi Zotit, kërkojmë diçka më të madhe. Kërkojmë paqe për Ukrainën. Luftojmë për të. Dhe lutemi për të. Dhe e meritojmë,” shtoi Zelensky, duke i bërë thirrje besimtarëve që të kujtojnë ushtarët në vijën e frontit, të burgosurit e luftës, të rënët dhe civilët e shpërngulur nga shtëpitë e tyre.

Krishtlindja e këtij viti shënon herën e tretë që Ukraina feston më 25 dhjetor sipas kalendarit Gregorian Perëndimor, pas vendimit të marrë dy vite më parë për t’u shkëputur nga kalendari Julian, të cilin ende e ndjek disa kisha ortodokse, përfshirë atë ruse, që kremton më 7 janar./ Dosja.al

 

volodymyr zelensky

Sondazh

Poll