Politike

Thaçi në Hagë, Rama: Çka s'është as e lirë dhe as me erë të mirë është drejtësia ndërkombëtare

Rama ka publikuar në rrjetet sociale një mesazh të ish-presidentit të Kosovës.

25 Korrik 2025, 12:04 Nga M.B
Thaçi në Hagë, Rama: Çka s'është as e
Hashim Thaçi dhe Edi Rama

TIRANA- Kryeministri Edi Rama ka publikuar në rrjetet sociale një mesazh të ish-presidentit të Kosovës, Hashim Thaçi, i cili ndodhet në paraburgim në Hagë. 

“Unë jam i privuar përkohësisht, por populli im është i lirë përjetësisht”, thuhet në shprehjen e Thaçit.

Këtë, Rama e ka shoqëruar me një koment të shkurtër duke shkruar: “shumë e vërtetë Komandant. Çka s’është as e lirë dhe as me erë të mirë është drejtësia ndërkombëtare.”

POSTIMI:

Shumë e vërtetë Komandant
Çka s'është as e lirë dhe as me erë të mirë është drejtësia ndërkombëtare

Hashim Thaçi po gjykohet për krime të dyshuara të luftës pasi u arrestua me urdhër nga Gjykata Speciale para katër viteve. Në rastin e parë, ai akuzohet për krime lufte dhe krime kundër njerëzimit, bashkë me ish-zyrtarë të tjerë të lartë të Kosovës, si Kadri Veseli, Jakup Krasniqi dhe Rexhep Selimi. Vitin e kaluar, ndaj Thaçit u ngrit një aktakuzë e re për përpjekje të paligjshme për të ndikuar në dëshmitë e dëshmitarëve në rastin e parë gjyqësor.

Përveç Thaçit, në aktakuzën e dytë janë përfshirë edhe emrat e ish-ministrit të Drejtësisë, Hajredin Kuçit, ish-shefit të Agjencisë së Kosovës për Inteligjencë, Bashkim Smakajt, ish-kryetarit të Malishevës, Isni Kilajt, dhe Fadil Fazliut. Thaçi është deklaruar i pafajshëm në dy rastet gjyqësore. Gjykata Speciale është institucion që funksionon sipas ligjeve të Kosovës, por selinë e ka në Hagë të Holandës.

Dhomat e Specializuara dhe Zyra e Prokurorit të Specializuar të njohura gjerësisht si Gjykata Speciale, hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.

edi rama hashim thaci

Sondazh

Poll

MË SHUMË