Politike

“Të mbajë përgjegjësi për shkeljen e Kushtetutës", Bardhi: Edi Rama bën cirk me shqiptarët! Detyroi Begajn të caktojë datën e zgjedhjeve për Tiranën

Bardhi ka theksuar se reagimet ironike të kryeministrit nuk mund të fshehin faktin se qeveria ka shkelur hapur Kushtetutën. Sipas tij, Rama duhet të mbajë përgjegjësi politike dhe institucionale për vendimet që u rrëzuan nga Gjykata Kushtetuese.

4 Nëntor 2025, 15:24 Nga M.L
“Të mbajë përgjegjësi për shkeljen e
Gazment Bardhi

TIRANA- Kreu i Grupit Parlamentar të Partisë Demokratike, Gazment Bardhi ka reaguar pas vendimit të Gjykatës Kushtetuese që hodhi poshtë shkarkimin e Erion Veliajt nga detyra e kryebashkiakut të Tiranës dhe anulimin e dekretit të Presidentit për zgjedhje të reja në kryeqytet. Në një postim në Facebook, Bardhi ka ironizuar dhe kritikuar ashpër reagimin e kryeministrit Edi Rama, i cili më herët kishte komentuar me nota sarkazme në rrjetin X, duke thënë se “u vërtetua që nuk i paskam kapur të gjitha pushtetet”.

Bardhi ka theksuar se reagimet ironike të kryeministrit nuk mund të fshehin faktin se qeveria ka shkelur hapur Kushtetutën. Sipas tij, Rama duhet të mbajë përgjegjësi politike dhe institucionale për vendimet që u rrëzuan nga Gjykata Kushtetuese.

Reagimi i Gazment Bardhit:

Në vend që të mbajë përgjegjësi për shkeljen flagrante të Kushtetutës, Edi Rama zgjedh të bëjë cirk me shqiptarët. Abuzimi i pushtetit këtë herë ishte aq i madh, sa, edhe Belinda Balluku të ishte klonuar 8 herë në Gjykatën Kushtetuese nuk do t’i kishte bërë dot derman.

Shpallja si antikueshtues e vendimit të Edi Ramës dhe Bajram Begajt në raport me Bashkinë e Tiranës nuk është triumf i shtetit ligjor. Është turpi i një pushteti që sfidon çdo ditë ditë shqiptarët dhe ligjin në mënyrë flagrante.

Pasi urdhëroi shkarkimin e tij në Asamblenë Kombëtare të Partisë Socialiste; pasi vendosi shkarkimin e tij nga detyra dhe detyroi Bajram Begajn të caktojë datën e zgjedhjeve për Bashkinë Tiranë, në një përpjekje të dëshpëruar për pazar politik me Erion Veliaj, pa marrë asnjë përgjegjësi për shkeljen flagrante të Kushtetutës, Edi Rama kërkoi sot lirimin e Veliajt nga qelia.
Përgjigjen për kërkesën e tij, Edi Rama e ka marrë po nga Gjykata Kushtetuese, e cila në njoftimin e saj u kujdes të theksonte se “shqyrtimi dhe vlerësimi i çështjes ka të bëjë vetëm me procesin e shkarkimit të kërkuesit nga detyra e kryetarit të Bashkisë Tiranë, PRA JO ME PROCESIN PENAL NË NGARKIM TË TIJ”.

Kështu që Erion Veliaj do të vazhdojë të qëndrojë në burg për paligjshmëritë, korrupsionin dhe abuzimin me detyrën, ndërkohë që planet e Edi Ramës për të grabitur çdo pushtet, njësoj siç grabiti zgjedhjet e 11 majit, morën shuplakën e parë fytyrës.

Sa për Tiranën, më mirë jetim sesa me kujdestarë abuzues që e vjedhin, e plaçkisin dhe e shpërfytyrojnë çdo ditë. Dhe një kujtesë: Në SPAK, ndonëse e zvarritur, është ende e hapur dosja e incineratorit të Tiranës për procedurën ku Edi Rama del garant për qindra milionë euro që janë zhdukur nga korrupsioni. Kur të hetohet ajo dosje, atëherë Edi Rama s’do të ketë me kohë të bëjë llogaritë e burgut të Erion Veliajt, sepse duhet të bëjë llogaritë e burgut të tij!

gazment bardhi

Sondazh

Poll

MË SHUMË