Politike

Përpjekjet për konstituimin e Kuvendit të Kosovës, zhvillohet sot seanca e 43-të

Në seancën e së shtunës e cila u mbajt në vonesë në mbrëmje pas një alarmi për bombë, dështoi sërish të miratohet krijimi i komisionit për votim të fshehtë që do të mundësonte procedimin për votim për zgjedhjen e kryetarit.

7 Korrik 2025, 07:59 Nga M.B
Përpjekjet për konstituimin e Kuvendit të Kosovës,
Kuvendi i Kosovës

KOSOVA- Kuvendi i Kosovës pritet të mbajë sot seancën e 43-të në përpjekje për t’u konstituuar në orën 11:00. Deri tani në asnjë nga seancat e mëparshme nuk është arritur të përmbyllet me sukses procesi i zgjedhjes së kryetarit dhe nënkryetarëve të Kuvendit, duke krijuar një ngërç të zgjatur institucional.

Në seancën e së shtunës e cila u mbajt në vonesë në mbrëmje pas një alarmi për bombë, dështoi sërish të miratohet krijimi i komisionit për votim të fshehtë që do të mundësonte procedimin për votim për zgjedhjen e kryetarit.

Lëvizja Vetëvendosje, si subjekti më i madh në Kuvend, ka propozuar Albulena Haxhiun për kryetare, duke insistuar që votimi të zhvillohet përmes një procesi të fshehtë. Kjo kërkesë është kundërshtuar nga partitë e tjera PDK, LDK, AAK e Nisma të cilat nuk po propozojnë anëtarët për këtë komision dhe e akuzojnë Vetëvendosjen për mungesë bashkëpunimi.

Presidentja e Kosovës Vjosa Osmani ka bërë thirrje për përgjegjësi politike dhe ka kërkuar nga deputetët të tejkalojnë dallimet për të mundësuar funksionalizimin e Kuvendit. Gjykata Kushtetuese e Kosovës nxori më 26 qershor një aktgjykim i cili i detyron deputetët që brenda 30 ditëve ta konstituojnë Kuvendin, por nuk dha detaje se cilat do të ishin pasojat në rast se afati nuk respektohet.

kosova

Sondazh

Poll