Bota

Tensione në rritje! Sulme ajrore me dronë drejt Moskës, mbrojtja ruse rrëzon dhjetëra dronë ukrainas

Në dy nga katër aeroportet kryesore që i shërbejnë kryeqytetit rus, operacionet u kufizuan për disa orë për arsye sigurie, tha zëdhënësi i Shërbimit të Aviacionit Civil, Artem Kharinyako, në Telegram.

25 Dhjetor 2025, 07:59 Nga M.L
Tensione në rritje! Sulme ajrore me dronë drejt Moskës, mbrojtja
Foto ilustruese

RUSI- Njësitë ruse të mbrojtjes ajrore rrëzuan të mërkurën një total prej 25 mjetesh ajrore pa pilot ukrainase që po shkonin drejt Moskës, njoftoi kryebashkiaku i kryeqytetit, Sergei Sabyanin, nëpërmjet Telegramit. Në një seri postimesh, Sabyanin tha se dronët u rrëzuan gjatë një periudhe prej rreth 23 orësh.

Ai shtoi se ekipet e shërbimeve të emergjencës po shqyrtonin rrënojat. Ai nuk raportoi ndonjë viktimë apo dëme.

"Nëntë prej tyre u rrëzuan pas orës 23:00", tha ai.

Në dy nga katër aeroportet kryesore që i shërbejnë kryeqytetit rus, operacionet u kufizuan për disa orë për arsye sigurie, tha zëdhënësi i Shërbimit të Aviacionit Civil, Artem Kharinyako, në Telegram.

Ministria Ruse e Mbrojtjes tha në Telegram se 29 dronë ukrainas ishin rrëzuar në periudhën tre-orëshe deri në orën 23:00. Megjithatë, ky numër përfshinte vetëm tre nga rrëzimet e përmendura nga kryebashkiaku Sabyanin.

Më herët dje, ministria kishte raportuar rrëzimin e 172 dronëve ukrainas gjatë natës së së martës ndaj të mërkurës.

Në rajonin e Krasnodarit, dy rezervuarë karburanti në portin e Temryuk u përfshinë nga flakët për shkak të sulmeve nga dronë ukrainas natën e së mërkurës ndaj të enjtes, sipas një deklarate nga autoritetet lokale. Flakët mbulojnë një sipërfaqe prej rreth 2,000 metrash katrorë, specifikuan ata.

Nga ana tjetër, ushtria ukrainase njoftoi dje se kishte goditur me dronë fabrikën e gomës sintetike Yefremov në rajonin rus të Tulës dhe një strukturë magazinimi për dronë detarë në Krime, e cila u aneksua nga Rusia në vitin 2014, diçka që Kievi nuk e njeh.

Mbeturinat nga një dron i rrëzuar shkaktuan zjarr në objektet e një “ndërmarrjeje” në rajonin Tula, tha kreu i autoriteteve lokale, Dmitry Milyaev, nëpërmjet Telegram. Ai nuk dha detaje rreth llojit të aktivitetit të “ndërmarrjes” ku shpërtheu zjarri. Ai gjithashtu vuri në dukje se 12 dronë ukrainas u shkatërruan në rajon.

Ukraina ka shumëfishuar sulme të tilla ndaj Rusisë në muajt e fundit, duke synuar në veçanti infrastrukturën ushtarake, logjistike, të transportit dhe energjisë - pasi hidrokarburet i lejojnë Moskës të financojë luftën - në hakmarrje për bombardimet ruse të territorit ukrainas për gati katër vjet./ Dosja.al

sulme ajrore ne moske lufta ukraine-rusi

Sondazh

Poll

MË SHUMË