Aktualitet

Korrupsion aktiv dhe pasiv në zgjedhje në Qarkun Lezhë! SPAK mbyll hetimet dhe çon për gjykim tre të pandehur, ofronin para në këmbim të votës për PS (EMRAT)

Hetimet, të kryera në bashkëpunim me Byronë Kombëtare të Hetimit (BKH), zbuluan se gjatë fushatës zgjedhore të 11 majit 2025, Gersi Kaçorri, Besnik Uka dhe Artur Jahja kanë bashkëpunuar për të ndikuar votuesit, duke u premtuar dhe shpërndarë para në këmbim të mbështetjes së Partisë Socialiste.

7 Nëntor 2025, 16:09 Nga M.L
Korrupsion aktiv dhe pasiv në zgjedhje në Qarkun Lezhë! SPAK
Foto ilustruese

LEZHË-  Prokuroria e Posaçme Kundër Korrupsionit dhe Krimit të Organizuar (SPAK) ka dërguar për gjykim tre persona të dyshuar për korrupsion elektoral në Bashkinë Kurbin, Qarku Lezhë.

Hetimet, të kryera në bashkëpunim me Byronë Kombëtare të Hetimit (BKH), zbuluan se gjatë fushatës zgjedhore të 11 majit 2025, Gersi Kaçorri, Besnik Uka dhe Artur Jahja kanë bashkëpunuar për të ndikuar votuesit, duke u premtuar dhe shpërndarë para në këmbim të mbështetjes së Partisë Socialiste.

NJOFTIMI:

Prokuroria e Posaçme kundër Korrupsionit dhe Krimit të Organizuar ka përfunduar hetimet dhe më datë 7.11.2025, ka dërguar për gjykim në Gjykatën e Posaçme, procedimin penal nr. 55 të vitit 2025, për korrupsion në zgjedhjet e zhvilluara në Qarkun Lezhë.

Të pandehurit e dërguar për gjykim janë:

Gersi Kaçorri, i akuzuar për kryerjen e veprës penale “Korrupsion aktiv në zgjedhje”, kryer në bashkëpunim, e parashikuar nga nenet 328 dhe 25 të Kodit Penal;
Besnik Uka, i akuzuar për kryerjen e veprës penale “Korrupsion pasiv në zgjedhje”, kryer në bashkëpunim, e parashikuar nga nenet 328/b dhe 25 të Kodit Penal;
Artur Jahja, i akuzuar për kryerjen e veprës penale, “Korrupsion pasiv në zgjedhje”, kryer në bashkëpunim, e parashikuar nga nenet 328/b dhe 25 të Kodit Penal.

Rrethanat e çështjes

Procedimi penal është regjistruar mbi bazën e materialit të referuar nga hetuesit e Byrosë Kombëtare të Hetimit (BKH), në ngarkim të shtetasve të mësipërm, të dyshuar për veprën penale, “Korrupsion aktiv në zgjedhje” dhe “Korrupsion pasiv në zgjedhje”, të kryera në bashkëpunim, gjatë fushatës elektorale për zgjedhjet parlamentare të datës 11 maj 2025.

Aktet e administruara gjatë hetimit proaktiv dhe ndjekjes me metoda speciale të hetimit (përgjime të komunikimeve telefonike, vëzhgime dhe veprime të tjera hetimore treguan se të pandehurit; Gersi Kaçorri, Besnik Uka dhe Artur Jahja janë përfshirë në veprimtari të kundërligjshme në Qarkun e Lezhës, gjatë zgjedhjeve për Kuvendin e Shqipërisë.

Gjatë fushatës zgjedhore, të pandehurit, në bashkëpunim me njëri-tjetrin, premtuan, ofruan dhe dhanë shuma monetare zgjedhësve të Bashkisë Kurbin, në këmbim të votimit në një mënyrë të caktuar, në mbështetje të subjektit politik, Partia Socialiste.

Hetimi evidentoi se të pandehurit kanë qenë aktivë në fushatën zgjedhore në mbështetje të këtij subjekti politik, duke ofruar dhe shpërndarë mjete monetare tek zgjedhësit për të ndikuar në mënyrën e votimit të tyre.

prokuroria e posaçme kundër korrupsionit dhe krimit të organizuar besnik uka gersi kaçorri artur jahja

Sondazh

Poll

MË SHUMË