Politike

Ngërçi politik në Kosovë, ish-presidenti Sejdiu: Bllokimi i Kuvendit mund të çojë në zgjedhje të reja! Bashkëpunimi ndërpartiak është çelësi

Sejdiu shton se nëse kriza vazhdon, rrezikohet jo vetëm puna e Kuvendit dhe formimi i Qeverisë, por edhe stabiliteti politik në vend.

26 Maj 2025, 13:28 Nga N.F
Ngërçi politik në Kosovë, ish-presidenti Sejdiu: Bllokimi
Sejdiu

KOSOVË- Ish-presidenti i Kosovës, Fatmir Sejdiu ka reaguar për situatën aktuale politike në Kosovë dhe moskonstituimin e Kuvendit të Kosovës. Sejdiu në një reagim në Facebook ka shkruar se bllokimi i zgjedhjes së kreut të Kuvendit të Kosovës paraqet një situatë të pazakonshme institucionale dhe politike.

“Pas më shumë se 21 tentimeve të pasuksesshme, Kuvendi vazhdon të jetë jo-funksional, çka e paralizon jetën parlamentare dhe pengon formimin e qeverisë së re. Kjo gjendje po reflekton mungesë të konsensusit politik dhe gatishmërisë për kompromis, duke dëmtuar drejtpërdrejt stabilitetin institucional dhe besimin e qytetarëve në procesin demokratik”, ka shkruar Sejdiu.

Ish-presidenti ka theksuar së është nevojë urgjente që qeveria dhe opozita të tregojnë maturi politike dhe fleksibilitet, duke u angazhuar në dialog serioz për të arritur një marrëveshje. Sipas tij bashkëpunimi ndërpartiak është çelës për zhbllokimin e situatës dhe rikthimin e funksionimit normal të institucioneve.

Sejdiu shton se nëse kriza vazhdon, rrezikohet jo vetëm puna e Kuvendit dhe formimi i Qeverisë, por edhe stabiliteti politik në vend.

“Pasojat mund të përfshijnë: zgjedhje të reja të parakohshme, krizë të besueshmërisë në institucione dhe dëmtim të imazhit ndërkombëtar të Kosovës.

Shoqëria jonë ka nevojë për institucione funksionale dhe për angazhim të përbashkët politik që u përgjigjen pritjeve të qytetarëve për zhvillim, stabilitet dhe përparim demokratik. Vetëm përmes paqes publike, bashkëpunimit dhe mirëkuptimit mund të ndërtojmë një të ardhme të sigurt dhe të qëndrueshme për vendin tone”, shkruan ish-presidenti. 

fatmir sejdiu aksident në kosovë

Sondazh

Poll

MË SHUMË