Politike

Ndahet nga jeta në moshën 82-vjeçare ish-Zv/kryeministri, Abdyl Xhaja

Xhaja dha një kontribut të madh në zhvillimin industrial dhe energjetik të vendit. Ai gjithashtu la pas një kontribut edhe në politikë.

25 Korrik 2025, 21:05 Nga N.F
Ndahet nga jeta në moshën 82-vjeçare ish-Zv/kryeministri, Abdyl
Xhaja

TIRANË- Ish-Zv/kryeministri dhe ish-deputeti i PD Abdyl Xhaja është ndarë nga jeta në moshën 82-vjeçare. Xhaja mësohet se ka ndërruar jetë pas një sëmundje të gjatë e të pashërueshme. Xhaja dha një kontribut të madh në zhvillimin industrial dhe energjetik të vendit. Ai gjithashtu la pas një kontribut edhe në politikë.

Abdyl Xhaja lindi më 13 mars 1943 në Elbasan dhe përfundoi studimet e larta në Fakultetin Ekonomik të Universitetit të Tiranës në vitin 1965, duke u diplomuar si ekonomist për industri. Ai në fillimet e tij profesionale shërbeu si ekonomist në ndërmarrje të ndryshme industriale.

Më vonë ai u angazhua në Kombinatin Metalurgjik të Elbasanit, ku mbajti pozicione të rëndësishme drejtuese. Në fillim të viteve ’90, Xhaja shërbeu si Zëvendësministër i Burimeve Minerare dhe Energjetikës, Zëvendëskryeministër dhe më pas Ministër i Industrisë, Burimeve Minerare dhe Energjetikës në disa qeveri gjatë viteve 1991–1997.

Si pjesë e Partisë Demokratike, ai u zgjodh deputet në vitin 1996 dhe ishte anëtar aktiv i Këshillit Kombëtar të kësaj force politike. Pas vitit 1997 vijoi të kontribuonte në fushën e ekonomisë si këshilltar pranë unionit të investitorëve të huaj dhe më vonë pranë Shërbimit Gjeologjik Shqiptar.  Xhaja është nderuar me titullin “Qytetar Nderi” i shtetit të Oklahomës në SHBA – një vlerësim i rrallë për një qytetar shqiptar.

abdyl xhaja

Sondazh

Poll

MË SHUMË